Read Varisi Rom 8 Bible Online

Rom 8 - Varisi bible

Rom 8

¹I kaega ka basoe tina sine go ita qata kebu sauna ko kameka ita de i koe Jesu Kristo.

²Tanego karaputa ia Spirit tabo i teke ne qita too i vakameka ne qita go ita Kristo, go i lukasa qita go sauna vatovato ia vasakata pata, mana go i vae vale qita go.

³Tamana i kaega ne karaputa go tina vakuziki ne go vasakata pata, tanego too ita vano basoe i memelaka qatild lulua kaega tamana. Do God so i zazu ne go pata dena ni valame go Sale ia i lama basoe i gere qita ita, mana i pala tavise vasakata pata i vokara ne, mana i le ne go i vakuziki ne go vasakata pata ita.

⁴Tamana i kaega ne pataro dena go vatovato totoloṉo i reqeme go Tamana mara voto lupoe loboro qita ita qata lulua go spirit tabo, mana ita mata kasi luluna too na vudu pua dena.

⁵Ria iri lulua go too basoe na vudu pua dena, i kenaqa ne qira so vatovato sakata na vudu pua dena. Do ria iri lulua go Spirit tabo, nanao qira i nadue so pata ni soko go Spirit tabo.

⁶Do ṉalu basoe i lulua go too sakata ia tokama, ia tina za le ne so. Ba basoe i lulua go vatovato ia Spirit tabo, ia tinara za pala ze too, mana ko bulebule.

⁷Iago, ṉalu kameka basoe i nanao vamazale, mana i lulua go vatovato ia tokama basoe na vudu pua dena, basoe nae i kana ne God. Tanego iki nanao vamazale kaega vaogoto na Tamana ia God, mana i pata ogoto i makure to ia tina lulua go.

⁸Ria iri lulua go too sakata na tokama basoe na vudu pua dena, God tiniki kula ne qira kaega.

⁹Iago, muniki lulua too sakata i soko go tokama qamu. Do muna lulua Spirit tabo, tanego Spirit ia God i koe loboro qamu. Ṉalu basoe iki toṉove go kaega Spirit ia Kristo basoe nae iki keia kaega Kristo.

¹⁰Pata ogoto tokama tina le, tanego sauna vasakata pata. Do ṉalu Kristo i too e loboro qamu, madau qamu tina too e Spirit tabo, tanego God i vatotoloṉo bana qamue de ikoego tanuna.

¹¹God i vatoo napu me Jesu tepa le ne, iago ṉalu Spirit ia God ikoego loboro qamu. God tina teke napu ne too tokama qamu tinara za le go. Ia tina zazu ne ia dena, tanego Spirit ia ikoe loboro qamu ramu.

¹²Iago ramu turaquro, ita mata lulua vatovato ia Spirit ia God, do mata kasi luluna soko ni soko go too na tokama qita.

¹³Tanego ṉalu qamu lulua go vatovato na tokama qamu ni soko go too na vudu pua dena, ramu tamuna le, do ṉalu karaputa ia Spirit tabo go qamu vae vale ze go vatovato sakata ro ramu, ramu tamuna pala too.

¹⁴Ria i kenaqa ne qira go Spirit ia God ria to iri salero ia go God.

¹⁵Tanego Spirit ia God i teke ne qamu go, iki zazu ne kaega go tina vaseka qamu ramu, mana vasareki qamu go. Do Spirit tabo i varove qamue qamu salero ia God, mana karaputa na Spirit tabo qata koru ze go God, “Mamae! Tamaqemu!”

¹⁶Spirit ia God i vakameka ze spirit ita vano basoe go iru varove qitae go qata sale sale ro iago God.

¹⁷Ita qata salero ia God, iago ita tatana toṉove go pataro i toṉove go God ni soti ne qita go ita basoero ia, go tina vamakaolo qita, mana ita napu tatana soti tavisi ze Kristo pataro ni soti bana go ia. Tanego ṉalu ita qata pala tavise go vokara ro ia Kristo, ita napu tatana tonovo tavise kulakula na rani ne.

¹⁸Era qa nanao vaogote pataro qata makuru ne go ita ninidena iri patavolomo so, iki mazala kaega tina gere go too menomeno tina vasadaka mego God de qata koe go ita.

¹⁹Osina pataro i vazari bana mego God iri lene piri nena ṉalu God tina vasadaka mego ake ria bana tane iri salero iago.

²⁰Do pata ro dena iri za patavolomo sivala so, mana iriki soko kaega tarina za gogo dena, do i lulua nanao ia God go tina za votoe go nanao ia, iara kome go.

²¹Mana pataro nae kaki kameka ṉalu God tinara lukasa qirae karaputa ia pata i vasakata qira go, mana ria tarina pala tavise menomeno na too kulakula ria salero ia God rani ne.

²²Sauna ianae ita qata rove go i lama dokae to ṉalu ninidena, osina pata ro i vazaria go God iri zakele ne vokara gerena podona sale.

²³Do iki pataro nae so kaega iri dae go, ita vano basoe napu qata pala go Spirit tabo gerena sosovolomo kenaqa ia God i teke ne qita go, i dae napu so vokara i kome go loborona puṉu qita ṉalu qatara piri ne go God tina vatalukase go tokama qita, mana go tatana lama salero ogoto ia.

²⁴Tanego ruruqe dena to ita qata kavele banae go. Do ṉalu ita qata mia go pataro qata ruruqe go, ianae iki ruruqe ogoto kaega. Tanego kaega basoe tina ruruqe zaqe go pata ni mia bana go.

²⁵Do ruruqe ogoto nae i reqeme pata qatiki mia go kaega. Iato nae gogo qata ko piri vanadu ne go so ita.

²⁶Gerena napu so Spirit tabo i lama tavisi ne qita go, tane go ita qata memelaka. Do Spirit tabo imia go riro ita, mana ia i pene ne qitae de ikoego God sekoro imakuru qita go ita vatotoloṉona. Tanego ita qatiki rove kaega de igogo pene.

²⁷Do God i mia mego osina nanao i kome go loborona puṉu qita i rove nanao ia Spirit tabo. Tanego Spirit tabo i pene ne qira basoero ia God go ni valuluze go de ni soko go God.

²⁸Ita qata rove God izazu ne go osina pata sauna velaka ia de iri koe go ria iri mamaligara ne go. Ria to nae i koru bana qira go tarina vasadaka mego pata velaka ikoego nanao ia.

²⁹Tanego ria i vine bana qira go dena God, ria to tarina lama gere go sale ia ne, mana sale kenaqa iadena iato i toga qira go osiqira ne.

³⁰Iago ria i vine bana me qira go God, ia i koru napu me qira go i vatotoloṉo napu me qirae de ikoego tanuna, mana i teke napu ne qira too menomeno ia.

³¹Ṉalu qata nanao lulusu zaqe go pataro dena, avana mata vane to? Mana ṉalu God ikoego tepa ita, akena to go i mazala go vakuziki ne qitae go ita? Kaega to kaki basoe i mazala go.

³²God do, iki ara pala vaule kaega Sale ia, do i soso ne qita to ita go tina le ne sauna go ni bauru ne qita go ita. Gerena ia i sosovolomo ne qita to osina pata.

³³Akena to tina seko vasakata qira go basoero tavine ia God? Tanuna God to i sine vatatavata bana me, igo, iriki kebu kaega.

³⁴Iago, i mazala so kaki basoe tina seko vaqoqoro qira go ba? Kaega! Tanego tanuna to Jesu Kristo ile bana, mana i too napu me go tepa lene, mana i za koe go karisi matauna God, do iki seko vaqoqoro qira kaega, do ia i pene vakaraputa ne qitae de ikoego God.

³⁵Iago, ava patana to tina vakuziki ne qitae go ita mamaligara ia Kristo? Bana go kaki pata i lama vatutua qita, ba basoero iri lama vasasakata qita ba ṉalu qata ko saqo, ba ṉalu i doka ko sarakutu, ba ṉalu na sareki, ba ṉalu i doka qita go pata tina vae vale qita go?

³⁶Gerena pataro nae to i doka bana qita go ita go ni sine go Buka tabo ne, igo, “Saumu to aro go iri soko go vele vae vale qemue go remu osina ṉalu. Iri vagere qemue sipi iri vele za vae vale go.”

³⁷Do ita mata kasi pela nena pataro dena. Kristo i mamaligara ne qita go qata karaputa ne go pataro dena osina ṉalu.

³⁸Tanego era qa lete vaogote to, i kaega to kaki pata tina vakuziki ne qitae go ita mamaligara ia God. Patavolomo aqeloro ba kaki karaputa napu iri ko ṉalu ninidena, mana tarakenaqa i kome go.

³⁹Patavolomo kaki karaputa i kome go go zakazaka ba polana pua dena. Mana igo napu to pataro i vazaria go God, i makuru qira tarina vakuziki ne qitae go ita mamaligara ia God i vasadaka bana me ze go de qata koe go ita, Batu ita Jesu Kristo.