Read Varisi Kameka Korinti 3 Bible Online

Kameka Korinti 3 - Varisi bible

Kameka Korinti 3

¹Vakitaka ro era, de bana ne i makuru ava teke qamu seko era, gerena qa seko tabe qirae basoero i kone qira go Spirit tabo. Era qa mazala seko na de qamu koe ramu, gerena basoero na vudu pua dena, torana ninidena nanao qamu iara gere so nanaoqira sale suka ro, de gogo nanao rove na Kristo.

²Iago, vapadapada na era tuna teke qamu so susu, tuniki teke ne qamu kaega, pata gege ni magoro go tanego iara kaebo tora qamu. Mana ninidena do iara kaebo so tora qamu,

³tanego ramu qamu ko gere qira so basoero na vudu pua dena. Vari qorae iara koe so de qamu koego, vari valegu tanuqamu go, pataro nae i vasadaka me, ramu qamu lulua vatovato na vudu pua dena.

⁴“Ṉalu kakia ramu qamu go, ramu qamu lulua Pol ba, remu qi lulua Apolosi,” ianae ramu qamu luluaso vatovato na vudu pua.

⁵Muna pada ne nanao rove na, “Akena tane Apolosi? Mana akena tane Pol?” Raru qaru basoe zazu ia so God, qaru tavisi qamu ramu go tamuna vaogote God. Nogoto qaru qaru, zazu ne so zazu i teke ne qaru go God, vapadapada na zazu raru, i gere basoe i zazue barue.

⁶Era qa leba paturu ne, mana Apolosi i va besia, do God ni va podo go paturu ne.

⁷Basoe ni leba go paturu ne, mana basoe ni va besia go paturu ne, i kaega ne qiru ka mazala. Tanuna so God iko ne mazala tanego i va podo go paturu ne.

⁸Basoe i leba go paturu ne, mana basoe i va besia go paturu ne, iru vari tora so, God tina teke qiru voli i tora go zazu riru.

⁹Tanego qaru kameka zazu ne zazu ia God, mana ramu qamu barue ia go. Mana ramu qamu pade ia God.

¹⁰Qa va zazua sosovolomo i teke nava go God, qa zazu gere basoe i lete rove go zazu pade, qa sola vazunua bolu go na degere turu tina pala vanadua go pade ne, mana kaki basoe napu i zazu ze go pade popokona deqa vanama go era. Do osiqira tarina mia velake de tarina vane go zazu na pade ne.

¹¹God i taru bana ze Jesu Kristo gerena turu i vanadua go pade ne, kaega napu kaki basoe i mazala go taru napu zaqe kaki pata.

¹²Kakiaro basoero tarina vazazua qol ba siliva, ba ipaka menomeno ro tina turu vanadua go pade ne, kakia ro tarina vazazu moki ba katoga be seuseu go.

¹³Mana mazala na zazu ia nogotona basoe tina lama mia rove, ṉalu musaqara muzimuzi. Tanego ṉalu musaqara nae, nako tina va sadaka me, velaka na ba sakatana zazu ia.

¹⁴Ṉalu turu na pade igogo iki kamua kaega nako ne basoe zazu igogo ne tina pala voli na.

¹⁵Do ṉalu nako i kamu lupo go zazu ia kameka basoe, zazu ia basoe nae i lupo. Do basoe nae, God tina vakavele tanego i paqa ne nako igogo ne.

¹⁶Ramu qamu rove bana, qamu Pade Lotu ia God, mana Spirit ia God i koe loboro qamu.

¹⁷Iago ṉalu kaki basoe i vasakate go Pade Lotu ia God, God tina vasakate ia. Tanego Pade Lotu ia God i lete tabo, mana ramu to qamu Pade Lotu ia God.

¹⁸Kaega ka basoe mara va bulaṉoe tanuna, ṉalu kaki basoe i nanao, i tarove ne patana ro pua dena, ia tina vana lupo ne tarove ia, mana vaqoqore tanuna go tina pala tarove igogo ne.

¹⁹Tanego tarove i nanao go vudu pua dena, i patavolome tarakenaqana God. Gerena Buka tabo ne i sine, “God tina va soru qirae tarove ro iri vazazua go.”

²⁰Mana kakia napu Buka tabo ne i sine, “God i rove nanao ria vano iri lete tarove go, i kaega so kapata i tora go.”

²¹Iago, i kaega kaki basoe tina seko vazaka napu ne pata i mazala go zazu ne basoe. Osina pata i ke ramu.

²²Patavolomo era Pol, ba Apolosi, ba Pita, mana kolabana pua dena, too mana le, pataro i ko ninidena, ba pataro tinara lama, osina pataro dena i ke ra ramu.

²³Mana ramu, qamu ke ia Kristo, mana Kristo i ke ia God.