Read Varisi Kameka Korinti 13 Bible Online

Kameka Korinti 13 - Varisi bible

Kameka Korinti 13

¹Qa mazala so seko ne, seko ria basoero mana seko ria aqelo ro, do ṉalu qaki mamaligara ne qira kaega basoero ne, seko ro era i vari vaiqi gere so naki na kuvili, ba moki lubilubi iri lubia go.

²Ṉalu tara ko nava karaputa go na sine vasadake seko ia God, ba tu lete tarove mana tu nanao rove osina pata pupuika, mana tu toṉove osina vaogoto go tu vazikia kubolo ro, do ṉalu qaki mamaligara ne qira kaega basoero ne, era qa patavolomo so.

³Patavolomo tu soso lupo ne osina pata qa toṉove go, mana tu vamao tokamaqu mara subi vale zaqe nako ne, do ṉalu qaki mamaligara ne qira kaega basoero ne, i kaega so kaki pata velaka tu pala go era.

⁴Mamaligara i valosia nanao na basoe go iki muma katikili kaega mana i vari nanao go, iki pata na kaega vari qorae mana vazaka napu go.

⁵Mamaligara iki pata vasasakata na kaega basoe, ba va ṉaṉa siko na basoe, ba va muma katikili na basoe. Mamaligara iki pata va toqo muma na kaega basoe.

⁶Mamaligara iki pata vakula na kaega too sakata, do na kula ze pata ogoto.

⁷Mamaligara i makuru va pela na nanao ia basoe, mana vaogoto ia, ruruqe ia mana nanao losi ia tiniki va qoqore kaega.

⁸Mamaligara iki rove kaega lupo. Do karaputa na sine vasadake na tarama ia God, tina za lupo, mana karaputa na seko nena seko kakavata ro tina za lupo, mana karaputa na nanao rove na pata, gogo ne, tina za lupo napu go.

⁹Tanego sosovolomo ita tepa ia nanao tarove, mana sine vasadake na seko ia Godiara kaebo so velaka sivala.

¹⁰Do ṉalu pata i lete velaka sivala go na tina lama, osina pata iki totoloṉo bana go kaega tina zaga lupo.

¹¹Torana ara sale qa vaego, seko ro era, gatagata na tokamaqu mana nanao ro era go i gere to de go sale, ba ninidena era qa basoe kazigarata to, qa vana lupo ne to era too sale igogo ne.

¹²Ninidena ita qata rove so desuka de igogo God, i gere so qata reṉa e sirosiro iki lete sadaka vavelaka go kaega, do ṉalu tinara lama go, tatana mia osina pata totoloṉo de koe matana God, ṉalu nae to ita tatana ra rove go osina ro pata, gere God i rove go osina de qata gogo ita.

¹³Iago kapisa pata dena i ko sivala go, vaogoto, ruruqe, mamaligara, do ke lavata sivala ne to mamaligara.