Read Varisi Zazu Ria Apostoloro 4 Bible Online

Zazu Ria Apostoloro 4 - Varisi bible

Zazu Ria Apostoloro 4

¹Ṉalu Pita mana Jon iru ara seko tabe qira basoero ne, iri lama kakiaro vano patere iri batu ne qira go vano irimiasoka go Pade Lotu ne, mana kakiaro vano Sadusi go.

²Iri muma, tanego karua apostolo ne iru varove qirae basoero ne Jesu itoo napu me tepa le ne. Gerena ianae i vasadaka ogote basoero iri le go tarina too napu me.

³Iago, iri pala taru qiru mana iri taru qiru aqe bara ne, go tina doka go kene musaqara, tanego ilete raravi to.

⁴Do topu ria basoero iri gata go tamana riru, Pita mana Jon iri vaogote Jesu mana topu qira ninidena izaza popoka idokae lima mao ria.

⁵Bakubaku na to ia, vano batu batu na ro Jiu, kazigarataro, mana vano vari vatatana na Tamana iri teṉoe Jerusalema.

⁶I kotavisi qira batu ria Patere, Anas mana Kaipas, Jon, Alekzada, kakia ro napu ria iri reqe go sinaqe Patere.

⁷Iri vadegere qiru karua apostolo tarakenaqa qira, mana iri tana ne qiru, “Avigo tane qaburu zazu ne go pata dena? Adepa qaburu pala ze go karaputa, ba ake vitoṉona go qaburu vazazua go dena?”

⁸Pita i purake go Spirit tabo i vataule ne qira, “Ramu batu ro ria basoero, mana kazigarata ro go.

⁹Ramu qamu tana ne qaru raru ninidena, sauna de igogo zazao na zazu velaka idokae go valeke ile go makena dena, mana de zaza go.

¹⁰I tora to osiqamu, mana vano Izirel muna nanao rove, valeke dena i velaka to, mana idegere go tarakenaqa qamu ninidena, tanego i zazu ia karaputa na vitoṉona Jesu Kristo na Nazaret, ia qamu paqipaqi ze go kuluse ne, do God i vatoo me ze ia tepa lene.

¹¹Jesu to, ia i sine bana go Buka tabo ne, igo, ‘Ipaka qamu kasia go ramu vano zazu pade ne, iato ipaka ilete mazala zivala go.’

¹²Vari vakavele, ireqe me so de i koe go tanuna Jesu, osina dia kolabuna vudu pua i kaega napu kaki basoe, do tanuna to Jesu, God iteke ne qita go tina vakavele qita go.”

¹³Vano na pepeu lavata ne iri lete poloso sivala ṉalu iri mia go vanadu qiru Pita mana Jon, iruki sareki go kaega, mana iri nanao rove iru karua basoe volomo so, tanego iruki sikulu kaega, do ria iri rove velake qiru iru kotavisi bana go Jesu.

¹⁴Do ria imakuru qira tarina sine go kapata, tanego iri mia valeke iru vazazao go i degere tavisi qiru Pita mana Jon,

¹⁵Iago, iri sine ne qiru mara riru siporo kasine kova pepeu ne, go mara pepeu vamiki tanuqira, iri go.

¹⁶Gonae iri varitanae tanuqira, “Ava mata vane qiru karua valeke dena? Tanego osiqira basoero iri koego Jerusalema iri rove lupo zazu vari vaposolo iru zazu ne go, iago imakuru qita tatana legua go, iri go.

¹⁷Dego tiniki zaza napu go kaega tarama dena de iri koego basoe ne, ita mata vakaega ne qiru niki ara sine napu ne kakia basoe, loborona vitoṉona Jesu, mata vane qiru, iri go.”

¹⁸Gonae iri koru vakeba ule napu me qiru mana iri sine ne qiru, “Niki ara tamana ne, ba vari vatatana napu ne vitoṉona Jesu de iri koego basoero ne”.

¹⁹Do Pita mana Jon iru vataule ne qira ria, iru go dena, “Ṉalu raru taruna nanao kasupe ne seko ia God mana vaogoto qamu ramu gogo ne, avigo itotoloṉoe tarakenaqana God ba kaega? Ramu muna nanao velake pata dena.

²⁰Tanego raru taruniki mamanava kaega seko ne na pata qaru mia mana gata go.”

²¹Gonae ria vano pepeu iri lete vabanabana vamoqere qirue tamana, mana iri vasiporo volomo qiru, tanego iriki mia kaega kapata itora go tina valepulepu qirue go, mana iri mia napua basoero ne iri vazaka God sauna pata i sadake go valeke ile go makena.

²²Valeke iru vazazao vavelaka ze go riru zazu mazala dena i vasiṉaulu seki to ave na.

²³Ṉalu Pita mana Jon iru siporo, iru katikili gado ule za de iri koego vano iri vaogote Jesu, mana iru sine ne qira ria sauna pataro iri sine go vano batu ria Patere mana vano kazigarata ro go.

²⁴Ṉalu vano lotu iri gata go pataro dena, osiqira iri kameka pene aqe de ikoe God, iri go dena, “God Batue! Qo vazaria go rani mana pua, mana osina pataro iri koego loboro qira go!

²⁵Loborona Spirit tabo aro qo vamalumu ne kazigarata remu Davita basoe zazu aro, go i sine go. ‘Avigo tane vano iriki Jiu go kaega iri poro muma? Mana basoero ria iri zazu ne go vatovato bulaṉoi gogo ne na?

²⁶Ria batu lavata na pua de iri vanama ne varitara, Mana vano iri kenaqa ne qira vano basoero na vudu pua dena iri kameka teṉo vanama ne varitarae na de ikoe go God mana valeke tavine ia ne go.’

²⁷Pata ogoto, Erode mana Ponsio Pilato iru kameka vatovato tavisi banae de iri koe go vano iriki Jiu go kaega, mana vano Izirel go mara vae Jesu valeke zazu tabo aro, ia qova Mesia go.

²⁸Vatovato ro dena iri zazu ne ze so pataro qo soko go aro, go loborona karaputa aro qo sine bana mego tinara lama sadaka.

²⁹Ninidena Batue ono mia velaka me de igogo vatovato ria batu lavata ro dena, de qimu koego remu. Ono tavisi ne qemu remu vano zazu aro, go mikasi sareki ne na tamana vakaraputa ne na seko aro.

³⁰Ono vasadaka me karaputa aro, go mara va velaka qira vano iri mokoso, mana vamao qemu go di zazu ne zazu vari vapoloso, mana zazu mazala ro mara sadake vitoṉo tabo na Jesu valeke zazu aro.”

³¹Ṉalu ria iri lotu lupo pade iri teṉoe go i vizu, osiqira iri purake to Spirit tabo, mana muzina nae ria iri vatupia to tarama vakaraputa ne seko ia God.

³²Vano iri vaogote go Jesu iri kameka nanao. Kaega kaki kameka basoe i taru vakakavata go patapata ia tanuna, do osiqira iri vari va kameka ne so osina pataro iri toṉove go.

³³Loborona karaputa ia God, ria apostoloro ne iri tarama ne too napu ia Jesu Batu ne, mana God ilete vamakaolo napu qira to ria go.

³⁴I kaega kaki kameka basoe ikoego de iri koego, iko makuru ne go kaki pata. Tanego ria iri toṉove go pua ba, pade gogo ne, iri volivoli ne mana kesa iri pala ze go,

³⁵iri teke ne qira apostoloro ne, mana apostoloro ne iri ara kena ne qira go basoero kesa itorago pata iri soko go.

³⁶Mana kameka valeke i kome tepa ṉugu Saeprus, ipodoe sinaqe ia Livai, vitoṉona Josepo, do apostoloro ne iri vitoṉo ze ia Banabasi talupasana, “Valeke i vavelake nanao ne kene basoe”.

³⁷Valeke de togo, ivolivoli ne pua i toṉove go, mana ipala kesa na i teke ne qira apostoloro ne go.