Read Varisi Zazu Ria Apostoloro 7 Bible Online

Zazu Ria Apostoloro 7 - Varisi bible

Zazu Ria Apostoloro 7

¹Batu ria Patere ro i tana ne Sitivini, “Avigo i ogoto tane pata iri sine go ria nae?”

²Sitivini i vataule igo, “Turaquro, mana mamae ro, gata va era! Tarakenaqana go ia kazigarata ita Abra-am iara za koego Aran, damara na tatavata mazala ia God i sadake ia tepa Mesopotamia,

³mana i sine ne ia, ‘Kasi ne vanovano ro aro, vudu aro mana zae pua tuna va mia goe era,’

⁴Goto nae Abra-am i kasi ne vudu ia Kaldia mana i za koe Aran, taramuzina i le tamana Abra-am, God iva ziki napua Abra-am mana i taru zeto pua qamu koego to ramu ninidena.

⁵God iki teke kaega pua Abra-am, desuka takoboro na do, kaega so, do God i pui ne tina teke ne ia, iato tina ke ia mana ria popodo ia, torana ṉalu God i zazu nego pui dena, Abra-am i kaega ne sale.

⁶Iato dena seko ia God dekoe Abra-am, ‘Popodo ria salesalero aro, tarina za koe vudu kakavata, de gogone tarina va seka qira mana vasasakata ne qira go, torana vasivasa ave.

⁷Do era tuna vakimata qira basoero iri za seka ne qira go, taramuzina nae, era tuna vasiporo qira e vudu iri koe go, mana tarina lama vazaka ve era pua dena.’

⁸Gonae God itekene Abra-am zazu na kosi, gerena lala na vari toqe voru riru God mana Abra-am. Iago Abra-am i kosia Aisak taramuzina kavitu musaqara podo i vae go, Aisak i kosia Jekop, mana Jekop i kosi qira ria manoga karua salero ia, ria to vanovano mazala ro ita.

⁹Salesalero ia Jekop iri qora ne kaeqira Josepo, gonae iri volivoli ne ia, mana iri za va seka ze ia Izipito. Do God i ko tavise ia,

¹⁰mana God i va kavele ze ia osina pata makuru ro. Ṉalu God i teke ne Josepo vatovato velaka mana tarove, batu lavata na Izipito i va batu ze Josepo miasoka na vudu ia mana patapata na ro pade ia.

¹¹Gonae kameka saqo lavata i dokae Izipito mana Kenan, i lete vako makuru qira basoero ne. Vanovano bana ita ro ne, i makuru qira soba na pata gege,

¹²ṉalu Jekop i gata pata gege i koe Izipito, i vazao qira salero ia, ria to vanovano bana ro ita, kenaqana to zaza ria tepa Izipito.

¹³Loborona varuana zaza ria, Josepo iara varove qirae tanuna de iri koego togana ro, mana batu lavata na Izipito i rove napu qira to basobasoero ia Josepo.

¹⁴Iago Josepo i sine ne qira togana ro, za sine ne mamae Jekop, osiqamu mana basobasoero ramu, muna lamae Izipito. Topu qira ne vituṉaulu kalima ria.

¹⁵Goto nae Jekop mana basobasoero ia iri bori za to Izipito, de igogo ne iri za koe to Jekop mana salesalero ia iri za le go.

¹⁶Tokama qira ne, iri pala vazao ze Sekem, iri za vou qirae bolu i voli bana ze topu na kesa Abra-am de iri koego ria sinaqe ia Amo.

¹⁷I lama garogaro to ṉalu God tina va voto go pui ia dekoe Abra-am, topu na basobasoero ita iri koego Izipito ṉalu nae, iri lete topu sasakata.

¹⁸Taramuzina nae kameka batu lavata voru i degere napu i miasoka go Izipito, mana batu lavata igogo ne, iki rove kaega Josepo.

¹⁹I va bulaṉoe qira kazigarata ro ita mana i vasasakata ne qira go, i va tutubo qirae basoero ne tarina taru qirae sale medara ro pekaro ne, go mara ria saqo mana le go.

²⁰Torana to ṉalu nae Mosese i podo go, i kameka sale menomeno. Sinana i miasoka ze ia komala iri koego torana kapisa inaqa,

²¹mana ṉalu sinana i va kasi ne ze komala sale ne, i roku ze koko mana i va zale ze besi. Sale qole ia batu lavata ne i soqe ia mana i penesia ia, i va lavate mana i vagere ze sale ia.

²²Iri vatatana ze ia osina to tarove ria vano na Izipito mana i kaki basoe lavata loborona seko ro ia mana zazu roiago.

²³Ṉalu Mosese i vasiṉaulu to ave na, ia i nanao mara za mia pada qira basobasoero ia vano Izirel de iri vane qira go.

²⁴I mia igo Mosese kaki kameka valeke na Izipito i vae vasakate kaki kameka valeke na Izirel, iago i za tavisi ne basoena sinaqe ia mana i vae vale valeke Izipito.

²⁵I nanao basobasoero ia kadego tarina mazala so nanao rove na, tanego God tina vazazua ia, go tina vakavele qira, do iriki nanao rove so kaego.

²⁶Kene musaqara na ne Mosese i mia napu qiru karua valeke Izirel iru varitara tanuqiru, gonae i za go mara va bule qiru igo, ‘Gata karua valeke i vane qiru, raburu qaburu tamakena so, avigo tane qaburu varitara go?’

²⁷Do keni lete vasasakata ne go varuana ne, i tubele va kuziki ne Mosese mana i tana, ‘Akena tane ni vine go aro, go tono lama vatovato ne qaru go raru?

²⁸Avigo qo soko vae vale ava era, gerena qo vae vale go valeke na Izipito zakone ba?’

²⁹Pasi Mosese i gata soba seko dena, ia i kasi ne Izipito mana i za koe pua na Midiam, iza koe de igogo ne, i za busi mana i kone karua sale valeke.

³⁰Taramuzina vasiṉaulu ave i sivala, kameka aqelo i lama sadake Mosese loborona nako i subi ego moki tepa ulana ne, garogaro na Kubolo Sinae.

³¹Mosese i lee nureke ne pata i mia go, i za garogaro go mara mia velake igo, do i gata soba seko na Batu ne, igo dena,

³²‘Era to qa God ria vanovano bana ro aro, God ia Abra-am, Aisak mana Jekop.’ Mosese i lete sareki mana i nenedere, iki ara vele reṉa qe kaega.

³³Batu ne igo, ‘Vakuziki ne makebotu aro, tanego de qo degere go nae, i pua tabo.

³⁴Era qa mia ko vokara mana vasasakata iri vane ne qira go basobasoero era tepa Izipito. Qa gata bana dae iri vae mego, mana qa za qoqoro me, go tuna va talupasa qira, lama to aro, era tuna turi ni go aro tono zae go Izipito.’

³⁵Mosese iato iri sine bana go vano Izirel, ‘Akena tane i vine go aro tono vivine mana vatovato ego de qi koego remu?’ iri tana ne. Iato valeke God i vine mana i turine go tina vatovato ne qira basoero ne, mana tina vatalupasa qirae Izipito, mana aqelo i sadaka ze go ia moki i subi go, tina tavisi ne ia.

³⁶I lulu vasiporo qira basoero ne tepa Izipito, i vasadaka me zazu mazala ro mana pata vari va poloso ro loborona Izipito mana tepa masi mesara, loborona vasiṉaulu ave zaza iri vaego tepa ulaṉe ne.

³⁷Mosese iato i sine ne qira vano Izirel, ‘God tina turine qamu me kaki propeta, gerena so i turi nava go era, mana propeta ni gogo ne, tina kaki basoe na so sinaqe ramu.’

³⁸Mosese iato i ko tavisi qira basoero na Izirel iri teṉo e ulana ne, i ko tavisi qira me vanovano bana ita, mana aqelo i seko tabe ze ia Kubolo Sinae mana iato i pala mego tarama too ia God i ara teke ne qita go ita.

³⁹Do vanovano bana ro ita, iriki vaogote so kaega ia, iri tubele va kuziki ne ia, mana iri soko mara ule za Izipito iri go.

⁴⁰Iago iri sine ne Aron, ‘Zazu ne qemu remu kaki god, beku go tina kenaqa ne qemu go. Remu qiki rove kaega kapata i doka go Mosese, ni lulu va siporo bana qemue Izipito.’

⁴¹Igo nae ia, iri zazu ne beku, iri va gere ze tatalina buluka, iri komakoma ne mana iri zazu ne kelo sauna vazakazaka na pata iri zazu ne tanuqira.

⁴²God i tabali kakamu ne qira, mana i teke ne qira domiri ro na rani ne tarina vazaka go, gerena so ni karo bana e go buka ria propetaro, ‘Basoero na Izirel! Iki era kaega tane qamu vaevale mana komakoma ne go pata qaraqara ro ramu, torana vasiṉaulu ave loborona de i ulana ne ikaego pata podopodona ne.

⁴³Iato pade vavarere ia god Moleki tane qamu vagore go, mana beku na Repian, god domiri ramu, pataro nae i beku so, tanego qamu zazu neso tanuqamu go tamuna vazaka go. Mana iato go era tuna vakasi ne qamue komala ramu mana vazao qamue Babiloni.’

⁴⁴Vanovano bana ro ita, iko ne qira pade vavarere ria loborona zaza iri vaego de ulana ne, i va padapada na God i kotavisi qira. Iri zazu ne gere na so God ni sine ne Mosese, iri va lulu ze so de na gogo, igo Mosese, gerena so deni vasadake, God.

⁴⁵Taramuzina nae, vanovano bana ro ita, iri pala vakava napua, pade vavarere de iri koego tamaqira ro, iri pala zaza ne so, ṉalu iri lulua go Josua, mana iri pala vakava ze pua ria kaki sinaqe kakavata, tanego God i va kuziki kenaqa bana qirae pua ni gogo ne, mana i ko, go i doka so lama ko i vae go Davita.

⁴⁶God i kula ne Davita mana Davita i pene God go mara vamao ne, go mara zazu ne de pade koko ia God ia Jekop.

⁴⁷Do Solomon so ni ara vadegere Pade ia God.

⁴⁸Do God i lete zakazaka sivala go, iki koe kaega pade ni zazu nego basoe, gerena so i sine go,

⁴⁹‘Rani to, i de ko va batubatu era, igo Batu ne, mana pua dena ne, i de kubekube era. Ava pade na tono zazu nava go era? Ade to tuna koego era?

⁵⁰Avigo iki era kaega tane qa vazaria go pataro dena?’ ”

⁵¹Igo Sitivini, “Ke vano kuzuku lavata ro! Avigo to ka rodoko na puṉuqamu, avigo to ka ikiki qamu ramu sauna gata na tarama velaka ia God, qamu gere qira so vanovano bana ro ramu, ramu napu to go qamu kasi vaogote na Spirit tabo.

⁵²Avigo i ko kaki propeta iriki vasasakata ne kaega vanovano bana ramu? Iri vae vale qira vano palapala seko ia God, ṉalu iri tarama ne lama na kameka Tuna, mana ninidena ramu to qamu vabesa ne mana vae valeiago.

⁵³Ramu to qamu pala go Tarama Velaka ia God, iri teke qamu go ria aqelo ro, do ramu qamuki vaogote so kaega.”

⁵⁴Vano iri koego loborona pepeu ne iri gata seko ro ia Sitivini, iri lete muma sasakata.

⁵⁵Do Sitivini i purake Spirit tabo, i reṉa qe rani ne mana i mia damara na tatavata mazala ia God, mana Jesu i degere tepa matauna God.

⁵⁶“Mia!” igo Sitivini, “Era qa mia rani ne i papaqa mana Tuna basoe, i degere tepa matauna God!”

⁵⁷Ria iri koego loborona pepeu ne iri koru valavata iri poso qeqele qira, goto nae iri teteṉe za de ikoego Sitivini,

⁵⁸iri toqo raqase mana iri vana zaqe ia pekapeka na komala lavata ne, mana iri vana ze ipaka. Ria iri vatupia go vana ze ipaka Sitivini, iri opise roku vari lapo ria, mana iri va miasoka ze Kaki valeke gavere vitoṉona Sol.

⁵⁹Iri vana taru ze ia ipaka ne, Sitivini i koru valavata qe de ikoego Batu ne, “Batu Jesu pala zatu madau qu!”

⁶⁰I koloku tutuṉu mana i dae valavata, “Batu e, oniki nanao tarua vasakata pata dena de iri koego.” I sine to seko dena mana iara le go.