Read Varisi Karua Korinti 1 Bible Online

Karua Korinti 1 - Varisi bible

Karua Korinti 1

¹Era Pol qa apostolo, i turi nava Jesu Kristo, tanego God i vato bana ne. Era mana vakitaka ita Timoti qaru karo go leta dena, de qamu koego basoero ia God qamu koego komala lavata na Korint, mana ria napu iri vaogoto go, iri koego kena Akaia.

²Qa pene, go God Tamaqita mana Batu ita Jesu Kristo mara Mana ne qamu mana mara teke ne qamu vato bulebule ia.

³Mata seko velaka ne God, ia i God mana i Tamana Batu ita Jesu Kristo, i God na varinanao, God i reqe me osina tavisi ro.

⁴I Tavisi ne qitae osina makuru ro ita, go ita qata mazala tavisi napu ne qira kero ne basoero i kone qira soso adoado na makuru ro ria. Mata vazazu napua so vari vatatavisi qata pala bana ze de ikoego God.

⁵Gerena so remu qi pala tavise go topu na vokara ro ia Kristo, mana de ikoego Kristo, remu qi pala napua so tavisi lavata ia God.

⁶Tanego remu qi soba makuru ro, iato go ramu qamu pala tavisi mana vari vakavele. Ṉalu remu qi pala ze tavisi de ikoego God, ramu do tamuna pala napua so vari vatatavisi igogo ne, mana tamuna pala karaputa de ikoego God, go tina va moqere gamu ṉalu tamuna za pala go vokara qi soba bana go remu.

⁷Qi rove ramu qamu pala tavise vokara ro qi pala go remu, mana qamu pala tavisi napu so vari vatatavisi qi pala go remu, iago nanao qemu remu deqamu koego ramu iara nadu so.

⁸Remu qi soko vananao taru qamue ramu onotoqemu ro, sauna makuru lavata ro qi soba ze go kena Esia. I lete lavata sivala, iato go remu qi va zazua karaputa, go qi mazala go too ne na.

⁹Remu qi rove, le tina lama dokae deqi koego, pataro dena tina sadaka me, go remu mi kasi nanao na i karaputa remu tanuqemu, do de i koeso tanuna God, i mazala go va too na basoe ṉalu i le go.

¹⁰Ṉalu bana ne, ia i vakavele qitae makuru i mazala vaevale na basoe, mana ia tina vakavele napu qita ṉalu iara ko mego, mana remu qi lete vaogote, ia tina vakavele taru qita so ita.

¹¹Gerena ramu qamu tavisi ne qemue, loborona pepene ramu, osina pepene ro ita God tina gata me, mana God tina va tabo qita, mana topu ria basoero tarina seko velake God, sauqemu remu.

¹²Kameka pata remu, qi lete vazakanapu ne mana qi vaogote remu qi vasadake vatovato velaka ro remu, loborona vari vakameka de qata koego, loborona va vaogoto mana osaka na soko ia God. Remu qimuki zazu vamiki e kaega loborona tarove remu tanuqemu, do loborona so karaputa na Mana ia God.

¹³Remu qi karo ne qamu, zazao na pataro qamu mazala go toere na mana nanao rove na go, do patavolomo, ninidena ramu qamuki rove velaka qemu kaega,

¹⁴qa nanao kadigo ramu qamu mazala to nanao rove lupo qemu remu, go ṉalu tina doka go musaqara ia Batu ita Jesu, ramu qamu mazala to vazakanapu ne, tanego remu timuna ke ra ramu.

¹⁵Era qa nanao va velake pataro igogo ne, iato go qa vanadu ze nanaoqu tuna garetu tove kenaqa qamu ramu go tamuna kula karua ṉalu.

¹⁶Tanego qa vanadu ze nanaoqu tuna garetu tove sivala ne qamu, ṉalu tuna zaza go za Masedonia mana ṉalu tuna zaza gado napu go, go qa mazala pala na tavisi de qamu koego ramu loborona zaza era tepa Judia.

¹⁷Avigo qamu nanao era qa seko volomo so? Tanego qaki lulua kaega de tina gogo zaza ro era? Kaega, era qaki lulua kaega soko era tanuqu, i makuru ava sine na ‘ove’ ba ‘kaega’ kameka zaza.

¹⁸Pata ogoto sivala, God i seko ne pata ogoto, iago seko ro qi sine qamu go remu, qimuki sine kaega ‘O’ mana ‘Kaega’.

¹⁹Era, Saelas mana Timoti, qi tarama ne Jesu Kristo i Tuna God, ia iki sine kaega ‘Ove’ mana ‘Kaega’, ba iane osina ṉalu i sine ‘Ove’ de ikoego God.

²⁰Loborona de ikoego Jesu, osina pata i pui nego God i lama voto lupo, iato go qata sine ‘Amen’ loborona vitoṉo na Jesu Kristo.

²¹Tanuna so God ni vakameka ne qita go ita loborona ia, pata ogoto loborona too ita i vakameka ze Kristo, tanuna so God i vine qita go ita,

²²i taru ze lala ia i tonovo qita, mana ia i teke ne qita, Spirit tabo loborona puṉuqita, ianae i va nanao taru qitae ita, topu na pataro iara ko napu, i babana ne qita go.

²³Era qa koru ze God, vaogoto era, i rove puṉuqu, go niki va maqata qamu ramu iato go era qaki garetu ego kaega Korint.

²⁴Remu qiki soko ne kaega vele batu ne na vaogoto ra ramu, qi rove ramu qamu degere vanadue vaogoto ramu, ba remu qi zazu tavisi ne qamu so sauna kulakula ramu.