Read Varisi Karua Korinti 10 Bible Online

Karua Korinti 10 - Varisi bible

Karua Korinti 10

¹Kakiaro basoero iri go, era qa basoe konotose, qava qoqoro ava tanuqu, qaki seko vakaraputu kaega ko tavisi qavae qamu go, do qa poro seko vamoqere atu de qamu koego, ṉalu qa ko valaqalaqa ne qamu ianae loborona velaka mana manava ia Kristo, era Pol qa pene vakaraputa qamu,

²kasi va tutubo ve era go ma seko vamoqere de qamu koego ṉalu tuna garetu doka go. Do era qa rove qa mazala seko vamoqere de iri koego basoero iri sine go, remu qi lulua so vatovato na pua dena.

³Iogoto ita qata koe vudu pua dena, do ita pua dena.

⁴Pata varitara qi vazazua go remu, iki patana kaega vudu pua dena, do i pata varitara mazala ia God, iato qiva zazua go remu qi vasakata zego pataro i degere vanadu go, mana pataro iri vari valegu poqe ne basoero go,

⁵qi pero vakuziki ne vatovato vazakanapu ro ria basoero i vamidiki qirae go rove na too ia God, qi teke qira nanao velaka ro go tarina vaogote Kristo.

⁶Mana ṉalu qamu vasadaka ogote qamu toqe ne vanadu na vaogoto ramu de koe Kristo, remu timuna vanama napu ne valepulepu qira vano iri kasi go vaogote ne ia.

⁷Ramu qamu reṉa neso pekapeka na pataro qamu mia go. Ka basoe i sine tanuna i ke ia Kristo, basoe nae mara nanao velaka, tanego remu do qi ke ia Kristo, gerena so basoe igogo ne.

⁸Batu ita i teke ne qemu karaputa dena, go timuna tavisi ne vakaraputa na vaogoto ramu, iki sauna kaega go tina vasakata qamu. Iago patavolomo tane qa seko vazakanapu ne karaputa qi pala go, i kaega napu kapata tunara agava ne go.

⁹Era qaki soko kaega ramu tamuna nanao, era qa vasareki qamu, loborona leta qa karo go.

¹⁰Kadigo kaki basoe tina mazala so sine na, “Leta ia Pol, i purake seko lavata ro, do ṉalu i kotavisi qita, ia i pela so mana seko ia i kaega so ka karaputa na go.”

¹¹Basoe nae mara nanao rove, tanego iki soso pata kaega pata qi karo zego leta ne, ṉalu qi ko valaqalaqa go dena mana pata timuna garetu zazu ne, ṉalu timuna garetu mia qamu go.

¹²Pata ogoto remu qiki varitora kaega, ba sivala ne qira kaega basoero iri vazakazaka go tanuqira. Iri vano bulaṉoe! Iri vazazua nanao qira mana iri vine vari pada ne tanuqira mana iri varipada ne vatovato ria go.

¹³Ba remu ne, qi vazakanapu neso pataro i tora go, qi vazakanapu neso zazu i teke qemu God timuna zazu nego, mana iadena italupasa napua eso zazu qi tavisi qamue go.

¹⁴Ramu qamu koe de i doka ego pada ne, iago remu timuniki ara vasivala ze kaega ṉalu timuna garetue de qamu koego, ṉalu timuna pala zatu go Tarama Velaka ia Kristo.

¹⁵Iago remu qiki vazakanapu ne kaega zazu ria kero ne basoero, iri vasivala zego pada i vanama ne qemu go God. Do qi nanao, vaogoto ram tina zaza popoka go tina malumu qemu remu zazu karaputa napue de qamu koego, do tina dokae so pada i vanama bana go God.

¹⁶Ṉalu i goto nae remu qi mazala tarama ne na Tarama Velaka loborona kero ne vudu kakavata ro. Tanego qiki soko kaega vazakanapu ne na zazu iri zazu bana ne go kakiaro basoero ne.

¹⁷Buka tabo ne igo, “Basoe i soko vazakanapu mara vazakanapu ne pataro i zazu nego Batu ne.”

¹⁸Ṉalu God i nanao vamazale basoe nae, ia tina toqe ne, do iki tora kaega basoe nae tina nanao vamazale tanuna.