Read Varisi Karua Korinti 6 Bible Online

Karua Korinti 6 - Varisi bible

Karua Korinti 6

¹Loborona zazu vari vakameka remu de ikoego God, remu qi pene vakaraputa qamu, ramu qamu pala go too velaka ia God mara kasi vana volomo.

²Ia dena seko God i sine, “I lama doka ṉalu tuna tavisi ne qamu, era qa gata qamu, I lama doka musaqara tuna vakavele qamu, era qa tavisi ne qamu.” Gata! Ninidena to ṉalu qata mazala pala na velaka ia God, ninidena to ṉalu God tina vakavele qamu!

³Remu qimuki soko kaega tamuna soba ze ramu kebu loborona vari vatatana remu, iago remu qi pada ne mi kasi vasoba zena kaki makuru de i koe kakia basoe.

⁴Iago, osina pataro qi zazu nego, qi vamia qamue ramu, remu qi vano zazu ia so God, qi soba ze vari vamomotoṉo ia, ṉalu na makuru ro, pada ro mana ṉalu qi riro go.

⁵Iri sima qemu, iri taru qemue bara ne, mana basoero topu iri varitarae de qimu koego, qi zazu sivala qimuki kamuku velaka kaega, mana ṉaṉa velaka kaega go.

⁶Do too dalo remu, qi rove vavelake zazao na Tarama Velaka ne, qiki muma katikili kaega, mana zazu vari vatatavisi remu, qi vasadake qi vano zazu ia so God, remu qi toṉove Spirit tabo mana qi mamaligara ogoto ne qira basoero go.

⁷Loborona tarama ogoto qi tarama nego, mana karaputa ia God go, remu qi pala totoloṉo gerena bako i koe karisi gede mana peqi varitara i koe karisi matau qemu, go timuna varitara ne mana midiki ne ze too sakata ro.

⁸Kakiaro basoero iri seko vazaka qemu, do kakiaro basoero iri seko sakata qemu, kakiaro basoero iri sine ne qira kero ne basoero pata velaka ro qi zazu nego, do kakiaro basoero iri seko va sakata qemu. Iri vagere qemue vano poqepoqe, do remu, qi seko ne pata ogoto,

⁹kavia ro basoero iri go, iriki rove qemu kaega, do topu basoero iri rove qemu, i gere pata qi le bana, do qamu mia qemu qiara too so. Patavolomo iri valepulepu qemu, remu qiki le kaega.

¹⁰Patavolomo ṉalu qi maqata, remu qi kula taru so, qi gere qira vano situ, do qi teke qira pata vavagado topu ria basoero, i gerena i kaega ne qemu kapata, do remu i kone qemu topu na pata.

¹¹Iago vakitaka ro era vano Korint, remu qi sine ne qamu pata ogoto, qi vasadake qi lete mamaligara ne qamu.

¹²Remu qiki kokoqua kaega puṉuqemu de qamu koego, do ramu so qemu kokoqua go puṉuqamu, de qi koego remu.

¹³Era qa seko e deqamu koego remu ninidena, qa vagere qamue ramu salero era, muna nanao gemu remu, gerena remu qi nanao qamu ramu. Muna papaqa me puṉuqamu de qemu koego remu.

¹⁴Kasi pada ne na vakameka ne qira vano iriki vaogoto go kaega, tanego i makuru qamu tamuna zazu va kameka. Ava tina go velaka mana sakata tiruna kameka zazu go? Ava tina go tatavata mana rodoko tiruna kameka lama go?

¹⁵Ava tiruna go Kristo mana Satana tiruna kameka vato go? Apatana to tina pala ze go basoe i vaogote go Kristo, de koe basoe iki vaogoto go kaega.

¹⁶Pade Lotu ia God i makuru tina vakameka ne pade manumanuru, tanego ita to qata Pade Lotu ia God! Gerena God tanuna i sine, “Era na zazu ze komala era, de iri koego basobasoero era mana tuna ko tavisi qira. Era tuna God ria mana ria tarina basobasoero era go.”

¹⁷Iago Batu ne igo, “Taru qira mana ko vakakavata e de iri koego. Muniki zazu tavisi pataro iki dalo go kaega, go era tuna kula ne qamu.

¹⁸Era tuna Tamaqamu mana ramu tamuna sale valeke ro mana sale qolero era go,” igo Batu ni lete karaputa sivala go.