Read Varisi Kameka Korinti 6 Bible Online

Kameka Korinti 6 - Varisi bible

Kameka Korinti 6

¹Ṉalu go kakia ramu i vari valegu ne kaki pata de ikoego kakia basoe lotu, avigo tane qamu vazao ze ia varitanae, de iri koego vano rodoko? Ramu tamu vazao ze de iri koego basoero ia God, go tara vatotoloṉe go.

²Avigo qamuki rove kaega, ita basoero ia God tatana toere too ria basoero na kolabana pua ne? Iago ṉalu ramu tamuna toere go too ia basoe na kolabana pua ne, avigo tane i makuru qamu go toere vatotoloṉo na pata suka ro nae.

³Avigo qamuki rove kaega ita tatana toere qira go aqelo ro? Iago pataro i kogo ninidena i pata suka so qata mazala so vatotoloṉe na.

⁴Ṉalu kakia pataro dena i lama sadaka go, ramu qamu vazao ne qira basoero iriki vivitoṉo ego kaega eklesia ne sauna vatotoloṉe na.

⁵Avigo tamuniki agava ne kaega? Era qa vaogote kaki kameka basoe tarove i koe loboro qamu, i mazala go vatotoloṉo na vari valegu de iri koego vano lotu.

⁶Ramu qamuki lulua kaega zuka igogo ne, do ṉalu kaki basoe lotu, i vazao ze varitanae de koe kene basoe lotu, ramu qamu vamao ne qira vano iriki vaogoto go kaega tarina toere go vari valegu ramu!

⁷Dego qamu poro keba ego varitanae tanuqamu, i vasadake, qamu lete pela. I tora so tamuna va malumu ne kene basoe mara va vasakata qamu. I tora so tamuna va malumu ne kene basoe mara pala pata qamu toṉove go.

⁸Ba ia ne, ramu qamu vari zazu ne so pata kebu loboro qamu, qamu vari sikosiko napu so de qamu koego tanuqamu vano lotu.

⁹Pata ogoto ramu qamu rove, basoero iri zazu ne too iki totoloṉo go kaega, tariniki pala kaega Too ikoego vari miasoka ia God. Iago kasi va bulaṉoe na tanuqamu, basoero iri vari vagabu mana iri vazaka go beku ro, ba taunata, valeke ro iri vari vagabu tanuqira go,

¹⁰mana vano iri siko mana vano iri soko pala na topu na pata, ba poro ge loka ba poro pepeu valu qira kero ne basoero, ba vano iri poro sikosiko go. Kaega kaki kameka ria dena tarina keba za go Too ikoego vari miasoka ia God.

¹¹Kakia ro ramu qamu go bana to nae. Do ninidena Kristo ivadalo qamu, i vakuziki lupo ne kebu ro ramu. Mana i vine qamue de koego God, ramu qamu ko totoloṉoe de koe God, loborona zazu ia, Batu ita Jesu Kristo mana de koe Spirit ia God ita.

¹²Kaki basoe i mazala so sine na, “Era qa mazala so zazu ne kapata qa soko go,” ove to, do osina pata iki velaka nigo kaega zazu ne na. Era qa mazala so sine na, qa mazala zazu na kapata qa soko go, do tuniki vamao ne kaega iago tina va seka ava go.

¹³Kaki basoe napu tina mazala so sine na, “Pata gege i pata na kuaba, mana kuaba ne i pata roku na pata gege,” oveto, do God tina valupo qiru karua pata nae. Tokamana basoe iki pata vazazu na kaega zazu sakata ro, do tokama ne, na vazaka mana osaka ze Batu ne, tanego Batu ne tane i teke ne qita go tokama ne.

¹⁴God i vatoo ze Jesu tepa le, mana tina va too napu qita ita loborona karaputa ia.

¹⁵Qamu rove, tokama qamu i kaki takoboro na tokamana Kristo. Iago, avigo qa mazala pala na kaki takoboro na tokamana Kristo, mana va kameka ze ia tokama qira qolero iri vari vagabu go tanuqira? I makuru!

¹⁶Avigo qamuki rove kaega ṉalu kaki basoe iva kameka ze tokamana de iri koego qolero iri vari vagabu go, riru nae iru kameka tokama to. Gere na Buka tabo ne i sine, “Tiruna ko gere to kameka tokama.”

¹⁷Do basoe i va kameka ne tanuna de ikoego Batu ne, iva kameka ze too ia.

¹⁸Kasi zazu ne na vari vagabu. Kero ne vasakata pata i zazu ne kaki basoe iki vasakate kaega tokama, do basoero iri vari vagabu go tanuqira ria nae iri lete vasakate tokama qira.

¹⁹Avigo qamuki rove kaega tokama qamu i pade tabo ia Spirit tabo. Iato i koe loboro qamu, mana i teke ne qamu go God? Ramu qamuki ke ramu kaega tanuqamu, do qamu ke ia God,

²⁰tanego God i voli bana qamu, mana kudo na voli qamu i lete lavata sivala. Iago vazazu ze tokama qamu sauna velaka na God.