Read Varisi Zazu Ria Apostoloro 28 Bible Online

Zazu Ria Apostoloro 28 - Varisi bible

Zazu Ria Apostoloro 28

¹Ṉalu qi za vosoro vavelaka, qi rove ṉugu de iri vitoṉo ze Malta.

²Basoero na ṉugu ni gogo ne, iri lete va velaka ne qemu. I tupi nare mana i lolomu, iri subo nako mana iri sine qemu timuna za kakasiru.

³Pol i soqe kavia rereqo mana i taru zaqe nako ni kamu go, kaki dole i koe rereqo ni pala tarua go i kabale karisina Pol.

⁴Basoero na nugu igogo ne, iri mia dole ni idoke go karisina Pol, mana iri vari sine ne, “Valeke dena i vae vale basoe bana ba go, do god varinanao ita ne tiniki ara vatoo kaega ia, patavolomo i paqa ego loka ne.”

⁵Do Pol i tepuru vanaqe dole ne, mana dole ne i soru za loborona nako ne, Pol iki ara paleke kaega.

⁶Iri piri ne ia tina butene ba tina soru mana le go, do umata na piri iri vaego ria ne, kapata iki sadake so kaega ia iago, iri pala nanao napu iri go, “Valeke dena i kaki god bago!” iri go.

⁷Iki laqalqa ne kaega de iri koego, ia kaki barue ia Pabilius, ia i batu ego ṉugu igogo ne. Iva gado velaka qemu, mana torana kapisa musaqara remu qi koe to vari miasoka ia.

⁸Tamana Pabilius i kekele vesu ia, tanego i mokoso, i pala ririka mana i sisiporo ne parasa go, Pol i keba za kova ne, i pepene ne, i siba ze karisina tokamana, mana i vatavoesia ia.

⁹Ṉalu i sadaka go pata dena, kero ne basoero mokoso iri koego nugu nigogo ne, iri valama qira e de ikoego Pol mana i vatavoesi lupo qira.

¹⁰Iri teke ne qemu topu na sosovolomo, mana ṉalu qi vanama ne toka napu, iri ruana ze koluka ne pata qeqe tuana remu loborona toka timuna vaego.

¹¹Taramuzina kapisa inaqa, remu qi toka e kaki koluka i reqe me Alekzadaria iri vitoṉo ze, “Baṉara pabaka” i za ko bana e nugu nigogo ne, torana ṉalu i sokoro go.

¹²Qi za doka e komala Sirakius, mana qi za koe de go torana kapisa musaqara.

¹³Reqe napu e Sirakius, qi toka za mana qi za doka e kaki komala na Reqium, bakubaku na ne seva ne i tupi kikiuru me tepa Saot, mana torana karua musaqara qi lama e kaki komala lavata na Puteoli.

¹⁴Dego qi soba qira kavia vano iri vaogote go Jesu, iri koego de go, iri pene qemu, go timuna ko tavisi qira kameka vuiki. Mana reqe to komala igogo ne qiara zaza go za go Rom.

¹⁵Ṉalu vano iri vaogote go Jesu iri koego Rom, iri gata, remu qi lama doka, iri lama mana soba qemue makete na Apius, mana de iri vitoṉo ze kapisa pade valeke go. Ṉalu Pol i miasoba qira i lete kula sivala mana i seko velaka ne God.

¹⁶Ṉalu qi za doka e Rom, iri vamalumu ne Pol tina kovamiki tanuna, do kameka so soldia tinamiasoka go ia.

¹⁷Taramuzina kapisa musaqara za ko qi vae go Rom, Pol i koru qira batu batu ria vano Jiu iri koego Rom, go mara ria pepeu, ṉalu iri lama kameka teṉo lupo, Pol i sine ne qira. “Basoero era vano Izirel! I ogoto sivala qaki zazu ne kaega kaki pata i vasasakata ne qira Basoero ita, ba vatovato ṉalu bana ita iri teke vakava ne qita vanovano Bana ro ita, do vano Jiu iri koego Jerusalema iri soko taru ve era bara ne, mana iri vazao ve era loborona karaputa ria vano Rom go.

¹⁸Taramuzina iri tana lupo nava, vano Rom iri soko lupasava, tanego iriki soba kaega kaki pata kebu go i tora go tuna le ne.

¹⁹Do vano Jiu iriki soko kaega vano Rom tarina lupasava era, iago itora tuna zae d e ikoego Siza, patavolomo i kaega nava kaki pata qa va paqo qira e go basoero na sinaqe era.

²⁰Iato dena tane pataro go qa soko go ma mia qamu e, mana seko tabe qamu e ramu. Iato go, era qa qolo ego seni dena, tanego i sauna to Jesu iato iri taru ze go ruruqe ria vano Izirel.”

²¹Iri vataule ne ia, “Remu qiki pala so kaega ka leta ireqe me Judia saumu aro, ba kakia ro basoero iri reqe me dego, iri pala me ka tarama ba kaki pata sakata saumu aro.

²²Do remu qi soko gata na nanaomu aro, tanego qi rove basoero na osina dia, iri seko tolia koko qo koego aro.”

²³Iago iri pui ne ṉalu Pol, mana ṉalu nae topu ria basoero iri lama teṉo e de ikoego Pol. Tupi sarusaruku go doka so raravi, Pol i sine vatalupasa ne qira de igogo tarama na Too ikoego vari miasoka ia God, mana i pada ne va rove qira e pataro i sine ne qira go sauna Jesu, i pata ogoto, i pala kavia seko Tamana ro ia Mosese mana karo iri karo go propeta ro, go tarina vaogote mana tarina ruruqe go God go.

²⁴Kakiaro ria iri gata rove mana iri toqe ne vaogote na Jesu ṉalu iri gata go seko na Pol, do kakiaro ne iriki vaogote kaega.

²⁵Iago iri kasi ne ia, iri vari valegu tanuqira, do tarakenaqana iri ara zaza go Pol i sine seko ro dena, “I totoloṉo sivala Spirit tabo i seko vagoe ze propeta Isaia, de iri koego vanovano bana ro ita.

²⁶Ia i sine, ‘Za mana sine ne qira basoero dena tamuna vavaroṉo no, do tamuniki gata rove kaega, tamuna reṉa ne, do tamuniki mia rove kaega,

²⁷Tanego nanao qira basoero dena i rodoko, iri olia qeqele qira mana iri va kodo mata qira. Do ria mara ria mimia ne mataqira mana gata pata ne qeqele qira mana nanaoqira iri mazala nanao lupasa ne go, iri mazala go tabali me de qa koego era, go era tuna va tavoese qira.’ ”

²⁸Mana Pol i sine valupolupo ne qira, “Era ma sine ne qamu go tamuna rove Tarama Velaka ia God sauna vari vakavele i valama bana ze de iri koego vano iriki Jiu go kaega, ria tarina gata rove ṉalu iri gata go seko dena.”

³⁰Torana karua ave Pol i koe pade iri volivolia go, mana de go i kula ne qira basoero iri lama mia ia.

³¹I tarama ne Too ikoego vari miasoka ia God mana i vari vatatana ne sauna Batu Jesu Kristo, i seko va karaputa ne mana kaega ka basoe iara va noto ze go ia sauna tamana ne na too ikoe go vari miasoka ia God.