Read Varisi Epesus 1 Bible Online

Epesus 1 - Varisi bible

Epesus 1

¹Era Pol loborona soko ia God qa apostolo ia Jesu Kristo, qa karo ne qamu ramu vano na komala Epesus qamti vanadue go too ramu loborona Jesu Kristo.

²Go God Tamaqita mana Batu ita Jesu Kristo mara riru teke qamu Mana mana bule.

³Mata vazaka God Tamana Batu ita Jesu Kristo! Tanego loborona ko kameka ita de ikoego Kristo ia iva makaolo qita iteke ne madau qita osina sosovolomo na vudu rani ne.

⁴Tarakenaqana go iara vazaria go vudu pua, God i vine bana qita de ikoego Jesu Kristo go mata ko totoloṉo mana tabo, go mara kaega ne qita kebu tarakenaqana tanuna sauna mamaligara ia.

⁵God ivine bana ze de ikoego Jesu Kristo, iato tina lulu qita go tatana salero iago. Iato dena to ikutamana go pata ilete soko go God.

⁶Iago ita mata vazaka ze, God sauna Mana ia, mana karaputana mazala ia sauna sosovolomo na kameka Sale valeke ia iteke ne qita go.

⁷Tanego le ia Kristo i bauru ne qita, go qata talukasa go. Sauna ianae God i nanao ule ne vasakata pata ita. Avana to mamaligara lavata ia God de qata koego ita,

⁸go i vasadaka va velaka ne qita go osina tarove ia mana mimia rove iago.

⁹Tanego iva voto pata inanao bana mego mana i vasadaka ne qita nanao pipika ro ia itaru bana mego, mana i valupo ze de ikoego Kristo.

¹⁰Nanao dena tina lama vaogoto ze to ṉalu musaqara na ne. Iato tina teṉo lupo qira osina pataro i vazari zego.

¹¹Osina pata izazu ne go God i va lulu ze so nanao na mana vivine ia. God i vine qita qata basoero ia, loborona vari vakameka ita de ikoego Kristo. Tanego saunaa nanao lavata ia idegere so pata i vine bana mego kokosona bana me.

¹²Igo nae iago, remu qimu taru kenaqa ze go ruruqe remu de ikoego Kristo, mi vazaka karaputa mana menomeno ia God.

¹³Mana ramu napu to go qamu basoero ia God, ṉalu qamu qata go tarama ogoto ia ne. Iago Tarama Velaka tonae i pala ne qamu go vari vakavele. Ṉalu nae to ramu qamu vaogote Kristo, mana God i teke ne qamu Spirit tabo i pui ne go i sauna lalana go ia i tonovo qamu go.

¹⁴Spirit tabo iteke qita karaputana mazala, go ita tatana pala go pataro i piu bana ne qita go God. Mana ia i varove ogoto qita ita, God tina lukasa ogoto qira basoero iri ke iago. Iago ita mata vazaka God ni lete menomeno sivala go.

¹⁵Tanego sauna pata dena, pasi qa gata bana mego sauna vaogoto ramu de ikoego Batu Jesu, mana de iri koego basoero ia God,

¹⁶era qaki mamanava kaega seko velaka na de ikoe go God sauqamu ramu. Era qa nanaotaru qamue so ramu loborona pene era.

¹⁷Mana qa pene God, de ikoego Batu ita Jesu Kristo, sauna Tamaqita ni lete menomeno sivala go mara teke ne qamu Spirit tabo go mara vatarove qamu. Mana mara vasadaka ne qamu God go tamuna rove go ia.

¹⁸Qa pene God go mara papaqa nanao qamu go ramu muna mia tatavata ia, go ramu tamuna rove go ruruqe ikoru qamue tamuna pala go taramuzi na. Go tamuna mia rove go pata velaka sivala ro i pui ne qamu go ramu basoero ia ne.

¹⁹Mana de igogo ia, do ilete karaputa sivala zazu ia de gata koego ita qata vaogoto go. Karaputa ivazazu ze go de qata koego ita i varipada so karaputana mazala,

²⁰God i vazazua go i vatoo ze go Jesu tepa le ne. God ipala vapopoka ia mana i vakoloku ze tepa matauna tanuna tepa rani ne.

²¹Kristo i zakoe rani ne, mana i Batu sivala ne qira osiqira aqeloro mana osina karaputana zakazaka ne, mana vitoṉona Kristo i lete sivala ne osina to vitoṉo i ko go karaputa na, iri koego vudu pua ninidena, mana vudu tinara za lama go.

²²God i taru ze polana makena Jesu osina pataro ne, mana i teke napu ne ia eklesia go tina kuzuku ne go, mana i Batu lavata sivala ne go osina pata ro go.

²³Eklesia i tokamana to tanuna Kristo. Iato izazu lupo ne go osina pataro sauna Kristo, gerena Kristo tanuna izazu lupo ne go osina pataro na osina dia ne.