Read Varisi Rom 11 Bible Online

Rom 11 - Varisi bible

Rom 11

¹Iago, qa tana, Avigo God iki soko qira kaega basoero ia Izirel ba? Kaega! Era tanuqu do qa basoe Izirel, qa reqeme kaki kameka popodo basoe ia Abra-am mana qa basoe na sinaqe ia Bejamani.

²God iki vana ne qira kaega basoero ia i vine bana me qira go kokoso name. Ramu qamu rove pata i sine go Buka tabo de ni sine ze go seko ia Ilaiza i vasadake go keburo ia vano Izirel.

³Ia igo, “Batu, iri vae vale lupo bana qira to propeta ro aro, mana iri pero sara ro aro go. Era tanuqu so qa ko sivala go, do iri soko napua so vae vale ava go.”

⁴Avana to i vataule ne go, ia God? Ia igo, “Era qa soti banaṉava tanuqu vituṉaulu mao basoero iriki vazaka go kaega Bal ni god poqe go.”

⁵I vari pada so ṉalu ninidena. Kavia napu so ria iri ko sivala go vano i vine bana qira go God. Tanego i lete lavata sivala Mana ia de iri koe go.

⁶Vivine ia i degere vari nanao, do iki reqeme kaega pata iri zazu ne go. Ṉalu Mana ia tara degere go pata iri zazu ne go basoero ne, tara gogo nae Mana ia tariki ogoto kaega.

⁷Ia dena, i talukase, vano Izirel iriki soba so kaega pata iri taqia go. Kavia ria so vano i vine qira go God iri soba go. Do ria kero ne iri lama gata pata to kaega.

⁸Gerena Buka tabo ne i sine bana go, “God iki va zazaovaloda kaega nanao gira mana puṉuqira go tarina nanao rove go pata. Mana qeqele qira iki gata pata kaega go.”

⁹Davita napu go, i sine vane napua so dena, “God ono vanato qira ṉalu tarina koloku nego kelo lavata ro ria, ono va soru sakata qira mana vakimata qira go.

¹⁰Ono va kodo mataqira, go mara ria kasi mimia. Mana ono vakimata qirae soso adoado na makuru ro go.”

¹¹Iago era qa tana, avigo soru sakata iri vae go nae iri lete sakata zato ba? Kaega! Do tanego iri zazu ne pata sakataro, iago God i vakavele qira vano iriki Jiu go kaega, go mara qora vano Jiu igo.

¹²Vasakata pata ria vano Jiu nae to i valame go makaolo de iri koego vano na vudu pua, mana situ na madau qira vano Jiu, God i valame ze makaolo de iri koego vano iriki Jiu go kaega. Iago ṉalu vano Izirel tarina taleqe ule mego de ikoego God, tina lete lavata sivala to makaolo tina lamae go de qata koego.

¹³Era qa seko atu ninidena de qamu koe go ramu vano qamu ki Jiu go kaega. Era qa lete vazaka ze God zazu era qa zazu ne go, tanego era to qa tavine ne go tuna apostolo ne qamu ramu vano qamu ki Jiu go kaega.

¹⁴Kadigo era qa va qora qira basoero na sinaqe era tanuqu sau qamu ramu, ianae ne era qa soko go kakia ro ria mara vakavele qira God qa go.

¹⁵Tanego ṉalu God iki soko qira go kaega vano Jiu, God i va kameka napu ze tanuna de iri koe go vano na vudu pua. Iago avana to tina sadaka go ṉalu tina toqe napu ne qira go?

¹⁶Ṉalu tapasina bureri iri tavatavara ne zaqe God, tutukununa bureri nae ne ike ia to God, mana ṉalu rabutuna ro moki iri teke ne zaqe go God, paqarana ro moki nae do ike ia napu so God go.

¹⁷Ramu to vano qamu ki Jiu go kaega qamu gere go moki olivi piru ne, do ṉalu ninidena ramu qamu pala tavise to vavagadona too velaka i reqeme go vano Jiu.

¹⁸Iago ramu muniki mia sila qira ria iri tavarasa gere go paqarana moki olivi nae. Kaega napu ka pata tamuna vazaka napu ne go ramu. Tanego, ramu kaega qamu vanadua go rabutuna moki olivi ne, do rabutuna so nae i vanadu qamu go ramu.

¹⁹Do kadi go ramu tamuna go, “Paqara na ro dena iri tavarasa, gogo tina zari ne qemu remu de timuna koe go tamuna go.”

²⁰Ianae i pata ogoto God i varasa vakaziki ne qira go ria, tanego iriki vaogoto kaega. Iago ramu to gamu somae go moki olivi nae, tanego qamu vaogoto. Do muniki vazaka napu ze nanaoqamu sauna ianae, do, muna miasoka qamu.

²¹Tanego God iki taru sivala qira kaega vano Jiu ṉalu iriki vaogoto go kaega, iago qamu nanao God tina taru sivala qamu ṉalu qamuki vaogoto go kaega?

²²Ianae qata mia zaqe de igogo God i vari nanao mana i vari vakimata napu so go. God i vakimata qira ria iriki lulua go kaega vatovato ia. Do ṉalu ramu qamuki lulua go kaega, ia tina vatavarasa vakuziki napu ne qamu so go.

²³Mana ṉalu vano Jiu iri ule napu mego to vaogoto iri vana ne go, iri mazala to ko ule napue to de iri ko banae go. Tane go God i kone karaputa tina taru vaule napu me qira go ria.

²⁴Iago ramu vano qamu ki Jiu go kaega qamu gere paqarana moki olivi piru i tavarasa bana go. Ramu vano Jiu to gamu gere go moki olivi iri leba go. Mana God i malumua so tina soma vaule zaqe paqarana moki olivi ni tavarasa banae go moki ogoto na ne.

²⁵Turaquro, qa soko varove qamue ramu, kameka pata pipika dena, go tina tavisi ne go nanao qamu. Sauna iri ki soko go kaega, gata na pata vano Izirel nae ne, tina zaza so, go tina ko za doka so ṉalu vano iriki Jiu kaega, ni vine bana qira go God tarina lamae go de ikoego.

²⁶Mana de go tarina lama kavele go vano Izirel i sine ze go Buka tabo ne God, igo dena, “Basoe tina va kavele qira go ria tina za reqeme Zaion, mana tina vakuziki ne to vatovato sakata ireqe mego basoero na sinaqe ia Jekop.

²⁷Ṉalu nae era tuna vanadua seko na vari toqe era de iri koe go, go tuna vakuziki ne go vasakata pata ria ne.”

²⁸Tanego iri kasi qira toqe ne na Tarama Velaka ia ne. Iago vano Jiu iri kana ia God, mana sauna ianae i tavisi ne gamu to ramu vano qamuki Jiu go kaega. Do, tanego God i vine bana qira iago, ia i vari va kitakie so de iri koe go, sauna pui bana ia de iri koe go kazigarata bana ro ria ne.

²⁹Tanego ṉalu God i vine go basoe, mana i teke ne vatabo ia gogo ne, God iki ara kavale kaega nanao na.

³⁰Iago ṉalu i lupo bana mego ne ramu to qamu legulegua go God, do tanego vano Jiu iri legulegua God, iago God i nanao ule ne gamu to ramu.

³¹Mana i gerena napu so ramu qamu pala go nanao ule ia God, iago vano Jiu iri legulegua God, ṉalu ninidena ria tarina pala napua so vari nanao ule ia God.

³²Tanego God i vakimata napu qira so basoero iri legulegua go mana taramuzina iara vasadaka ne qira go nanao ule ia de iri koego.

³³God i velaka sivala so de iri koego osina basoero ne, mana tarove ia i lete lavata sivala, mana i kone nanao rove lavata sivala go. Kaega ka basoe i mazala go sine lukase na vivine ia mana kaega ka basoe i mazala go nanao rove go vatovato iago.

³⁴Gerena i sine go Buka tabo ne, “Akena i rove go nanao na God? Akena i mazala go teke ne na ia nanao rove go?

³⁵Akena i teke bana ne go God kaki pata, go God tina teke vaule napu ne go ia kaki pata.”

³⁶Tanego osina pata i vazari me so ia, mana osina pata iri sadakae so loborona karaputa ia, mana osina pataro dena iri patapata lupo ia so God. Iago ita mata vazaka God osina ṉalu topuro ne! Amen.