Read Varisi Karua Korinti 7 Bible Online

Karua Korinti 7 - Varisi bible

Karua Korinti 7

¹Iago vakitaka ro era, God i pui bana ne qita topuna pataro dena, iago ita mata vadalo tanuqita, sauna pataro i mazala go va poṉo na tokama qita ba madau qita, mana mata vatabo too ita. Mata padapadae de ikoego God loborona too ita.

²Vamia qemue remu mamaligara ramu, remu qiki zazu ne kaega kapata kebu de iri koego basoero ne, qiki vasakate kaega vaogoto ia ka basoe, ba taqi na zuka tatakiu de ikoe kaki basoe.

³Era qaki sine kaega pata go tina vamakuru qamu go, gerena era qa sine bana, remu qi lete mamaligara ne qamu, patavolomo ṉalu qi too ba ṉalu qi le go.

⁴Era qalete ruruqe qamu ramu, qa lete kula ne qamu, loborona topuna pata makuru ro qi soba go, era iara ko nava karaputa mana qara lete kula so.

⁵Ṉalu qi za dokae Masedonia, remu qiki ziṉo kaega, tanego topu na pata makuru i koe de igogo ne, topu na basoero iri vari valegu e de qi koego, iago remu qi lete sareki go.

⁶Do God iva velake go nanao qira vano iri maqata go, i va velaka napua nanao qemu remu, ṉalu ia i turine me Taetusi.

⁷Iki lama doka na so kaega Taetus i vakula qemu go, do tarama ro ia, dego qamu vatalasare go ia. I sine ne qemu, de go ramu qamu lete soko miava era, mana magata ramu dego qamu soko go tavisi nava era, iago era qa lete kula napu.

⁸I ogoto, ṉalu go leta qa karo zatu go era iva maqata qamu, era qaki maqata kaega karo qavae nego leta nae. Ṉalu qa mia go leta ne iva maqata qamu, era do qa maqata napuso.

⁹Do ninidena era qa kula, qaki kula ne kaega tanego qava maqata qamu, do era qa kula tanego maqata ramu i kavale too ramu. God ivazazua maqata dena, go ramu tamuna mazala go kavale na vatovato ramu, iago remu qiki zazu ne kaega kaki pata go tina va sakata qamu.

¹⁰Iago maqata ivazazua go God, i kavale puṉuna basoe, mana i va sadaka me vari vakavele, iago maqata dena iki ko sivala kaega. Do maqata i lulua go nanao na pua dena mana iki taqia kaega God, ianae iva sadaka me le.

¹¹Muna mia pata i zazu ne God i va maqata qamu go, ramu qamu lete soko vasadakena i kaega ne qamu kebu. Ramu qamu muma, qamu poloso, qamu le ne miana vatovato totoloṉo tara sadaka me, qamu vanama ne valepulepu qira vano iri vasakata pata go, ianae qamu vasadake qamu lete totoloṉo e pataro nae.

¹²Iago ṉalu qa karo zatu go leta nae, qaki va paqo ze kaega ka basoe bana i zazu ne kaki pata kebu, ba kebu ia ka basoe. Qa karo ne qamu go ma vatatavata velake, God i rove ramu qamu lete nanao qemu remu.

¹³Igoto nae too ramu, tane i vavelake go nanao qemu remu. Ki vakula so kaega nanao qemu, do qi lete kula ne Taetusi sauna kulakula ia mana de qamu go ramu qamu tavisi ne go ia!

¹⁴Qa pepeu vazaka qamu ramu de ikoego Taetusi, mana ramu i kaega kaki pata qamu va agava vego era. Remu qi soko so pata ogoto de qamu koego, mana i vari pada so pepeu vazaka qivae nego Taetusi, i pata ogoto.

¹⁵Iago mamaligara ia de qamu koego i zaza popoka, gerena ia i nanao taru qamu go, qamu toqe ne luluna vatovato i vanama go, dego qamu vagado vavelake go ia, qamu valulu ze sareki mana padapada go.

¹⁶Era qa lete kula sivala, mana qa vaogote ramu tamuna mazala va velake na osina vatovato mana too go.