Read Varisi Rom 9 Bible Online

Rom 9 - Varisi bible

Rom 9

¹Pata qa sine go i pata ogoto. Tanego era qa basoe ia Kristo, iago qaki poqe kaega Spirit tabo i kenaqa ne nanaoqu mana nanaoqu i varove velaka ve qaki poqe kaega.

²I tatavata sivala maqata era, mana iki mamanava kaega vokara ikoego puṉuqu sauqira vano Jiu iri velaka qu tanuqu.

³Iago, sauqira era qa lete soko God mara vakimata va mana mara pala vakuziki nave Kristo, go ṉalu i malumu ava ria mara lama garogaro napue de ikoego God.

⁴Ria to iri basoero tavine bana iago God, mana i pala vagere qirae salero ia tanuna. Mana i vasadaka bana ne qira karaputa ia de iri koe go. Ia i vanadua vatovato ia mana i teke ne qira Tamana. Ia i varove qira de igogo tavatavara ogoto, mana iri pala bana to pui ia God go.

⁵Ria to iri reqeme go tutuluna popodo ireqeme go kazigarata bana ro ria. Mana Kristo i lama podo basoe me sinaqe ro nae. Iago osiqita mata vazaka God ia i Batu ne qita go osiqita. Amen!

⁶Era qaki sine kaega pui ia God i kebu. Kaega! Do pui ia God i voto lupo, tanego osina basoero na Izirel iriki basoe lupo ia kaega God,

⁷mana igo napu to ria iri reqeme go popodo ia Abra-am iriki basoero lupo ia kaega God. Do God i sine bana ne Abra-am, “Popodo varisoma ia Aisak tina reqeme go salero ogoto raro.”

⁸Talupasana pata dena, salero iri podoe go so zuka ia tokama, iriki salero ogoto ia kaega God. Do salero iri podo ego pui ia God, ria to nae iri salero ogoto ia God.

⁹Tanego pui ia God i sine seko dena, “Tina doka ṉalu era tuna ule me, mana ṉalu nae to Sera tina vapodo go kameka sale valeke.”

¹⁰Gerena napu so Ribeka i vapodo go karua sale valeke ia, mana kameka tamaqira to kazigarata ita Aisak.

¹¹Do God i soko valulu zena nanao ia. Iago, i vine so kameka riru karua sale dena. God i sine ne Ribeka, “Sale kenaqa ne tina zazu ne go ke suka ne.” I sine bana pata dena tarakenaqana iru ara kaebo go zazu ne na pata velaka ba i sakata. Iago vivine ia God i degere ṉalu ni korua go basoe, do iki reqe kaega pata i zazu ne go.

¹³Gerena i sine go Buka tabo ne, “Qa mamaligara ne Jekop, do qaki soko kaega Iso.”

¹⁴Iago mata go God iki zazu iic kaega pata totoloṉo de iri koe go basoero ne ba? Kaega!

¹⁵Tanego God i sine bana ne Mosese, “Era tuna nanao mana manava ne basoe qa soko go nanao na.”

¹⁶Iago ṉalu God i korua go basoe ia iki lulua kaega pata ni soko go ba pata i pada ne go zazu nena basoe, do God i lulua so manava ia tanuna.

¹⁷Tanego Buka tabo ne, God i sine ne Pero, “Era qa mao nigo aro tono batu lavata, mana sauna vatovato raro to go tinara za sadaka mego karaputa rera, mana go tarinara rove ava go era basoero na kolabana pua ne.”

¹⁸Iago, God i manava ne qira basoero i soko qira go, mana ki va gata pata qira kaega vano iriki soko go kaega gatana pata.

¹⁹Bana kaki kameka ramu tina vane ava era dena, “Ṉalu igogo nae ia ava tina gogo God tina soba ze go kebu de ikoego kaki basoe? Ianae tanego go i kaega kaki basoe tina seko tolia go God.”

²⁰Do ake aro tono mazala go seko tolina God? Sereke pua, do iki tana ulene kaega basoe i zazu ne go, “Avigo tane qo zazu vane ava go era dena?” iki go kaega.

²¹Do valeke i zazu ne go sereke ne so i mazala go va zazuna pua ni valulu zego de ni soko go. Kameka pobo na pua nae i zazu ne ze karua sereke, kakia i vazazua ṉalu musaqara lavata, mana varuana ne i vazazua to osina musaqara.

²²Gerena napu so God. Ia i soko vasadakena muma ia, mana isoko vamia qitae karaputa ia. Do ia i pala tarua muma ia de iriki koe go ria ikoego muma ia. Patavolomo i muma vasakata ne qira go.

²³Mana i soko napu vasadakena velaka sivala na karaputa ia, i zele me ze go de iri koe go ria iri pala go manava ia, mana de qata koe go ita ia i vanama ne qita go tatana pala tavise go menomeno ia.

²⁴Tanego ita to basoero i koru bana qita go God. Iki vano Jiu miki so kaega do ita napu to vano qatiki Jiu go kaega go.

²⁵Iato dena pata i sine go buka ia Osea, “Basoero iriki, basoero bana era go kaega, era tunara koru qirae ‘to basoero era’. Vudu ro qaki mamaligara bana ne qira go kaega, era tunara koru qira me, ‘qa mamaligara ne qamu’.

²⁶Mana komala qa sine bana ne qira qamuki ‘basoero era kaega’, komala nae to God i too sivala go tinara koru qirae go salero era.”

²⁷Isaia i sine bana me sauqira vano Izirel igogo, “Patavolomo topu qira vano Izirel iri gere go topu na karakoni i koe go rikisi masi ne, do kavia so ria God tina vakavele qira go.

²⁸Tanego God tiniki umata kaega tina varitanae ne qira basoero na vudu pua.”

²⁹Isaia i sine napua igo, “Ṉalu Batu lavata ne tariki taru sivala bana me kaega kavia kazigarata ro ita, ita tata vanavolomo to gere so karua komala Sodom mana Qomora iru vana go.”

³⁰Iago, pata qi sine go vano iriki Jiu go kaega iriki pada ne kaega vatotoloṉo na tanuqira de ikoego God. Do ria iri vatotoloṉo ze tanuqira de ikoego God loborona vaogoto ria.

³¹Do vano Izirel iri lulua so Tamana go tina vatotoloṉo qirae go de ikoego God, iri go, do iriki soba so kaega Tamana nae.

³²Iago avigo tane iriki soba go kaega? Tanego pataro iri zazu ne go iriki zazu ne ze kaega vaogoto ria de ikoe go God, do iri zazu ne ze sauna zazu velaka ria. Iago iri za tabatuparae so ipaka lavata ni poro tupara ne qira go basoero topu ne.

³³Buka tabo ne i sine bana me igo, “Era qa taruze kameka ipaka Zaion mana ipaka to nae tina vasoru qira go basoero ne. Do basoe i vaogote go ia, basoe nae tiniki agava ne kaega ia.”