Read Varisi Rom 16 Bible Online

Rom 16 - Varisi bible

Rom 16

¹Era qa soko qamu muna vamazale vavani qita Pibi i zazu, tavisi ne qira vano na eklesia ikoe go Kenikeria.

²Muna vakitaka ze ia loborona vitoṉona Batu ne gerena basoero ia God itora go tarina zazu ne go. Muna teke ne ia ka tavisi isoko zego de qamu koe go. Tanego ia i tavisi velaka ne qira basoero ne, mana i tavisi napu nava era go.

³Era qa vazao napu ze seko kula era de iru koe go Akuila mana Prisila iru zazu tavisi ava sauna Jesu Kristo.

⁴Iru vele le neto sauna tavisi riru de qa koe go era, iago era qa lete kula sivala ne to era de iru koe go riru, mana igo napu to vano lotu iriki Jiu go kaega go.

⁵Seko kula napu era izae de iri koe go vano Lotu iri lama teṉo tarue go loborona pade riru go. Mana qa seko kula napue de ikoe go vakitaka era Epaenetus, valeke kenaqa i vaogote go Kristo vudu na Esia.

⁶Kula napu era de ikoe Maria ni lete zazu vokara ne qamu go ramu.

⁷Seko kula napu era de iru koe go Adronikas mana Jiunas karua vakitaka era qimu vano Jiu iru kotavisi vae bara ne. Ria apostoloro ne iri rove va velaka qiru, tanego iru karua basoe zazu ia Kristo mana iru zazu kenaqa nava era.

⁸Seko kula iza napue de ikoe go Ampiliatus vakitaka velaka era, qaru vari va kamekae go de ikoe go Batu ne.

⁹Seko kula napu era de ikoe go Ubanus izazu tavisi qitae loborona zazu ia Kristo, mana de ikoe napue go vakitaka velaka era Stakis.

¹⁰Seko kula era de ikoe go Apeles i vanadu ze go vaogoto ia de ikoe go Kristo, mana kula napu atu de qamu koe go ramu koko ia Aristabilas.

¹¹Kula napu atu deqo koe go aro Erodioni basoe Jiu igere ava go tanuqu. Seko kula atu de qamu koego ramu turaquro lotu qamu vaogote go Kristo loborona koko ia Nasisas.

¹²Seko kula napu era de qaburu koe go raburu Tripaena mana Triposa karua qole qaburu zazu ne go zazu ia Batu ne, mana de ikoe go vakiataka velaka era Peresi qole izazu vokara ne go sauna Batu ne.

¹³Seko kula era qa vagaretu napu ze de qo koego aro Rupus, i basoe velaka i degere ne to zazu nena Batu ne, mana de ikoe go sinana ilete soti va velakava era, mana ivagere veto sale ogoto ia ne.

¹⁴Seko kula napu era de iri koe go Asiqiritus, Pligon, Emesi, Patrobas, Emas mana osiqira turaquro lotu iri kotavisi qira go.

¹⁵Seko kula de ikoego Piloloqus, mana vavanina iko napue go Olempas, mana osiqira basoe ia God iri ko tavisi qira go.

¹⁶Muna varikulae napu tanuqamu gerena mamaligara na varikitaki ramu. Osiqira vano lotu ro ia Kristo iri va garetu ne qamu to seko kula ro ria dena.

¹⁷Turaquro ma sine vakaraputa ne qamu, tamana era dena. Muna miasoka qira basoero iri soko go vota na eklesia mana vaqoqore vaogoto ramu go iri vazazao kakavata go vari vatatana qamu pala bana go. Iago muniki ara gata pata ro iri sine ne qamu go,

¹⁸tanego basoero iri gogo nae ne iriki zazu tavise kaega Batu ita Kristo. Do ria nae iri lulua so nanao sakata ro ria tanuqira. Iago iri zazu ne so seko vari vagasi ro mana poqe vale qira so basoero velaka iriki rove go kaega vatovato tatakiu ro iri zazu ne go ria nae.

¹⁹Osina basoero ne iri gata bana vaogoto raramu qamu vamazale go Tarama Velaka ne. Ianae ilete vakula va era tane de qamu gogo ramu. Era qa soko muna rove va velake pata ni velaka go, do qaki soko kaega muna lulua go nanao ro i sakata go.

²⁰Tiniki umata kaega God na bule tina teke ne qamu karaputa go tamuna vaqoqore go Satana. Mana ia Batu ita Jesu Kristo tina kotavisi qamu.

²¹Timoti valeke izazu tavisi ava, i vagaretua seko kula ia, mana igo napu to Lusiasi, Jesoni mana Sosipata iri sinaqe era, tepa remu vano Jiu, iri vagaretu napu so seko kula ria dena.

²²Era Tetaesi qa karo go leta ia Pol dena, qa seko kula napu atu de qamu koe go ramu vano lotu.

²³Qaiusi valeke itaruve go pade ia dena, mana vano lotu go iri teṉo tavise go pade ia dena i vagaretu seko kula ia de qamu koe go ramu. Erastus valeke i miasoka go kesa na komala lavata dena mana vakitaka ita Kuatas go iru vagaretua seko kula riru de qamu koe go ramu.

²⁴Mana ia Batu ia Jesu Kristo ina kotavisi qamu ramu osina ṉalu. Amen.

²⁵Mata vazaka God! Iato imazala go vanaduna vaogoto, go tamuna lulua go Tarama Velaka qa tamana qamue go era. Sauna Jesu Kristo, iago, Tarama Velaka dena to ivasadaka va velaka me ze go God seko igoto i pipika bana mego ṉalu bana ne.

²⁶Do ninidena ogoto nae i sadaka me to loborona koru ria propetaro ne, mana seko ia God i too go osina ṉalu topu ro ne, i sadaka e to osina dia kolabana vudu pua go osina basoero ne tarina vaogote God mana lulua iago.

²⁷Tanuna so God ilete tarove sivala go, mana ita osiqita mata vazaka ze ia loborona Jesu Kristo osina ṉalu topuro ne! Amen.