Read Varisi Kameka Korinti 14 Bible Online

Kameka Korinti 14 - Varisi bible

Kameka Korinti 14

¹Mamaligara to tamuna lete pada ne ramu, muna pada ne pala na sosovolomo mazala ro ia Spirit tabo, sosovolomo na sine vasadake na seko ia God.

²Ria iri seko ne seko kakavata, iriki seko tabe kaega basoe, tanego i makuru gata lupase na, do iri seko tabe God. Iri seko ne pata ogoto ni ko pipika go mana iri vazazua karaputa ia Spirit tabo.

³Do basoe i sine vasadake go seko ia God, i seko e de iri koego basoero, mana i teke qira tavisi, iva karaputa nanao qira, mana i teke qira nanao velaka go.

⁴Ria iri seko nego, soso seko kakavata iri tavisi ne so tanuqira, do ria iri sine vasadake go seko ia God iri tavisi ne eklesia ne.

⁵Era qa soko osiqamu, tamu seko ne soso seko kakavata ro, do era qa lete soko tamu pala karaputa na sine vasadake na seko ia God. Tanego basoe i sine vasadake go seko ia God, i karaputa sivala ne basoe i seko ne seko kakavata ro i kaega ka basoe, tina sine lupase go seko ro ia, go tina tavisi nego basoero na eklesia.

⁶Iago vakitaka ro era, ṉalu tuna lama e de qamu koego ramu mana seko ne seko kakavata ro, avigo tina mazala tavisi ne qamu? Kaega to, do ṉalu tu garetu sine vasadake pataro i va mia ve God qa rove go, ba seko ia God, ba kakiaro vari vatatana ia go, pataro nae to i mazala go tavisi ne qamu ramu.

⁷Nanao zaqe kiu ba qita, pataro nae i kaega too de iri koego, basoero so iri va naki qira go, ṉalu basoe iki rove go kaega va qiso na, avigo tatana gata rove go kera i vaego?

⁸Mana ṉalu basoe iki puqo valavate kaega kuvili ne, kaega ka basoe tina vanama ne zae na varitara.

⁹I varipada so, kaega ka basoe tina nanao rove pataro qamu sine go, ṉalu seko ramu qamu sine ze seko kakavata ro mana seko ramu iki tatavata velaka kaega, ṉalu nae seko ro ramu tina patavolomo so.

¹⁰I topu soso seko kakavata ikoego kolabana pua ne, do osina seko ro i ko lupo talupasa ro ria.

¹¹Do ṉalu qaki gata rove kaega era seko ia kaki basoe, basoe nae, i basoe na vudu kakavata, mana basoero nae tarina go era do qa basoe na vudu kakavata napu go.

¹²Tanego ramu qamu lete soko pala na sosovolomo ia Spirit tabo, iago ramu muna pada ne vazazuna kero ne karaputa i mazala go tavisi ne qira go basoero na eklesia go tarina degere vanadu go.

¹³Iago basoe i seko ne seko kakavata, mara pene God go ia mara mazala napu sine lupase na kapata i sine go.

¹⁴Tanego ṉalu era qa seko ne seko kakavata ṉalu qa pepene go, Spirit tabo i koe de qa koego i pepene go, do nanaoqu iki pepene tavisi kaega.

¹⁵Iago avana to tuna zazu ne? Era tuna pepene ne seko ia Spirit tabo era, mana tuna pepene ne seko era go, tuna kera ne seko ia Spirit tabo era, mana tuna kera ne seko era go.

¹⁶Ṉalu qamu pepene mana seko velaka ne God, qamu seko ne seko kakavata, ava tina go ṉalu kaki basoe voru i garetu ko tavisi qamu, tina sine go “Amen!” Loborona pepene ramu. Ia iki rove kaega kapata qamu sine go ramu.

¹⁷Patavolomo loborona pepene ramu qamu seko velaka ne God, i lete velaka, do de ikoego basoe voru nae iki tavisi ne kaega.

¹⁸Qa seko velaka ne God, tanego qa seko ne soso seko kakavata ro, sivala ne qamu ramu.

¹⁹Do loborona ṉalu vazaka na Pade Lotu, era tuna sine so kalima seko iri gata rove go basoero, ṉalu tuna vatatana qira go, i velaka sivala ne, ṉalu tu sine go mao na seko kakavata ro.

²⁰Vakitakaro era kasi pala na nanao gere qira sale ro, do ṉalu qamu zazu ne too i sakata go, ramu muna gere qira salero, do nanao qamu mara nanao kazigarata.

²¹Loborona Buka tabo ne God i sine, “Era na vazazu qira basoero iri rove go seko kakavata ro, go tarina seko tabe go basoero qira era, tuna vazazua saqe qira basoero kakavata, do patavolomo igogo nae, ria tariniki soko kaega gata na pata tuna sine go era.”

²²Iago sosovolomo na seko ne seko kakavata i va sadaka me lala de iri koego vano iriki vaogoto go kaega, iki sauqira kaega ria vano iri vaogoto go. Gere napua so sosovolomo na sine vasadake na seko ia God, i lala e de iri koego vano iri vaogoto go, iki sauqira kaega ria vano iriki vaogoto go kaega.

²³Ṉalu kakiaro basoero, ba vano iriki vaogoto go kaega, iri lama ko tavisi ṉalu qamu lotu go, mana ramu qamu seko ne seko kakavata ro, avigo tariniki sine kaega, qamu vano bulaṉoe?

²⁴Do ṉalu osiqira basoero iri sine vasadake seko ia God mana kakiaro basoero, ba vano iriki vaogoto go kaega iri keba me, seko ramu tina zazue de iri koe go sauna vasakata pata ro ria. Mana pata iri gata go tina taru ze vivine de iri koego,

²⁵nanao pipika ro ria tina sadaka me de tatavata mana tarina tudu mana vazaka God, tarina sine vasadake, “Pata ogoto God i kotavisi qamu ramu.”

²⁶Vakitaka ro era. Ia dena to talupasa na pata qa sine go era. Ṉalu qamu teṉo go tamuna lotu go, kaki basoe mara vanama kera, kene basoe na vari vatatana, kaki basoe na vasadake pataro i vamia ze go God, kaki basoe na seko ne seko kakavata mana kene basoe na sine lupase go. Topu pataro dena to i tavisi ne va popoka na eklesia.

²⁷Ṉalu kakia ro basoe iri seko ne seko kakavata, karua ba kapisa so ria basoe iri mazala go seko, do iri na vari vakavali mana taramuzina nae kaki basoe napu na sine lupase pata iri sine go ria nae.

²⁸Do ṉalu i kaega go ka basoe tina sine lupase go seko ro ria, basoe i seko ne seko kakavata ro, mara ko duduli mara pepene ne sauna tanuna de koe God.

²⁹Karua ba kapisa so basoe iri mazala go sine na seko ia God, ria kero ne iri na gata mana mia velaka pata ro iri sine go.

³⁰Do ṉalu kaki basoe i koloku tavisi qamue loborona pepeu, mana i pala kaki seko de koe God, basoe i seko e de qamu koego mara noto tekere.

³¹Osiqamu qamu mazala to vari kavali ne sine vasadake na seko ia God, go osiqamu tamu na nanao rove, mana pala karaputa go.

³²Basoero i ko ne qira go karaputa sauna vasadake na seko ia God, mara vazazu velake karaputa igogo ne.

³³Tanego God iki soko qitae kaega tatana vaevato, do i soko tatana ko kameka va velaka. Gere qira so osiqira basoero na eklesia ia God.

³⁴Qolero mara ko duduli, ṉalu na pepeu. Ria tariniki seko kaega, gerena ikoego Tamana ia Mosese, mana ria tariniki lama kenaqa kaega go.

³⁵Ṉalu iri soko go rove na kaki pata, mara ria tana ne valeke ro ria, loborona pade ria. Ṉalu qolero iri seko e loborona ṉalu pepeu na lotu ne, i kaki pata lete vari va agava so.

³⁶Avigo, qamu nanao seko ia God i reqe kenaqa me de qamu koego ramu? Qamu nanao seko ia God i doka eso de qamu koego ramu?

³⁷Ṉalu kaki basoe i koe loboro qamu i nanao i kone karaputa sauna sine vasadake na seko ia God, ba i kenaqa ne Spirit tabo gogo ne i velaka, ia mara rove, pata qa karo ne qamu atu go era dena, i seko tamana i Batu ne.

³⁸Do ṉalu iki vakapata kaega seko ro dena, kasi ara gata napu na ia go.

³⁹Iago vakitaka ro era, vanadu ze puṉu qamu de go sine vasadake na seko ia God, do kasi va kaega ne qira vano iri seko ne go, seko kakavata ro.

⁴⁰Muna zazu ze osina pataro dena loborona zuka totoloṉo go basoero tarina kula ne go.