Read Varisi Karua Korinti 12 Bible Online

Karua Korinti 12 - Varisi bible

Karua Korinti 12

¹Era tuna vazaka napu so, patavolomo iki sadaka me kaega kaki pata velaka. Mana ninidena era tuna pepeua pataro i vasadake go Batu ne i va rove ve era go.

²Era qa rove kameka valeke lotu, God i pala va popoka ze ia rani ne, torana manoga kavasi ave i sivala bana zago. Qaki rove kaega de go ogotona, avigo i sadaka ogoto? Ba qa miadua so? Tanuna so God i rove go.

³Ma sine patu napua, qaki rove kaega ogoto na bana qa miadua so ba, God so i rove go, qa mazala so sine na, i gere so God i pala va popoka ze go ia tepa paradiso.

⁴De gogo ne, i za gata ze pataro i tabo go pepeu na, mana seko do i makuru seko ne ze go.

⁵Iago era tuna vazaka napu ne pataro i vasadaka ne go God valekenae, do tuniki vazakanapu nava kaega tanuqu.

⁶Ṉalu qa soko go vazakanapu era qaki bulaṉoe kaega, tanego era qa seko ne pata ogoto, era tuniki vazakanapu kaega tanego qaki soko kaega basoero tarina nanao vamazala va era, sauna pataro iri mia go qa zazu ne mana pataro iri gata go qa sine go era.

⁷Do pata go tina va noto ava go era go tuniki poro nanao sivala go kaega sauna osina pata velaka ro qa mia go, God i teke nava era kaki pata i paqo vokara me loborona tokamaqu, i gere so kaki basoe zazu ia Satana i sima va era, go era, tuniki poro vazakanapu kaega.

⁸Kapisa ṉalu qa pene Batu ne, go mara pala vakuzika ne pata i gogo ne.

⁹Do vataule i teke nava go igo dena, “Mana era so i tora go aro, ba karaputa era i moqere sivala ṉalu aro qo pela go.” Era qa lete kula sivala ṉalu qa pela go, go karaputa ia Kristo tina koe de qa koego era.

¹⁰Iago qa kula qa vokara ne sauna Kristo, qaki va kapata kaega ṉalu qa pela go, ba iri vasasakata nava, ba i kaega nava kapata, do era qaki vakapata so kaega vari vasasakatae ba makuru ro dena. Tanego ṉalu karaputa era i pela lupo, ṉalu nae era qa pala to karaputa ia Kristo.

¹¹Era qa gere sekoseko na basoe bulaṉoe, do ianae i kebu ra ramu. Ramu to tamu vasadake go zazu velaka ro qa zazu nego era. Iago ṉalu era qa patavolomo, era qaki koe kaega pola qira vano tavine qamu koru qira e go “apostoloro”!

¹²God i zazu ze de qa koego era topu na zazu mazala ro mana zazu vari vanureke. Ianae i vasadake era qa apostolo, loborona zazu tavisi qa vae qamu go, era qa zazue loborona vari vananao.

¹³Avigo zazu qa zazu ze era deqamu koego i kakavata ne zazu qa zazu ze era de iri koego kero ne vano lotu? Ba kameka pata so qaki sine ne qamu kaega ne, qaki pene qamue so kaega kesa, iago qa pene qamu muna nanao ule nava.

¹⁴Ninidena to i vapisana ṉalu era qa vanama ne go tuna garetu tove qamu go, do tuniki pene qamue kaega kaki pata, qaki soko kaega kesa ramu. Ramu so qa soko go era, qamu rove, salero iriki mazala kaega miasoka na tamaqira mana sinaqira go, do tamaqira mana sinaqira tane iri mazala go miasoka na salero ria.

¹⁵Era qa kula sivala qa vazazua go osina pataro i konava go na tavisi ne qamu ramu, patavolomo too era go. Iago, avigo ramu tamuniki lete mamaligara nava kaega? Ba era qa lete mamaligara ne qamu ramu?

¹⁶Qa nanao ramu tamuna mazala nanao rove na era qaki va papala maqata qamu kaega, do kaki basoe i mazala so sine na era qa zazu tatakiu mana qa zazu ne soso seko poqe ro de qamu koego.

¹⁷Avigo? Qa zazu tatakiu mana pala qamue ramu kaki pata, de iri koego vano palapala seko qa turine qira atu go ba?

¹⁸Era qa pene Taetusi tina garetu, mana qa va lulu ze ia kakia napu basoe lotu go. Avigo qamu mazala sine na Taetusi ia garetu zazu tatakiu ne qamu mana i pala qamue kaki pata go? Muna rove raru Taetusi i kameka so nanao qaru mana zazu qaru zazu ne go i kameka so.

¹⁹Vakitaka ro era, kadigo qamu nanao remu qi pada ne so bara nena tanuqemu de qamu koego ramu. Kaega! Remu qi seko gerena so Kristo i soko go timuna seko e tarakenaqana God, mana osina pata qi zazu ne go tina tavisi ne qamu ramu go.

²⁰Era qaki soko kaega miana ṉalu tuna garetu go, too ramu tina kakavata ne de qa soko go era, mana ramu tamuna mia too rera tina kakavata ne de qamu soko go ramu. Qaki soko kaega garetu soba zena vari valegu, vari qorae, poro muma mana ṉaṉa siko, seko sakata, pepeu valu, vazakanapu mana legulegu de qamu koego.

²¹Era qaki soko kaega miana pata i sadaka bana go tina sadaka napue go nae, qaki soko kaega God era tina va agava ve era tarakenaqa qamu ramu, qaki soko kaega dae, tanego i sauqira osiqira basoero iri poro zazu neso kameka atona vasakata pata iri zazu nego ṉalu bana ne, iriki nanao ule ne so kaega sauna zazu sakata ria, vari vagabu mana kero ne vatovato sakata go.