Read Varisi Karua Korinti 2 Bible Online

Karua Korinti 2 - Varisi bible

Karua Korinti 2

¹Iato go, qa va nadu ze nanaoqu, tuniki ara garetu napu e kaega de qamu koego, niki go va maqata qamu.

²Tanego ṉalu tuna va qaqata gamu go ne, akena tinara va kula qamu go? Kaega napu kakia, do era to qava magata qamu go.

³Go qara karo zatu go leta nae, era qaki soko kaega tuna garetu tove qamu go. Tanego ṉalu tuna, garetu tove qamu ramu, era tuna maqata, tanego ramu so qamu mazala go vakula va era! Mana era qa lete vaogote, ṉalu era qa kula, osiqamu ramu, tamuna kula lupo napu so go.

⁴Ṉalu qa karo go leta dena, era qa lete maqata mana nanaoqu iki kula kaega, mana qa dae, do era, go qa karo zatu go leta dena qaki soko kaega tuna va maqata qamu ramu, do qa soko muna mia rove ramu, era qa lete mamaligara ne qamu ramu.

⁵Iago ṉalu kaki basoe i va maqate kaki basoe, iki va maqata va kaega era, do i va maqata napu qamu ramu. Qa sine iadena tanego qaki soko kaega tuna va makure ia.

⁶Kimata qamu vine go ramu sauna basoe nae, itora tina pala.

⁷Iago ninidena era qa soko muna nanao ule ne ia, mana teke ne ia nanao velaka, go niki lete maqata mana niki lete va pela nanao na ia.

⁸Iago qa pene qamu, muna vamia ze ia kavia vatovato ro, go qamu mamaligara ne ia.

⁹Qa karo ne qamu leta nae, qa soko pada ne qamu go ma rove, avigo qamu toqe ne vaogoto na pataro qa sine ne qamu go era?

¹⁰Ṉalu qamu nanao ule ne kaki basoe i zazu ne kaki pata i kebu go, era do qa nanao ule napu neso ia ṉalu tara kone kaki pata basoe nae, go qa mazala go nanao ule ne era, qa nanao ule bana ne ia, de koe tarakenaqana Kristo tanego i sauqamu ramu.

¹¹Era qa zazu ne iadena, go Satana tina kaega ne karaputa de qata koego ita, tanego ita qata rove bana pata i vanama go Satana tina zazu ne.

¹²Ṉalu qa lama dokae Troas, go na tarama ne Tarama Velaka ia Jesu Kristo, era qa lama rove Batu ne i papaqa bana zuka go tuna za zazue era.

¹³Do era qa lete maqata tanego qaki soba kaega vakitaka ita Taetusi, iago qava tarutaru qira basoero na Troas mana qa za napue Masedonia.

¹⁴Do remu qi seko velake ne God, tanego loborona vari vakameka ia de ikoego Kristo, God i kenaqa ne qita ita loborona bara ia Kristo, ṉalu ia i va pela go karaputa ia Satana mana vasakata pata. God i vazazu qemu go timuna vasadaka ze osina dia tarove ia Kristo gerena kaki pata i lete nonoli meno go.

¹⁵Tanego remu qi gere nonoli velaka na insenisi iri komakoma zaqe go Kristo de ikoego God, i zae go de iri koego ria iri kavele mana ria iri rore go.

¹⁶De iri koego ria iri go zago zuka igo za go tepa le ne, nonolina insenisi ne i noli sakata qira, tanego tina vae vale qira. Do ria iri kavele go, nonoli na insenisi ne i noli meno qira, tanego i teke qira too. Iago akena tane i mazala go pala na zazu dena.

¹⁷Remu qiki gere qira kaega kerone basoero iri lete tarove ne zazu dena. Iri tarama ne Tarama Velaka ne, gere so kaki pata iri mazala soba ze vavagado, go tarina too ne. Do remu qi lete vaogote mana nanao vamazale zazu ro remu, qi tarama ne Tarama Velaka ia, gerena so de i soko go God, qi sine vasadake seko ia tanego qi vano zazu ia Kristo.