Read Varisi Qalesia 2 Bible Online

Qalesia 2 - Varisi bible

Qalesia 2

¹I sivala to manoga kavasi ave, qa lulua Banabasi qaru ule napu za Jerusalema mana qa pala napua Taetusi ilulu napu nava.

²Era qa zae de gogo ne, tanego God i vasadaka nava tuna za, mana qa vapepeu vamiki qira vano iri kenaqa ne go lotu mana qa sine vavelaka ne qira sauna Tarama Velaka qa tamana qirae go vano iriki Jiu go kaega. Tanego qa nanao iri niki vanoto, pata qa zazu bana ne, mana pata tunara zazu ne go.

³Aria Taetusi i lulu ava go, i valeke Qrik, do vano iri kenaqa ne go lotu iriki vatutubo ze kaega kosi.

⁴Do kakia ria basoero so iri poqe mana iri go iri vano lotu mana iri keba siko me deqi koego remu, tanego iri soko go mara kosia ia iri go, do basoero dena iri vano lama mimia siko so, de igogo ko talukasa reremu mana vari vakameka remu de ikoego Jesu Kristo. Iri soko mara vaseka qemue remu tamana ro ria.

⁵Do remu qimuki toqe ne kaega pataro iri soko go vakitaka poqepoqe ro nae! Pata qi soko go remu ne, seko ogoto na Tarama Velaka ne mare zadave de qamu koego ramu.

⁶Basoero nae iri mimia mazala, do iriki kavele kaega Tarama Velaka, qa seseko nego era. Patavolomo iri mazamazala ba kaega, era qaki vakapata qira so kaega. Tanego de ikoego God osiqira basoero i varitora lupo neso.

⁷Ria iri mia rove bana so God iteke nava go era, zazu go tuna tarama ne qira go vano iriki Jiu go kaega Tarama Velaka, gerena so iteke bana ne go Pita zazu go ia tina tamana qirae go vano Jiu Tarama Velaka.

⁸Tanego karaputa ia God i vine bana go Pita tina apostolo mana go tina zae de iri koego vano Jiu, gerena napu so ia i vine ava era go tuna apostolo mana zae de iri koego vano iriki Jiu go kaega.

⁹Jemisi, Pita mana Jon to iri mimia gere go vano iri kenaqa ne go lotu, go iri mia rove go God iteke nava go era zazu mazala qa pala go dena, iato go iri sikani qaru raru Banabasi, ilalana raru qaru zazu kamekae go de iri koego. Ianae go remu qimu varitoqe ne raru Banabasi taruna zazue de iri koego vano iriki Jiu go kaega, mana ria tarina zazue de iri koego vano Jiu go.

¹⁰Pata iri pene qarue go raru, maru nanaotaru qira vano situ iri koego Jerusalema. Pata nae to qalete pada ne go era zazu ne na.

¹¹Do ṉalu Pita ilamae Antiok, era qa lete seko lavate ia tarakenaqa qira vano lotu, tanego pata izazu ne go iki totoloṉo kaega.

¹²Tanego za ivae go Pita, iṉana tavisi qira vano lotu na Antiok, basoero dena iriki vano Jiu kaega. Do ṉalu Jemisi ituri ne qira qe kakiaro basoe Antiok, Pita i sareki mana iki ṉaṉa tavisi qira kaega vano lotu iriki Jiu go kaega, tanego basoero dena iri go, vano iriki Jiu go kaega, do lama lotu kristiano gogo ne tarina kosi bana so.

¹³Mana kero ne vano Jiu iri vaogoto go iri koego komala dena, iri lulu napua so de igogo Pita. Iago Banabasi do ilulu napua so de igogo kebu riria dena.

¹⁴Iago ṉalu era qa mia iriki lulua kaega de igogo totoloṉo na zuka na vaogoto na Tarama Velaka, era qa sine ne ze Pita tarakenaqa qira basoero topu. Qa go, “Aro qo valeke Jiu, do qo lulua go vatovato ria vano iriki Jiu go kaega mana ko aro do qoki gere qira kaega vano Jiu. Iago ava tina go tono vatutubo qirae vano iriki Jiu go kaega, go tarina lulua go vatovato ria vano Jiu na?”

¹⁵I pata ogoto remu qi podo basoe Jiu meto, do qimuki gere qira kaega vano iriki Jiu go kaega iri vasakata pata go.

¹⁶Do remu qi rove basoe iko totoloṉe de ikoe God, ṉalu i vaogote go Jesu Kristo, do iki reqeme kaega sauna luluna Tamana. Iago, remu vano Jiu do qimu vaogoto napua so Jesu Kristo, go ia God tina vatotoloṉo qemue deikoego Jesu Kristo, do iki sauna kaega luluna so pataro ni sine go Tamana. Tanego, kaega kaki basoe ni totoloṉoe go de ikoego God, ṉalu i lulua go so pataro ni sine go Tamana.

¹⁷Remu qi ruqe God, go timuna basoe totoloṉo, tanego qi vakameka ne Kristo. Do ṉalu basoero ne iri nanao remu qi vae Tamana, gere qira vano iriki Jiu go kaega, avigo i talupase Kristo tanego i zazue de qi koego, go qi vae go Tamana nae?

¹⁸Do ṉalu era qa pala napua go Tamana qa pero bana go, ianae era qa vasadake to qa kaki basoe qa vaeto Tamana.

¹⁹Tanego Tamana ivae ava era, go era tuna too e deikoego God. Iato nae tanego iri vae vale palu zave go era Kristo koluse ne.

²⁰Iago iki too era kaega tanuqu go qa too go dena, do Kristo i too e go loboroqu, mana iteke nava too iago.

²¹Era qaki kasia kaega mamaligara ia God. Do ṉalu basoe iko totoloṉoe de ikoe God sauna luluna so Tamana, ṉalu igogo nae, le ia Kristo i patavolomo so.