Read Varisi Rom 15 Bible Online

Rom 15 - Varisi bible

Rom 15

¹Ita i karaputa go vaogoto ita mata tavisi ne qira, vano i memelaka go vaogoto ria, sauna papala maqata ro ikoe go de iri koe go. Mata kasi nanao na so tanuqita.

²Do osiqita mata zazu ne pata tina tavisi ne qira turaqita ro sauna velaka qira ria, go tina zaza popoka go vaogoto ria.

³Tanego Kristo iki zazu ne so kaega pata ni tavisi ne go tanuna. Gerena Buka tabo ne i sine bana go, “Seko sakata ro iri sine vasakata zigoe aro, iri vasakata zave so era.”

⁴Osina pataro iri karo bana ze go Buka tabo ne i sauna go mara varove qitae ita, go tatana pala ze go ruruqe loborona ko noto, piri ita mana i vakaraputa napu qitae pata ro ni pui ne qita go God loborona Buka tabo ne.

⁵Vatovato na ko va karaputa na nanao mana ko nonopa kaega gogo ne, ireqeme so God. Iago qa pene God go mara vakaraputa ko kameka ramu, tanego ramu qamu lulua Kristo,

⁶go osiqamu muna kameka vazaka God Tamana Batu ita Jesu Kristo.

⁷Muna vari va velakae tanuqamu, gerena Kristo i velaka banae go de qamu koego, go basoero ne tarina vazaka go God.

⁸Sauna go qa sine ne qamu go, tanego Kristo ilama zazu ne tavisi qira vano Jiu, ivasadake va vaogoto ia God, go tina lama ogote go pui ia de iri koe go kazigarata ro ria ne.

⁹Mana tina vamazala napu qira vano iriki Jiu go kaega go tarina vazaka God sauna manava ia gerena i sine go Buka tabo ne, “Era tuna vazuka zigoe aro God vari lobori qira vano iriki Jiu go kaega, mana tuna kera vazaka ze vitoṉomu aro go.”

¹⁰Isine napua igo dena, “Kula ramu vano qamu ki Jiu go kaega muna kula tavisi qira basoero ia God.”

¹¹Mana igo napu dena, “Muna vazaka God osiqamu vano qamuki Jiu go kaega, mana osiqamu basoero na kolaba ne, muna vazaka napua so iago!”

¹²Isaia napu to, igo, “Kameka valeke tina reqeme sinaqe ia Jese, mana valeke dena to tina lama kenaqa ne qira go vano iriki Jiu go kaega, mana iato tarina taruze 3 go ruruqe ria basoero ne.”

¹³Go God ikutama ne go ruruqe mara vapuraka ze puṉu qamu kula kula mana bule i reqeme go vaogoto ramu de ikoe go ia, go ruruqe ramu mara popokae loborona karaputa ia Spirit tabo.

¹⁴Ramu turaquro, era qa nanao vaogote ramu qamu pala to vatovato velaka, go qamu tarove ne go pataro, mana go qamu mazala go vari vatatana napue na deqamu koe go tanuqamu go.

¹⁵Do loborona leta dena qa soko vakaraputa ne qamu kavia pata lavata ro qa soko muna nanao tarua ramu qa go. Tanego sauna zazu ia God iteke bana nava,

¹⁶go tuna kaki kameka basoe zazu ia Jesu Kristo sauqira vano iriki Jiu go kaega. Era qa zazu ne ia gerena kameka patere qa tamana ne go Tarama Velaka ireqe me de ikoe go God, go ia vano iriki Jiu go kaega tarina tabo gerena kaki sosovolomo iva kula go God ireqeme Spirit tabo.

¹⁷Loborona ko vakameka era de ikoe go Jesu Kristo, era qa lete vazaka napu ne zazu era de ikoe go God.

¹⁸Do tuna seko vakaraputa ne so sauna pata izazu nave go Kristo, go tuna kenaqa ne qira vano iriki Jiu go kaega go tarina vaogote go God. Ia izazu ne ze pataro dena loborona to karaputa na soko ro era mana zazu qa zazu ne go era go.

¹⁹Ia ivazazua karaputa na lala mana pata vari vapoloso i palua go karaputa ia Spirit tabo. Iago, osina dia qa zae go, reqe Jerusalema za dokae Ilirikam, qa vasadaka lupo ze tarama velaka ia Kristo.

²⁰Soko ogoto rera ne, qa soko tamana vasadaka ze komala iri koe go basoero iri ara kaebo go gata na Tarama Velaka ia Kristo, go ma kasi zazu napue na de i vadegere bana zego eklesia kakia basoe qa go.

²¹Gerena Buka tabo ne i sine go, “Ria iriki sine bana ne qira go kaega tarinara za mia to, mana ria iriki gata bana go kaega tarinara za gata rove to go.”

²²Iato zazu ro dena tane imidiki nava era go qaki garetu mia qamu go kaega.

²³Do ninidena qa valupo to zazu era loborona kena dena, mana topu ave ilupo bana za go, qa nanao bana so era tane garetu tove qamu.

²⁴Iago ninidena qa nanao to garetu tove qam ramu, mana ko varikitakie na de qamu koe go ramu. Taramuzina to garetu era nae, era tuna zaza, za dokae to vudu Spen. Iago zaza era nae qa soko qamu ramu mana tavisi nava, go zaza era tuna za dokae go Spen.

²⁵Torana dena era tuna za kenaqe Jerusalema, mana za teke ne qira kesa tavisi de iri koe go basoero situ ia God iri koe go Jerusalema.

²⁶Tanego vano lotu iri koe go Akaia mana Masedonia iri zazu bana ne to kesa nanao ria go mara tavisi ne qirae basoero situ ia God iri koe go Jerusalema.

²⁷Nanao ria dena ireqeme so de iri koego tanuqira, go iri zazu ne go pata dena. Do itora to, tanego vano situ iri koe go Jerusalema iri tavisi bana ne qira ria. Tanego vano Jiu iri teke kenaqa bana ne qira vano iriki Jiu go kaega pata velaka go tina vamaokolo qira go. Iago vano iriki Jiu go kaega iri tekene ne qira ria pata tina tavisi ne qira go ria pua dena.

²⁸Ṉalu tuna valupo to zazu ro dena, mana za teke ne qira to ria kesa iri qoqone go qa pala ne qira go dena, era tuna tasibaka ne to zae ne Spen, mana ṉalu nae to tuna garetu tove sivala ne qamu go.

²⁹Qa rove, garetu era de qamu koe go ramu, era tuna pala ne qamu osina makaolo velaka sivala ia Kristo.

³⁰Turaquro, qa pene vakaraputa qamue de ikoego Batu ita Jesu Kristo, mana mamaligara go. Iago muna tavisi navae pene ro ramu de ikoe go God, go tina tavisi nava go.

³¹Pene raramu to tina tavisi nava go era, go tariniki vasakatatava go kaega vano Judia iriki vaogoto go kaega. Pene napu ne qira basoero ro ia God iri koe go Jerusalema go mara ria kula ne zazu ro mana kesa ria qa pala ne qira go era dena.

³²Ṉalu i soko ia God, era tuna garetu mia qamu mana garetu kotavisi qamu go.

³³Iago, era qa pene God ireqeme too bulebule qata pala go mara kotavisi qamu osina ṉalu topuro ne. Amen.