Read Varisi Karua Korinti 9 Bible Online

Karua Korinti 9 - Varisi bible

Karua Korinti 9

¹Iki tora kaega tuna karo ne qamu sauna tavisi qamu vazao ne qira go basoero ia God iri koego Judia.

²Era qa rove ramu qamu soko to tavisi, iago qa pepeu vazaka qamue de iri koego basoero na Masedonia. Qa vane qira dena, “Vakitakaro iri koego kena Akaia iri vanama bana meso tavisi pasi ave zago ne.” Ṉalu iri gata ramu qamu soko napua tavisi, topuna basoero na Masedonia iri kula mana tarina soso ne tavisi ria go.

³Iago era qa turine qira atu kapisa vakitaka nae de qamu koego, go pepeu vazaka qivae go remu sauna zazu igogo ne, tina pata ogoto, gerena so qa poro sine ne qira vano Masedonia, ramu qamu vanama taru so.

⁴Avigo, ṉalu basoero na Masedonia tara luluava go era, mana lama rove, ramu qamuki vanama kaega, ava tara lete goto ka agava qemu remu, tanego remu qi ruqe qamu, aria ramu do tamuna agava napu neso seko ro remu go.

⁵Iago qa nanao i tora tuna vagaretu kenaqa qira vakitaka ro ita dena de qamu koego ramu, mana vanama bana sosovolomo qamu pui bana ne tamuna soso nego. Go ṉalu tuna garetu doka go era, osina sosovolomo ro ramu tina vanama lupo bana to, ianae tina vasadake ramu qamu soko tane qamu soso nego mana kaega ka basoe i va tutobo qamue go.

⁶Nanaotarua ka basoe i leba go kavia paturu, tina toṉove kavia so pata lebaleba, ba iani leba go topuna paturu tina toṉove topuna pata lebaleba.

⁷Nogotona basoe mara soso ne sosovolomo ia valulu ze de i soko go nanao na, mara reqe me soko ia tanuna mana mara kula ne go. Tanego God i mamaligara ne basoe i kula, ṉalu i soso ne sosovolomo ia.

⁸Mana God tina teke vatopu ne qamu, sivala ne de qamu soko go, iago ramu tamuniki ara pusi ne kaega kapata.

⁹Gerena Buka tabo ne i sine go, “Ka basoe i lete soko go soso ne na tavisi ia, de iri koego vano iri situ go, zazu velaka ia basoe nae tiniki rove kaega lupo.”

¹⁰God i soso ne paturu na leba go, mana pata gege tatana ge go, tina soso napu ne qamu osina paturu qamu soko go, tina podo mana urena tina lete topu na reqe me God zazu velaka ro qamu zazu bana nego.

¹¹God tina va vavagado qamue ramu topuna pata, go ramu tamuna mazala soso taru ne sosovolomo ramu, go topu na basoero tarina seko velake God sauna sosovolomo ro ramu iri pala ze go deqi koego remu.

¹²Sauna zazu qamu zazu nego iki sauqira so kaega basoero situ ia God, do itavisi napu ne qira kerone basoero tarina seko velaka ne de ikoego God.

¹³Tanego i sauna zazu velaka ramu, topu na basoero iri vazakazaka ze God, tanego ramu qamu vaogote Tarama Velaka ia Jesu Kristo mana qamu vasadake go, qamu toqe ne soso na tavisi ramu de iri koego vano Judia mana kero ne basoero lotu go.

¹⁴Iago sauna mamaligara lavata ria de qamu koego ramu, ria tarina pepene ne qamu tanego God ivasadaka me mana ia de qamu koego ramu.

¹⁵Mata seko velaka zaqe God sauna sosovolomo ro ia de qata koego, sosovolomo ro imakuru go sine lupase na.