Read Varisi Karua Korinti 5 Bible Online

Karua Korinti 5 - Varisi bible

Karua Korinti 5

¹Remu qi rove ṉalu pade kavakava qata koego dena i tapapata, tokama qita ikoego pua dena tina mode, God tina vanama ze kaki pade tepa rani go tatana za koego. Komala i zazu ne tanuna tina ko sivala go.

²Torana ara too qata vaego de, ita qatiki kula kaega, qata maqata so, tanego qata soko kaki tokama ikoego rani tatana va keba nego.

³Tanego ṉalu qata le, i gere pata qata sisinaqa go, ṉalu qata ki toṉove go kaega tokama voru igogo ne.

⁴Torana ara ko qata vaego pade kavakava dena, i gere ṉalu qata pala kaki pata i lete maqata, iato go qata soko go vakuziki ne na tokama qita i koego vudu pua dena, iki go kaega! Do, qata soko tokama na rani tatana vakeba nego. Tokama qita ninidena, God tinara vakavele mana teke ne qita tokama kakavata iki rove go kaega le.

⁵God iato i vanama bana ne qita ita kavala ro dena, iteke bana ne qita Spirit tabo ia, go i vananao taru qitae ita, topu na pataro iara ko napu, i babana ne qita go.

⁶Ita i puraka ne qita karaputa osina ṉalu, iago ṉalu qata koeso pade ikoego tokama qita, ita qata laqalaqa ne pade ia God.

⁷Tanego too ita i nadu eso vaogoto, mana iki nadue kaega pataro qata mia go.

⁸Ita i ko ne qita karaputa mana qata lete soko tatana kasi ne pade ikoego tokama qita mana tatana za koe pade ia Batu ne.

⁹Remu qi soko di zazu ne pata tina vakula go God. Iago ade tepa tane qi koego, bana qiara koe so too ninidena? Ba de ikoego too, de koe God?

¹⁰Do osiqita tatana sadaka e tarakenaqana Kristo ṉalu tina zazu nego vivine ia. Ia tina vine too ita, mana tina teke ne qita voli ba kimata i tora go pataro qata zazu nego, Kristo tina zazu ne iadena, sauna osina zazu velaka ba zazu sakata ro qata zazu nego, ara too qata vaego pua dena.

¹¹Ita qata rove talupasana go qata sareki nego Batu ne, iago remu qi padane toqo qira kerone basoero. God i rove lupo banaso too ita, mana era, qa nanao rove velake, ramu qamu rove velake too era.

¹²Remu qiki pada ne kaega vazakazaka na tanuqemu de qamu koego ramu, do pata qi pada ne go remu, qi soko teke qamu ramu pata go tamuna vazakazaka qemue go remu, go ramu tamuna mazala vataule ne qira ria iri seko vapopoka go tatalina so basoe, do iriki mia kaega too mana vatovato ia basoe nae.

¹³Avigo, remu qi bulaṉoe? Remu qi zazu ne zazu ia God. Avigo, iara velaka so nanao qemu? Remu qi soko so tavisi ne qamu ramu.

¹⁴Remu i kenaqa ne qemu mamaligara ia Kristo, mana ninidena qi mia rove to, kameka so basoe i le nego basoero topu, iadena talupasana, qata pala tavise le ia.

¹⁵I le ne osiqita, go ria iri too go tariniki too ne kaega tanuqira, do sauna so ia ni le mana itoo napu nego sauqira ria ne.

¹⁶Ninidena qatiki ara toere kaega too ia basoe na pua de, patavolomo kameka ṉalu qata toere go too ia Kristo gerena too ia basoe. Pasi dena remu qiki zazu ne to kaega too igogo ne.

¹⁷Ṉalu kaki basoe i vakameka ne Kristo, ia i basoe voru, ke bana ne i lupo to, ke voru to i lama go.

¹⁸Osina pataro dena, God so i zazu ne, de ikoego Kristo tanego i kavala qita go qatara vakameka napu ne God. Ninidena ia iteke ne qemu zazu, go osina basoero tarina vakitaka napua go ia.

¹⁹Iato dena tarama i taru ne qemu remu, “De koe Kristo, God i vine qira osiqira basoero ne tarina vakitaka ia.” God iki nanaotarua kaega vasakata pata ro ria, do tarama i taru ne qemu igo, ria tarina vakitaka ro ia.

²⁰Iago remu, qi seko ne Kristo, do tanuna God i vazazu qemu remu. Loborona vatovato ia Kristo remu qi pene gamu ramu basoero qamu kana bana ne God, muna vamao ne ia mara itane too ramu, go tamuna vakitaka ro ia.

²¹Kristo i kaega ne vasakata pata, do i sauqita ita, God i kena tavisi ze ia vasakata pata ro ita, go ita tatana ko kameka e de i koego ia mana tatana pala go totoloṉo ia God.