Read Varisi Zazu Ria Apostoloro 3 Bible Online

Zazu Ria Apostoloro 3 - Varisi bible

Zazu Ria Apostoloro 3

¹Kaki kameka ṉalu Pita mana Jon iru zae Pade Lotu torana kapisa kiloko, kikinaka raravi, torana to ṉalu na pepene.

²Tepa siporaṉa na Pade Lotu ne, iri vitoṉo ze siporaṉa menomeno, i koe kameka valeke i taveqo bana so pasi podo i vae go. Osina musaqara iri sua vazao ze ia siporaṉa ni gogo ne, go tina pene kesa qira basoero iri zae go Pade Lotu ne.

³Ṉalu i miasoba qiru Pita mana Jon iru keba me, i pene qiru, go tiruna teke ne kaki pata igo nanao na.

⁴Iru reṉa vanadu ne ia, mana Pita igo, “Rena ne qaru raru!”

⁵Valeke ne i reṉa ne qiru, i nanao kadigo tina pala qirue to kaki pata igo,

⁶do Pita i sine ne ia, “Era i kaega ogoto nava to kesa, do ma teke nigo so pata i ko nava go, loborona vitoṉona Jesu Kristo na Nazaret, qa sine nigo, degere mana zaza!”

⁷Gonae i toqo ze karisi matauna mana i tavisi ne vadegere na, katikili so pepetarana mana pikapika na ro makena valeke ne i karaputa lupo,

⁸i soqa vazakazaka, i degere mana i tupi zaza ne. Gonae i lulu ne qiru iri keba za loborona Pade Lotu ne, i zaza i soqa mana i vazaka God.

⁹Basoero iri koego de gogo ne, iri mia ia i zaza mana i vazaka God,

¹⁰mana ṉalu iri mia rove ia, ni valeke penepene ni kolokoloku ego siporaṉa meno meno ne, iri lete poloso mana nureke ne pata ni sadaka go.

¹¹Valeke ne i vatapipisi taru ne qiru so Pita mana Jon “de koko na pade ia Solomon,” iri vitoṉo ze go. Basoero ne iri nureke mana iri teteṉe za de iri koego ria tarapisa ne.

¹²Ṉalu Pita i mia qira basoero ne, i sine ne qira, “Basoero na Izirel, avigo tane qamu poloso nego pata dena, mana avi vae tane qamu reṉa vale ne qarue raru? Avigo qamu nanao i karaputa raru tanuqaru ba, vatovato totoloṉo raru de koe God, tane qaru va zaza go valeke dena?

¹³God ia Abra-am, Aisak, mana Jekop, God ria vanovano bana ro ita, i teke bana ne karaputa mana mazala ia de ikoego valeke zazu ia, Jesu. Do ramu qamu vazao ze ia de iri koe ria batubatu ro, mana Qamu sila ze ia tarakenaqana Pilato, ṉalu Pilato i nanao mara Vatalupase ia.

¹⁴Ia i tabo mana i totoloṉo, do ramu qamu sila ia mana qamu sine ne Pilato tina toqe ne, pata qamu soko go, tina vasiporo ne qamu valeke ni vae vale basoe go.

¹⁵Iato go qamu vae vale go basoe i mazala go teke ne na too ogoto basoe ne, do God i va too ze ia tepa le, mana remu to qi mia go.

¹⁶I karaputa na vitoṉo na ia, i teke ne moqere valeke taveqo dena, pata qamu mia mana rove go i zazu ia vaogoto loborona vitoṉona ia, vaogoto de koe Jesu, iato i va velake go valeke de, iato qamu mia go osiqamu.

¹⁷Iago ninidena turaquroe, era qa rove to pata qamu zazu ne go ramu mana batubatu ro ramu, de koego Jesu, do qamuki nanao rove kaega talupasana pata qamu zazu ne go.

¹⁸God i sine bana me ṉalu bana ne, de iri koe osiqira propetaro ia, iri tavine bana ne go ṉalu bana, Mesia tina pala vokara, mana seko ni gogo ne, i lama sadaka ogoto.

¹⁹Muna manava sakata ne vasakata pata ro ramu, mana tabali za de ikoego God, go God tina nanao ule ne qamu go.

²⁰I velaka ramu tamuna pala karaputa ia madau, tina reqe me de koe Batu ne, tina turine me Jesu iato i Mesia ia, ni vine bana go tina ke ramu.

²¹Ia tina koeso rani ne, go tina doka so ṉalu osina pata tina va vorua go, gerena so God ni sine bana ne qira go ria propeta tabo ro ia ṉalu bana ne.

²²Tanego Mosese i sine bana, ‘Batu God ramu tina tekene qamu kakia propeta, gerena so i turi e nava go era, mana ia ne, tina kakia basoe na so sinaqe ramu. Ramu tamuna vaogote osina pata tina sine ne qamu go tamuna zazu ne.

²³Ka basoe iki vaogote go kaega propeta nae, God tina taru va kakavata ze ia de iri koego basobasoero ia, mana tina vasakate ia go.’

²⁴Mana osiqira propeta ro, tupi me Samuela mana ria iri lama go taramuzina ia, osiqira dena i zari seko ro iri sine vasadake sauna pata ro i sadaka go musaqara ro dena.

²⁵Pui ia God ni vazuka qirae osiqira propeta ro ne, i ke ramu, mana qamu kenakena bana pui voru ia God, ni zazu bana ze de iri koe vanovano bana ramu. Gerena so ni sine bana ne Abra-am, ‘De iri koego popodo ria salesale ro aro, era tuna va makaolo qira basoero na pua dena.’

²⁶Mana God i vine basoe zazu ia, i turi kenaqa ne ze ia de qamu koego ramu, go tina va makaolo qamu, go osiqamu tamuna tarua osina vatovato sakata ro ramu.”