Read Varisi Kameka Korinti 1 Bible Online

Kameka Korinti 1 - Varisi bible

Kameka Korinti 1

¹Era Pol i koru banava God, go tuna apostolo ia Jesu Kristo mana vakitaka ita Sostinesi go.

²Qaru karo zatu seko kula raru de qamu koego ramu basoero na eklesia ia God qamu koego Korint. God i koru qamu go tamuna basoe tavine ia, mana i va tabo bana qamu loborona vari vakameka de ikoego Jesu Kristo, vari vakameka napu e de koe osiqira basoero na soso dia ro iri va Batua go Batu Jesu Kristo ni Batu ria mana ita napu go.

³Go God Tamaqita mana Batu ita Jesu Kristo mara teke ne qamu Mana, mana dalo ia.

⁴Era qa seko velaka taru ze God era sauqamu ramu tanego sauna Mana ia i teke bana qamu, iva goe ze Jesu Kristo.

⁵Loborona vari vakameka de koe Kristo, ramu qamu lete vavagado ne topu na pataro gerena sosovolomo na seko mana osina tarove ro go.

⁶Taramana Kristo i lete podo vanadue de qamu koego,

⁷iato go ramu qamuki mazala kaega va seki na desuka vatabo, gerena qamu piri nego Batu ita Jesu Kristo tina lama sadakae de qata koego.

⁸Ia tina soti vanadu qamu mana i vatotoloṉo qamu go tina doka go musaqara muzimuzi, ṉalu ia Batu ita Jesu Kristo.

⁹Ita mata vazaka God, iato God i koru qamu tamuna vari vakitakie de ikoego Tuna, Jesu Kristo Batu ita.

¹⁰Loborona karaputa ia Batu ita Jesu Kristo, era qa pene qamu ramu vakitaka ro era, muna toqe ne pata qamu vari sine ne, go tina kaega go vari vatavotae loboro qamu. Ko vari vakameka ogoto, kameka nanao, mana kameka vato go.

¹¹Vakitaka ro era, kakiaro basoero na ko tatamana ia Koloesi, iri sine velaka nava era, ramu qamu poro vari valegu tanuqamu.

¹²Iato dena tane pata qa sine go era, go qamu poro vari valegu ne, kakiaro ramu qamu go “Remu qi lulua Pol” kakia iri go, “Remu qi lulua Apolosi,” kakiaro iri go, “Remu qi lulua Pita,” mana kakiaro iri go. “Kaega! Remu qi lulua Kristo.”

¹³Ramu qamu varivota ne mana va soso ko tokamana Kristo, “Avigo era Pol tane qa le go koluse ne sauqamu ramu? Avigo qamu bapitemae loborona vitoṉoqu era ba?”

¹⁴Qa seko velake God, tanego qaki bapitema qamu kaega, do tanuqiru so Krispusi mana Qaiusi.

¹⁵Iago kaega ka basoe tina mazala sine na, ramu qamu bapitemae vitoṉoqu era.

¹⁶I ogoto era qa bapitema qira ria tatamanaro Stepanasi, do i makuru ava nanaotaru na, bana qa bapitema napu qira kakiaro basoero go.

¹⁷Kristo iki turi vae kaega era tuna lama vari va bapitema do ia i turi nava era tuna tarama ne Tarama Velaka ia, na sine vasadake, do tuniki vazazua kaega tarove ia basoe, go tuna vatatavata velake le i vaego Kristo koluse ne, iki pala vakuziki ne kaega karaputa ro ia.

¹⁸Tanego tarama na le i vaego Kristo koluse ne, i patavolomo e de iri koe ria iri rore go de koe God. Ba de qata koego ita qata kavele go, i karaputa ia God.

¹⁹Tanego Buka tabo ne i sine, “Era tunara vasakate roverove ria vano tarove, mana tuna taru vakakavata nanao rove ria vano iri lete tarove ne go Tamana.”

²⁰Iago, ade iri koe tane vano tarove go? Ba vano tarove ne tamana? Ba vano iri karaputa ne vari valegu na seko? God i vatatavata bana, tarove na kolabana pua dena i kaki pata vari vaqoqo.

²¹God i lulua tarove ia tanuna, mana i makuru sakata qira basoero tarina rove velake God loborona nanao qira. Do God i soko vazazu na seko ia, qata tarama ne go, go tina vakavele qira basoero iri vaogote go tanuna. I zazu ne iadena patavolomo kakiaro basoero iri nanao seko ro dena i patavolomo.

²²Vano Jiu iri soko ne miana zazu vari vapoloso ro go tarinara vaogoto, mana vano Qrik iri taqia tarove.

²³Do remu, qi sine vasadake le i vae go koluse Kristo, tarama dena i va vokara qira vano Jiu, ba de iri koe vano iriki Jiu go kaega, tarama dena i pata volomo so,

²⁴mana de iri koego basoe i koru bana qira go God, vano Jiu mana vano iriki Jiu go kaega, tarama dena i Kristo, iato i karaputa ia God mana i tarove ia God.

²⁵Tanego pata i mimia volomo e de koe God, i lete sivala ne tarove ia basoe, mana avana i lete mimia pelae dekoe God, i lete karaputa sivala ne karaputa ia basoe.

²⁶Nanao tarua, de qamu go ninidena, vakitaka ro era ṉalu God i koru qamu. Mimia ria basoero ne, taravia ramu so qamu tarove, taravia ramu so qamu karaputa, mana taravia ramu so qamu pala kokoru lavata ro.

²⁷Pata iri nanao go basoero na pua dena i pata volomo, ianae God i vine bana go tina va agava qira vano tarove. Mana pata iri nanao go basoero na pua dena i kaega karaputa na, God i vine bana go tina va qoqoro qira vano iri karaputa go.

²⁸Ia i vine pata iri mia vaqoqore mana iriki soko kaega, ba iri nanao va patavolome go vano basoe ne. Iato nae pata tina vazazua go God go tina pero vanaqe lupo osina pata, iri nanao vamazala go basoero ne.

²⁹Ia dena i talupase kaega kaki basoe i mazala go vazakanapu ena tarakenaqana God.

³⁰Do God i vazao qitae loborona vari vakameka ia Jesu Kristo, God i vadegere Kristo tina tarove ita. De ikoego ia, ita qata ko totoloṉoe de i koe God, ita qata basoero tabo ia God mana qata kavele go.

³¹Ia to go Buka tabo ne i sine, “Ka basoe isoko seko vazaka, mara seko vazaka napu ne pataro i zazu ne go Batu ne.”