Read Varisi Zazu Ria Apostoloro 6 Bible Online

Zazu Ria Apostoloro 6 - Varisi bible

Zazu Ria Apostoloro 6

¹I umata a qe desuka, basoero iri vaogote go Jesu iri topu ziki, gonae vari va legu, i koe loboro qira vano Qrik iri seko va Jiu, mana vano ogotona Jiu go. Vano Qrik iri seko va Jiu go iri go, “Ramu qamuki tavisi ne qira so kaega qolero nanaro ro remu, ṉalu qamu soso ne go pata gege mana kesa nogotona musaqara, de iri koego vano iri ko makuru go.”

²Iago ria manoga karua apostoloro ne, iri koru qira osiqira ria iri vaogoto go, mana iri sine ne qira, “Iki totoloṉo kaega ṉalu go remu timuna vana ne tarama ne na seko ia God mana pala tarua go va zazu na kesa ba kenakena na pata gege go.

³Iago turaquroe, muna vine kavitu basoe loboro qamu, ke qamu rove iri purake go Spirit tabo mana tarove, go remu timuna va kenaqa qirae go miasoka na zazu ro dena.

⁴Remu tanuqemu ne, timuna teke ne ṉalu remu pepene de i koe God mana vatatavatana Tarama Velaka ne.”

⁵Osiqira ne iri lete kula ne pata iri sine go apostoloro ne, iago iri vine Sitivini valeke i kone vaogoto mana Spirit tabo go, Pilipi, Prokorus, Nikano, Timon, Pamenas mana Nikolasi, valeke na Antiok, i lama ko gere qira vano Jiu.

⁶Iri vazao qira taravitu dena, de iri koego apostoloro ne, ria iri pene mana iri sapu ze karisi qira kuzuku qira mana iri vatabo qira go.

⁷Mana seko ia God, i zadava mana zaza popoka napu. Topu qira ria disipoloro iri koego Jerusalema iri lete topu ziki, mana topu ria vano Patere ro iri toqe napu ne vaogote na Jesu.

⁸Sitivini kameka valeke God iva makaole ia, mana i purake ne karaputa, iva sadake topu na zazu mazala ro mana zazu vari vapoloso ro, de iri koego basoero ne.

⁹Do kakia ro basoero na pade teṉoteṉo ria vano Jiu, iri valegua ia, ria dena iri vitoṉo qira e, vano talupasa ria to basoero na Saerina mana Alekzadaria. Ria mana kakia ro napu vano Jiu iri reqe me kena Silisia mana Esia go, iri vari valegue de ikoe Sitivini.

¹⁰Do Spirit tabo ne iva tarove Sitivini, tanego ṉalu i seko go ia, i makuru qira tarina vataule ne ia.

¹¹Iago iri voli pika qira kakiaro basoero, go tarina sine, “Remu qi gata valeke dena i seko vasakate Mosese mana God!”

¹²Sauna to seko ro dena, iva ṉiṉiri qira basoero, vano kazigarata, mana vano vari vatatana na Tamana. Iri pala Sitivini mana iri vazao ze ia de iri koego vano vivine.

¹³Gonae iri vakeba qira kakiaro valeke ro, go tarina lama sine seko poqe sauna ia, iri go, “Valeke dena,” i poro seko vasakate Pade Lotu tabo ita mana Tamana ro ia Mosese go.

¹⁴Remu qi gata i sine, iato Jesu na Nazaret tina vasakate go pade lotu ne, mana tina kavale osina vatovato ṉalu bana ro ita, i reqe bana me de koe Mosese.”

¹⁵Osiqira vano iri koloku pepeu go, iri reṉa vale lupo neso Sitivini, mana iri mia tarakenaqanu i gere so tarakenaqana aqelo ne.