Read Varisi Kameka Korinti 8 Bible Online

Kameka Korinti 8 - Varisi bible

Kameka Korinti 8

¹Aria, sauna pata qamu karo me go, de igogo pata gege iri komakoma ne qirae go beku ro, iogoto, kakiaro basoero iri sine, ‘Tta qata pala tarove”, do tarove igogo ne, i teke basoe nanao vazaka napu, do mamaligara to i mazala go vanadu qita.

²Ka basoe i nanao tanuna i basoe tarove igo, basoe nae iki rove so kaega kapata.

³Do basoe i mamaligara ne God, God i rove velake basoe nae.

⁴Iago sauna ge na pata gege iri komakoma ne qirae beku ro, ita qata rove beku ro i kaega ne qira karaputa, iri beku volomo so, ita qata rove iko kameka so God.

⁵Bana iko napu kakiaro pata iri vitoṉo qirae, “god” ikoe tepa rani ba pua, pata volomo “god”, ba “batu”, ro dena iri lete topu,

⁶do i kameka minena so God Tamaqita iva zaria go osina ro pata mana ita qata too e loborona ia. I ko ne qita kameka so Batu Jesu Kristo, loborona ia topu pata i zari me, mana loborona ia, ita qata too e go.

⁷Patavolomo igogo nae, topu basoe iriki nanao rove kaega pata igogo ne, kakiaro basoero iri vazaka bana qira god beku ro, go ilama doka e to ninidena, ṉalu iri ge go pata gege ni gogo ne, iri nanao pata gege ni gogo ne i ke ria god beku ro. Nanao qira iki karaputa kaega, iri nanao pata gege igogo ne tane i va poṉo madau qira iri go.

⁸Pata gege ni gogo ne i makuru tina vagarogaro ba va laqalaqa qitae dekoe God. Ṉalu qata ki ge go kaega, pata gege ni gogo ne, qatiki vana ne kaega kaki pata, mana ṉalu qata ge go, qatiki pala ze kaega kaki pata go.

⁹Muna miasoka, kasi va malumu na ko talupasa ramu, mara va soru qirae vasakata pata ria i pela go vaogoto ria.

¹⁰Ṉalu kaki basoe i pela go nanao na, mana i mia go aro, qo basoe “tarove” qo go, do qo ṉaṉa e Pade Lotu ia kaki beku. Avigo i ogoto pata qo zazu ne go aro, tina toqo va kakavata nanao na ia, go ia tina ge napua pata gege iri komakoma ne qirae go beku ro ba?

¹¹Iago “tarove” aro tina va sakate go vakitaka aro nae tanego vaogoto ia iki karaputa kaega, iato i le ne go Kristo.

¹²Mana sauna to pataro igogo ne, aro tono vasakata pata e de ikoego Kristo, tanego qo vasakata pata e de iri koego vakitaka lotu ro, qo vasakate nanaoqira tanego, iriki karaputa kaega.

¹³Iago ṉalu pata gege i teke vasakata pata vakitaka aro, era tuniki ara ge kaega, niki go va soru ze vasakata pata vakitaka era.