Read Varisi Karua Korinti 4 Bible Online

Karua Korinti 4 - Varisi bible

Karua Korinti 4

¹Loborona vari nanao ia God i teke ne qemu zazu go timuna zazu nego, lago remu iki pela kaega nanao qemu.

²Qimu vana lupo ne pata pipika remu, too ba vatovato i mazala go vamaqate na basoe, qiki zazu tatakiu kaega ba itana vasakatena seko ia God. Loborona tatavata ogoto remu i koe de ikoego God, mana qi padane vasadakena vatovato velaka mana too totoloṉo, de iri koego basoero i velaka go vatovato mana too ria go.

³Ṉalu go Tarama Velaka qi tarama ne i pipika, ianae i pipika ne qira so vano iri rore go.

⁴Ria ne iriki vaogote kaega Tarama Velaka ne, tanego Satana, god sakata na kolabana pua de, i lete va kodo qira. Iriki miasoba kaega tatavata i damara poka qira go, tatavata dena i vazazao go Tarama Velaka na tatavata mazala ia Kristo, ia i gere napua so God.

⁵Tanego remu qiki tarama ne kaega tanuqemu, do qi tarama ne Jesu Kristo i Batu go, mana remu qi vano zazu ra ramu, tanego i sauna Jesu.

⁶God i sine bana, vazari i vae nego kolabana pua ne, “Loborona de rodoko, tatavata ina damare.” Iato God dena so, ivatatavata ze go tatavata ia loborona puṉuqita. Tatavata dena i varove qitae tatavata mazala ia God, i damara ego tarakenaqana Kristo.

⁷Ba remu, qi pala go vavagado ogoto de ikoego Spirit qi gere so sereke pua ne, go timuna vasadake karaputa ogoto ia God, iki tanuqemu kaega.

⁸Basoero iri vasasakata ne qemu, do i makuru qira tarina va noto qemu, kakia ro ṉalu i ruama nanao qemu, do qiki pela kaega,

⁹i topu sasakata vano iriki soko qemu kaega, do iki kaega ne qemu kaega vakitaka, kaviaro ṉalu iri va vokara qemu, do iki vasakata qemu kaega.

¹⁰Osina ṉalu, remu qi pala ze tokama qemu le ia Jesu, go too i vae go ia tina sadaka e loborona tokama qemu.

¹¹Lodana too qi vae go, qi vele le neso nanao taru na Jesu, go too ia ne, tina sadaka e loborona too remu.

¹²Talupasana iadena, go qi vele le ne zazu dena ne, go too velaka tina koe deqamu koego ramu.

¹³Gere na so i karo ego Buka tabo ne, “Era qa vaogote God,” go qa seko nego, iko ne qita so kameka ado na vaogoto ita, qata vaogote mana qata seko ne go.

¹⁴Ita qata rove, God iva too ze Jesu tepa le, qata rove napua ia tina vatoo qita ṉalu tatana le, gerena i vatoo go Jesu. Mana tina pala qemu remu, mana ramu, go tatana za koe tarakenaqana Jesu.

¹⁵Tanego i sauqamu ramu tane i sadake go pataro dena, mana topu basoero iri kavele ne Mana ia God, iago topu na pepene ro, seko velaka ro tarina teke zaqe God sauna karaputa mazala ia.

¹⁶Iago, remu qiki pela kaega, patavolomo karaputa remu i taqoqoro, do too na madau qemu i pala karaputa nogotona musaqara.

¹⁷Makuru ro qi vokara nego remu dena, iki pata ko sivala kaega, mana i pata suka so, ṉalu tara varipada ze go ke tinara za lama go. Tanego tinara valame ne qemu kaki pata i lete lavata mana tina ko sivala, mana ia igogo ne, too iki rove go kaega lupo de ikoego God.

¹⁸Tanego remu qiki vanadu ze kaega nanao qemu, pataro qata mia go, do qi vanadu ze nanao qemu, pataro qata ki mia go kaega. Pataro qata mia go, iki pata ko vaumata kaega, do pataro qatiki mia go kaega, iato pataro tina ko sivala go.