Read Varisi Karua Korinti 13 Bible Online

Karua Korinti 13 - Varisi bible

Karua Korinti 13

¹Ninidena vapisana ṉalu era tuna garetu tove qamu, gerena so i karo banae go Buka tabo ne, “Ṉalu kaki basoe i vapaqo ze seko de ikoego kaki basoe ne, karua ba kapisa basoe tarina degere ne, go tina ogoto go pata i sine go basoe nae.”

²Qa soko sine ne qamu ramu qamu vasakata pata go de bana ne, mana ria kero ne go, qa sine bana ne qamu varuana ṉalu qa garetu tove qamu go, do ma sine patu napua tanego ninidena qako vakakavata go, ṉalu tuna garetu doka go ṉara lete vakimata qira basoero nae.

³Ramu qamu soko miana ogotona Kristo i vazuka ze deqa koego era. Ṉalu i zazue de qamu koego ramu ia iki pela kaega, ba ia ne i vasadake karaputa ia loboro qamu ramu.

⁴I ogoto loborona too memelaka Kristo i le koluse, do loborona karaputa ia God Kristo i ko mana i too go, loborona vari vakameka de i koego ia ita qata pela napu, do loborona kameka zazu ita osiqita tatana pala karaputa ia God loborona too de ikoego Kristo.

⁵Muna pada ne tanuqamu mana toere too ramu, go tamuna rove qamu vano vaogoto. Kadigo qamu rove Jesu Kristo ikoe loboro qamu? Ṉalu go qamuki rove go kaega ogoto sivala ramu ramu qamuki moqere to kaega varivose dena.

⁶Era qa vaogote ramu tamuna rove remu qiki pela e kaega varivose dena.

⁷Remu qi pene God go ramu tamuniki zazu ne kaega kaki pata kebu qiki soko go kaega vamia qamue ramu, remu qi va ure zazu velaka ro remu, do qi soko ramu tamuna zazu ne pata velaka, patavolomo remu qi mimia pela go.

⁸Remu i makuru qemu zazu ne na kaki pata go timuna va varitara ze go pata ni ogoto go, do qi mazala so luluna pata i ogoto go.

⁹Remu qi kula ṉalu ramu qamu karaputa, patavolomo remu qi pela, iago remu qi pene God go ramu tamuna lete dalo mana ko totoloṉo go.

¹⁰Igoto nae ia tane qa karo zatu go era leta dena, torana qako vakakavata ne qamu go, go ṉalu tuna garetu doka go era tuniki lete vasasakata ne qamu kaega, loborona karaputa i teke nava go Batu ne. Karaputa dena tina tavisi qamu ramu loborona vapopoka na too velaka ramu, iki karaputana kaega go nava sakata qamu.

¹¹Turaquroe, nindena qa sine koto ramu! Muna pada ne ko totoloṉo osina ṉalu mana gata pataro qa sine qamu go era, vakameka ne qira kero ne basoero mana koe loborona bule. Go God i soso nego mamaligara mana bule mara koe de qamu koego.

¹²Ṉalu qamu seko velake kene basoe valulu ze dego zukazuka na vari kulae ogoto.

¹³Osiqira basoero ia God iri vagaretu ne qamu seko kula ria. Qa pene Mana ia Batu ita Jesu Kristo mana mamaligara ia God, Vari vakameka ia Spirit tabo na kotavisi qamu osiqamu.