Read Varisi Kameka Korinti 15 Bible Online

Kameka Korinti 15 - Varisi bible

Kameka Korinti 15

¹Mana ninidena qa soko va nanao taru qamue vakitaka ro era, sauna Tarama Velaka qa tarama ne zego, de qamu koego iato qamu pala go, mana vaogoto ramu i degere vanadu ego.

²Iato nae Tarama Velaka qa tarama ne qamu go. Ṉalu tamuna pala taru vanadua go Tarama Velaka ne, ramu tamuna za kavele, do ṉalu qamuki vanadua kaega Tarama Velaka ne, vaogoto ramu tina patavolomo so.

³Qa vakava napu qamue ramu, pata qa pala go, iato i lete mazala sivala i karo ego Buka tabo, igo, Kristo i le ne vasakata pata ro ita,

⁴iri vovua, mana taramuzina kapisa musaqara, ia i too napu me tepa le, gerena i karo ego Buka tabo ne,

⁵ia i sadaka ne Pita mana ria manoga karua apostoloro go.

⁶Gonae i sadaka napu qira lima vasa ria basoero kameka so musaqara, topu ria iri ara too, do kavia ria iri le.

⁷Gonae i za sadaka napua Jemisi mana taramuzina i sadaka qira osiqira apostoloro go.

⁸Valupolupo na, iara sadaka va era. I ogoto era qa gere kaki basoe iki otovo ne kaega do i podo go.

⁹Era to qa suka sivala ne osiqira apostoloro, mana iki tora kaega tarina vitoṉo ve apostolo, tanego era to qa vasasakata ne qira go basoero iri vaogote go God.

¹⁰Do loborona Mana ia God era qa apostolo ia. Manava i teke nava go era iki vana volomo kaega, do i zari urena. Tata mia zaqe go ne, era qa zazu vokara sivala ne qira kerone apostoloro, do iki zazu miki era kaega tanuqu do Mana ia God i zazu tavisi ava.

¹¹Iago patavolomo akena qamu pala ze go Tarama Velaka, de qa koego era ba kero ne apostoloro, ia dena to pata qi tarama ne go remu, mana iato dena pata tamuna vaogote go ramu.

¹²Aria, loborona tarama remu qi sine Kristo i too napu me tepa le ne. Avigo tane kakiaro ramu qamu go, vano le i makuru qira tarina ra too napu go?

¹³Ṉalu go basoero iri le bana go, tariniki too ule kaega, ianae i talupase God iki vatoo ule bana me kaega Jesu tepa le ne.

¹⁴Mana ṉalu go, God tariki va too ule me kaega Jesu tepa le ne, remu tara kaega ne qemu ka Tarama Velaka ti sine ne qamu, mana ramu tara kaega ne qamu kapata tamu vaogote go.

¹⁵Sivala napu ne ia igogo, ṉalu remu qi poqe ne God, qi sine go, iva too me Kristo tepa le ne do ṉalu go vano iri le tariki too me kaega, God tariki vatoo napu me kaega Kristo.

¹⁶Tanego ṉalu vano le taraki too napu me kaega, patavolomo Kristo do taraki too napu me kaega tepa le.

¹⁷Mana ṉalu Kristo taraki too napu me kaega tepa le, vaogoto ramu tara rore so loborona vasakata pata.

¹⁸Ianae i talupasa napua so, vano iri vaogote go Kristo iri le bana go iri patavolomo so go.

¹⁹Ṉalu qata ruqe ze vaogoto ita de koe Kristo tina vakavele qitae too ninidena so, mana too ṉalu muzi kaega gogo ne, makuru mana maqata ita tina sivala ne qira osiqira basoero.

²⁰Do pata ogoto sivala, Kristo i too napu me tepa le. Ia dena ivasadaka me, God tina va too napu me qira vano iri le go.

²¹Gerena le i reqe me kameka basoe, mana too me tepa le i reqe me kameka basoe,

²²iato go osina basoe iri le, tanego iri va kameka ne Adamo, gerena napu so osina basoe tarina too napu me tepa le, tanego iri vakameka napu ne Kristo.

²³Do nogotona basoe tina lulua dego zukazuka na, ṉalu tarina too me tepa le, kenaqana. Kristo, mana taramuzina ṉalu tina za ule me, ita to basoero ia God go.

²⁴Taramuzina nae kolabana pua tina lupo, Kristo tina taru vaqoqoro lupo, qira aqelo sakata ro iri zazu ne go vatovato, vari miasoka ria, karaputa ria, mana tina vazao qirae de ikoego vari miasoka ia God Tamana.

²⁵Tanego Kristo tina batu lavata go tina zadoka so ṉalu God tina vaqoqoro lupo qira kana ro ia mana tina taru qirae polana makena Kristo go.

²⁶Valupolupo na kana ia tina vaqoqoro go ne, le.

²⁷Tanego Buka tabo ne i sine, “God i taru ze osina pata polana makena Kristo” do tanuna so God tiniki koego kaega polana ia. Tanego God to i taru ze go osina pata polana Kristo.

²⁸Do ṉalu osina pata tina koe to polana karaputa ia Kristo, Kristo tina taru ze tanuna polana God. Tanego God i teke ne go ia karaputa, go i batu go mana tanuna God tinara batu lupo ne osina ro pata go.

²⁹Aria, avigo tane basoero iri bapitema nego sauqira vano le, avana tane iri nanao tarina pala go? Avigo i ogoto, tane kakiaro iri go vano le tariniki too napu kaega? Iago avigo tane basoero ne iri bapitema qira go vano le ne.

³⁰Mana sauqemu remu, avigo tane osina ṉalu remu qi vasivala ne pata makuru ro na?

³¹Vakitaka ro era, osina musaqara era qa vele le so, ma sine vasadake, tanego, i sauna vari vakameka ita de ikoego Batu ita Jesu Kristo.

³²Loborona komala Epesus, i gere pata qa varitarae de koe pata qaraqara piru. Ṉalu vano le tariki too me kaega tepa le, era tuki ogoto kaega, ṉalu igoto nae, itora mata lulua seko igogo “Mata ṉaṉa mana besi go tanego bakubaku tatana le.”

³³Miasoka iri niki go poqe qamue seko dena, “Ṉalu qata kameka zazu tavisi qira vano sakata, iri mazala vasakate na vatovato velaka ita.”

³⁴Muna vatotoloṉe nanao qamu, mana mamanava luluna zuka na vasakata pata. Kakia ro ramu qamuki rove kaega God, qa sine iadena, go ramu tamuna agava ne.

³⁵Kaki basoe tina mazala tana, “Ava tina go vano le tarina too napu go? Ava tina gere tokama qira?”

³⁶Tana nae i bulaṉoe! Ṉalu qo leba ze pua paturu aro, i makuru tina podo ṉalu iki le go kaega paturu ne.

³⁷Tanego pata qo leba go i paturu so, bana paturu na vuiti ba paturu na kakiaro pata, qoki leba va tutukune kaega tokama lavata na go tinara podo mego.

³⁸God i teke ne paturu tokama gere so de i soko go, i teke ne nogotona paturu tokama i tora go.

³⁹Mana manu na basoe, iki gere kaega manu na pata qaraqara, basoero manu qira i kameka ado so, manu qira pata qaraqara i kakavata ne manu qira pale ro, mana iṉana i kakavata napu manu qira go.

⁴⁰Tokama ikoego rani ne, i kakavata ne tokama ikoego vudu pua ne, tanego menomeno na tokama ikoego rani ne, i kakavata ne, menomeno na tokama ikoego vudu pua dena.

⁴¹Sana i ko menomeno ia, inaqa i ko menomeno ia, mana domiri ro i kakavata napu menomeno ro ria mana patavolomo domiri ro, do menomeno ria i vari kakavatae lupo.

⁴²Tina gere to pataro dena, ṉalu vano le tarina too napu me tepa le. Tokama qata vovua go tina za noli, do ṉalu tina too napu me tepa le, tokama nae tiniki ara noli kaega.

⁴³Ṉalu qata vovua tokama ne, i mimia sakata mana i pela go, do ṉalu tina too ule napu me tepa le, tokama nae tina menomeno mana moqere go.

⁴⁴Tokama le qata vovua go i pala too na vudu pua dena, do ṉalu tina too napu me tepa le tokama nae tina pala too de koe God. Pata ogoto, i ko tokama i pala too de koe God, mana tokama i pala go too na pua dena qo.

⁴⁵Iato go Buka tabo ne i sine, “Basoe kenaqa Adamo, God i vazaria ia i teke ne too na vudu pua dena,” do Adamo i lama muzi go God i teke ne ia Spirit i soso ne too.

⁴⁶Too i teke qita go Spirit iki lama kenaqa kaega, do too na vudu pua dena i lama kenaqa go, taramuzina iara lama go too dekoe God.

⁴⁷Adamo kenaqa God i zazu ne ze ia pua, mana i pala too na vudu pua dena, Adamo muzi i reqe me tepa rani ne.

⁴⁸Basoero na vudu pua dena iri gere Adamo kenaqa iri pala ze too vudu pua de. Basoero na rani ne, iri gere Adamo muzi i pala ze too ia vudu na rani ne.

⁴⁹Gerena so ninidena qata gere Adamo kenaqa God izazu ne ze go pua ne, go ṉalu muzi do, tatana gere napua so Adamo muzi i reqe mego rani ne.

⁵⁰Vakitaka ro era, iato dena talupasa na seko era, tokama qita i ko go manu na mana parasana, i makuru tina zae go de ikoego vari miasoka ia God, pata i le go i makuru tinara pala too.

⁵¹Gata! Seko ogoto dena, i pipika bana ne qamu, igo, osiqita tataniki le kaega, do ṉalu kuvili muzimuzi tina naki me, ita tatana katikili kavala gere so katikili na kapurena mata ne. Ṉalu kuvili tina naki me, vano iri le bana tarina too napu me, mana tariniki ara le kaega go, mana osiqita tatana kavala lupo.

⁵²

⁵³Tokama i mazala noli, do tina kavala mana tiniki ara noli napu kaega. Tokama i rove le, do tina kavala mana tiniki ara le kaega.

⁵⁴Ṉalu osina pataro dena tina lama sadaka, pataro i le go tina kavala mana tiniki rove to kaega le go, go Buka tabo ne tina lama ogoto, le i lupo to. God i vaqoqoro bana ia!

⁵⁵“Le, ade to karaputa qo kenaqa nego? Le, ade to karaputa aro go tono vari va vokara ne go na?”

⁵⁶Le, i pala ze karaputa ia de koe vasakata pata go tina vasakata qitae ita, mana vasakata pata i pala ze karaputa ia de koe Tamana.

⁵⁷Do mata seko velaka ne God i teke ne qita go karaputa loborona de koe Batu ita Jesu Kristo.

⁵⁸Iago vakitaka ro era, degere vanadu mana ko vakaraputa. Variqo ze too ramu loborona zazu ia Batu ne, tanego qamu rove bana, kaega kaki pata i patavolomo ṉalu qamu zazu ne zazu ia Batu ne.