Read Varisi Karua Korinti 8 Bible Online

Karua Korinti 8 - Varisi bible

Karua Korinti 8

¹Ramu turaquroe, remu qi soko tamuna rove zazu velaka Ia God, i vazazu zego basoero lotu na Masedonia.

²Topu na makuru iri soba, i lete pada ne vaogoto ria, do loborona makuru ro nae, ria iri lete kulakula. Iri vano situ, do iri vasadake kula ria, iri teke qira basoero kakavata sosovolomo ro ria.

³Ma sine ne qamu pata ogoto, ria iri soso valavata ne pata iri mazala go soso na, patavolomo i lete topu do ria iri soso neso, tanego iri soko to.

⁴Iri pene qemu remu, iri lete soko tarina tavisi ne basobasoero ia God iri koego tepa Judia.

⁵Pata iri zazu nego basoero dena, i sivala ne pata qi nanao go remu. Kenaqana iri teke ne Batu ne too ria, mana taramuzina loborona vatovato ia God iri teke ne ṉalu ria deqi koego remu.

⁶Iago remu qi pene Taetusi i vatupi bana go zazu velaka dena, mara zazu soma mana na tavisi ne qamu, go tamuna valupo go zazu velaka dena loborona mamaligara ramu.

⁷Ramu qamu lete vavagado ne pataro qamu pala go, loborona vaogoto, seko ro ramu, tarove ro ramu, qamu soko go tavisi ne qira basoero mana mamaligara ramu de qi koego remu go. Iago remu qi soko ramu tamuna vaogoto loborona vari mamaligarae ramu.

⁸Era qaki vadegere kaega ka Tamana, do qa soko vamia qamue dego soko ria kerone basoero iri soko go tavisi na zazu dena, era qa teke qamu ṉalu go tamuna mazala vasadake na mamaligara ramu i pata ogoto.

⁹Qamu rove bana Mana ia Batu ita Jesu Kristo de qata koego, i lete vavagado sivala, do i vaqoqore tanuna tanego i sauqamu ramu, i zazu ne pata dena go ramu tamuna pala vavagado ia.

¹⁰Nanaoqu era ne, itora ramu tamuna valupo zazu qamu vatupi bana go ave zago ne. Ramu to qamu toqe kenaqa ne mana ramu to qamu zazu kenaqa ne zazu dena.

¹¹Iago zazu soma mana valupo to zazu nae, gerena qamu soko go mana vato bana ne, mana vazazua avana iko ne qamu ninidena.

¹²Ṉalu qamu lete soko go soso ne na tavisi ramu, God tina toqe ne pala na sosovolomo ramu, tina lulua so pata iko ne qamu go qamu mazala go soso ne, iki lulua kaega pata i kaega ne qamu go.

¹³Era qaki vele vapapala maqata qamu kaega ramu, mana va sasavegolo ne qira kerone basoero, do pasi ninidena ramu iko ne qamu topu na pataro, iago itora tamuna teke ne qira sosovolomo ramu de iri koego vano iri pusi nego. Go taramuzina ṉalu ramu tamuna za pusi napu, mana ria tina topu ne qira, tarinara tavisi napu ne qamu so. Iago ṉalu qamu zazu ne vatovato dena, Osiqamu qamu varitora lupo so.

¹⁵Gerena so Buka tabo ne i sine, “Basoe i za pala go topuna patagege, iki lete topu ne kaega, mana basoe i za pala go desuka so patagege, iki pusi ne kaega go.”

¹⁶Remu qi seko velaka ne God, i teke go Taetusi nanao go i soko go tavisi ne qamu, gerena so remu qi soko go tavisi ne qamu.

¹⁷Ia i toqe ne pepene remu, mana ilete soko bana so tina tavisi ne qamu, mana i nanao bana so tina garetu go.

¹⁸Remu qi turi napu zatu kakia vakitaka remu i lulu zatu Taetusi, valeke dena ria basoero lotu iri mia vamazale ia loborona zazu ro ia, mana vari vatatana i vae nego Tarama Velaka ne.

¹⁹Aria napu, basoero lotu do iri vine napua ia tina zaza tavisi qemu pala zaza qivae ne zazu vari mamaligarae, sauna vazakazaka na mazala ia Batu ne, pataro dena tina vasadake remu qi soko tavisi ne qamu.

²⁰Remu qi lete momokolo ne miasoka na sasovolomo ro dena, tanego qiki soko kaega kaki seko mara sadaka me.

²¹Tanego ala remu, qi soko zazu ne pata totoloṉo, de ikoe go tarakenaqana God mana de iri koego basoero go.

²²Iago remu qi turine zatu vakitaka remu i lulu tavisi qira atu, topuna ṉalu qemu pada ne ia, do qi rove ia i lete soko to tavisi. Iago ninidena i lete kone vaogoto de qamu koego ramu, mana i lete soko vasakate to tavisi ne qamu.

²³Do Taetus ne, muna nanao tarua i varuaqu era, qaru kameka zazu sauna tavisi ne qamu ramu. Karua basoe iru lulu zatu go Taetus ne, iru degere ne sauqira basoero lotu mana zazu riru iru vazakazaka Kristo.

²⁴Vamia qirae basoero nae, qamu mamaligara ne qira, go basoero lotu qi turi ne qira atu go tarina gata mana rove, go pataro qi vazaka napu ne go remu sauqamu ramu vano Korint tina pataogoto.