Read Varisi Zazu Ria Apostoloro 5 Bible Online

Zazu Ria Apostoloro 5 - Varisi bible

Zazu Ria Apostoloro 5

¹Kaki valeke vitoṉona Ananaisi mana qole ia vitoṉona Sapira iru volivoli ne kakia ro pata iru toṉove go.

²Do pata iru vari toqe ne qole ia, iru sotia kakiaro kesa ne, mana keni seki go iru tekene qira apostoloro ne.

³Pita i sine ne ia, “Ananaisi, avigo tane qo vamalumu ne Satana ni lama kenaqa nigo, mana qo poqe nego Spirit tabo, tanego qo sotia go kakia ro kesa qo pala ze go patapata ro aro?

⁴Tarakenaqana go qo ara volivoli ne patapata ro aro, i ke raro bana so, taramuzina qo volivoli ne, kesa na i ke raro napu so, do avigo tane qo nanao go zazu ne na pata igogo ne? Aro qoki poqe kaega ka basoe, do qo poqe so God!”

⁵Pasi Ananaisi i gata soba go seko ro dena, i soru mana i le, osiqira ria iri gata go ne, iri lete sareki.

⁶Ria gavere ro iri keba me, iri kade ze poga tokamana ne mana iri za voua ia.

⁷Kadego torana kapisa aoa taramuzina pataro dena, qole ia i keba me, de i koe Pita, ia iki rove kaega valeke ia i le go.

⁸Pita i tana ne ia, “Mo sine nava era, avigo iato de osina kesa, qaburu pala ze go volina patapata ro raburu?” Qole ne i vataule, “Oveto, osina kesa neto nae.”

⁹Iago Pita i sine ne qole ne, “Avigo tane aro mana valeke aro qaburu nanao go pada ne na Spirit ia Batu ne? Valekero iri voua go valeke aro, iri koe siporaṉa ne torana to dena, mana tarina sua vasiporo napu go aro!”

¹⁰Igoso nae qole ne i soru e makena Pita mana i le. Ria gavere ro iri keba me mana mia qole ne i leiago iri sua vasipore mana iri za vou ze rikisina valeke ia.

¹¹Osiqira vano na eklesia mana kero ne basoero iri gata ga pataro dena, iri lete sareki lupo.

¹²Topu na zazu mazala ro mana zazu vari vapoloso go, iri vasadaka ze de iri koego basoero ne, ria apostoloro ne. Osiqira vano iri vaogoto go iri vari sobae tepe na pade ia Solomon.

¹³Basoero iriki vaogoto go kaega, iriki za ko tavisi qira kaega, do iri seko vazakazaka qira vano iri vaogoto go.

¹⁴Do topu ria basoero iri keba tavisi me de iri koe ria apostoloro ne, topu sasakata valekero mana qolero iri vaogote go Batu ne.

¹⁵Sauna to pata iri zazu ne go apostoloro ne, vano mokoso iri sua vasiporo qira me zuka lavata ne, mana iri va kekele qirae vesu ria mana tobi ro ria, go dudule na Pita i mazala go pala qira, ṉalu tina zaza sivala go.

¹⁶Mana topu sasakata basoero iri lama, iri reqe me komakomala rikisina Jerusalema, iri pala qira me vano mokoso, mana ria i pala qira go manuru sakata ro, gonae osiqira ne iri tavoesi lupo.

¹⁷Gonae batu ria patere ro mana vano iri kameka zazu go, ria iri tavine ego Sadusi, iri lete qora ne qira apostoloro ne, iago iri nanao tarina zazu ne kaki pata go tarina vamakuru qira apostoloro ne.

¹⁸Iri pala qira apostoloro ne mana iri taru qirae bara ne, bara igogo ne iri koe topu ria vano sakata ro.

¹⁹Do kuse nae, aqelo ia Batu ne i za papaqa siporaṉa na bara ne, ilulu vasiporo qira apostoloro mana i sine ne qira,

²⁰“Za mana za degere loborona Pade Lotu ne, mana sine ne qira basoero ne, dego zazao na too voru dena.”

²¹Apostoloro ne iri vaogote, iara sarusaruku lolotoro me ia, iri keba za Pade Lotu ne mana iri vatupia vari vatatana Batu ria patere ro mana vano iri zazu tavise ia, iri koru qira vano kazigarata na Jiu go tarina kameka teṉo pepeu, goto nae iri vazao seko e de iri koego vano iri miasoka go bara ne, go tarina lulu qira me ria apostoloro ne de iri koego.

²²Do ṉalu vano tavine dena iri za dokae bara ne, iriki za mia qira kaega apostoloro ne, iago iri ule za de iri koego vano batubatu ro iri pepeu go, mana iri za sine,

²³“Ṉalu qi za dokae bara ne, qi mia i kokoqu vanadu, mana vano irimiasoka go bara ne iri ko so taru, do ṉalu qi papaqa go siporaṉa ne, qiki mia ze kaega ka basoe loborona bara ne.”

²⁴Ṉalu batu ria patere ro mana valeke ni miasoka go pade lotu ne iri gata go seko ni gogo ne, iri va zazao nanaoqira, avana to i doka qira go apostoloro ne.

²⁵Gonae kaki basoe i za keba me mana i sine ne qira, “Gata! Basoero qamu taru qirae go bara ne, iri za koe Pade Lotu ne, mana iri vatatana qira basoero ne!”

²⁶Gonae kaki valeke batu i lulu qira basoero ia, mana iri za lulu vaule qira apostoloro ne. Iriki za toqo qira kaega, tanego iri sareki ne qira basoero, niki go vana qirae ipaka ne, iri go.

²⁷Iri lulu vakeba qira apostoloro ne, de iri teṉo pepeu ego, mana iri vadegere qirae tarakenaqa qira vano pepeu, mana batu ria patere ro ne i sine ne qira.

²⁸“Remu qi teke ne qamu tamana makuru dena, muniki ara vari vatatana ne vitoṉo na valeke nae, do mia pata ro qamu zazu nego! Ramu qamu vagoe lupo ze vari vatatana ramu loborona ro Jerusalema, mana qamu soko ne vapala qemue remu, le na valeke nae.”

²⁹Pita mana kero ne apostoloro ne iri vataule, iri go, “Remu timuna vaogote so God, basoe kaega.

³⁰God iri vazaka bana go vanovano bana ita ro, i va too ze Jesu tepa le, taramuzina ramu qamu vae vale go ia qamu paqipaqi ze ia koluse ne.

³¹God i pala vapopoka ze ia tepa matauna, mana i Batu na vari vakavele, go tina teke qira vano Izirel kavala, go tarina nanao ule mana vasakata pata ro ria tina talupasa.

³²Remu to qi seko ne go pataro dena, mana Spirit tabo, go. Spirit tabo iato i sosovolomo ia God, de iri koego vano iri vaogote go ia.”

³³Ṉalu vano iri teṉo pepeu go, iri gata go seko ro dena, iri lete muma sasakata, iago iri soko mara vae vale qira apostoloro ne iri go.

³⁴Do kaki kameka ria, valeke Parisio, vitoṉona Qamalia, ia i kakia valeke vari vatatana na Tamana, mana basoero ne iri mia vamazale ia. I degere loborona de pepeu ne, i sine ne qira vano iri miasoka qira apostoloro ne mara vasiporo qira tekere,

³⁵mana i sine ne qira vano iri pepeu go, “Basoero na Izirel, nanao velake tekere, de tamuna vane qira go basoero dena.

³⁶Qamu nanao tarua Teudasi, ni lama sadaka ṉalu bana ne, ia igo i kaki valeke batu, mana torana vasivasa basoero iri lulu ne ia. Do kakia ro basoero iri vaevale ia, osiqira basoero iri lulu ne la iri soso vari paqae lupo, mana zazu ia i lama lupo.

³⁷Taramuzina nae Jiudas na Qalili i lama sadaka torana ṉalu iri qana qira go basoero ne, i pala qira topu basoero iri lulua ia, do kaki ria iri vae vale napua ia, mana osiqira basoero iri lulua go ia, iri soso vari paqae lupo go.

³⁸Igoto nae ia tane qa sine ne qamu go, kasi zazu ne na kaki pata de iri koego basoero dena. Taru qira so! Ṉalu go pata iri vato ne mana zazu ne i reqe me de i koe basoe, tinara za kaega so,

³⁹do ṉalu i za reqe me dekoe God, i makuru qamu tamuna sivala ne qira basoero nae iago muna miasoko, muni sigo vari tara eso de ikoego God!” Basoero iri teṉo ne pepeu ne iri lulua to nanao ia Qamalia.

⁴⁰Iri koru vakeba qira apostoloro ne, iri sima qira mana iri sine ne qira, muniki ara seko ne vitoṉona Jesu iri vane qira, goto nae iri va talupasa qira.

⁴¹Pasi ria apostoloro ne iri kasi ne qira vano pepeu ne, iri lete kula, tanego God i vine qira tarina pala kimata tanego i sauna zazu ia Jesu.

⁴²Mana osina musaqara, loborona Pade Lotu mana pade ro ria basoero go, iri pala soma so vari vatatana mana tarama ne na Tarama Velaka na Jesu ni Mesia go.