Read Varisi Epesus 5 Bible Online

Epesus 5 - Varisi bible

Epesus 5

¹Pasi me ṉalu ramu qamu salero ia God, ia ilete mamaligara ne qamu, iago ramu muna pada ne ko gere ia.

²Mamaligara to mara kenaqa ne go too ramu, gerena Kristo i mamaligara ne qita, mana iteke ne qita too, gerena kameka sosovolomo i nonoli meno, mana God ikula ne komakoma nae.

³Ramu qamu basoero ogoto ia to God, iago iki tora kaega ramu muna poro pepeua go pata sakataro gerena, varivagabu ba zazu nena vatovato iri gere go too ria pata qaraqara ro, mana sokona pala na patapata ro ria basoero ne.

⁴Iki tora kaega ramu muna sine go kaki seko sakata, ba seko qiso i sakata go gata na, do pata muna zazu ne go muna seko velaka zaqe God.

⁵Qamu rove bana ramu, basoero iri varivagabu go mana zazu ne pata sakata ro napu gogo ne, basoero nae i kaega ne qira ka de koko too de ikoego vari miasoka ia Kristo mana God go. Gere napu qira so vano iri qora ne patapata ro ria basoero ne. Basoe igogo nae too ia, i vazaka god poqepoqe.

⁶Kasi toqe ne na basoe go mara vasoru qamue go seko bulabulaṉoe ro. Tanego pataro dena to tina valame go muma ia God, de iri koego ria iriki lulua go kaega vatovato ia.

⁷Iago, kasi vakitaka qira basoero igogo nae too ria.

⁸De bana ne to ramu qamu koego rodoko, do pasi qamu lama basoe ia Batu ne, ramu qamu koeto loborona tatavata. Iago muna ko gere qira basoero iri koego tatavata.

⁹Tanego tatavata i vasadaka me soso sinaqe na velaka, totoloṉo, mana ogoto.

¹⁰Iago pada ne rove na pataro i vakula go Batu ne.

¹¹Kasi zazu nena pata volovolomo ro iri zazu ne go basoero ne, tanego pataro nae iri pata sakata na so rodoko. Iago pada ne vasadaka ne qira basoero ne patana tatavata.

¹²Iva agava napu qita so tane ṉalu qata pepeua go pataro iri zazu pipika ne go basoero ne.

¹³Do ṉalu tatavata tina vasadaka me osina pata, basoero ne tarina mia rove qira basoero nae.

¹⁴Tanego pata iri mia rove go to basoero ne i reqeme go tatavata. Iato go i sine go, “Muna dogara ramu qamu kamuku go, mana Kristo tina teke ne qamu tatavata go.”

¹⁵Iago, muna miasoka de igogo too ramu. Kasi gere qira vano bulabulaṉoe, do muna ko gere qira vano tarove.

¹⁶Tanego ninidena too sakata ikone karaputa, iago muna vazazu velake desuka ṉalu velaka ro qamu pala go.

¹⁷Kasi ko bulabulaṉoe, do pada ne nanao rove na pata i soko qamue go Batu ne tamuna zazu ne go.

¹⁸Kasi vabulabulaṉoe qamue loka sakata karaputa ro, qamu ge go tanego tina vasakata qamu, do muna vapurake Spirit tabo.

¹⁹Ṉalu qamu vari seko tabe go, muna vari seko tabe ne seko na Sam, vae kera na lotu, mana va kera seko na Buka tabo. Mana ṉalu qamu kera go, muna kera vazaka ze Batu ne loborona puṉuqamu.

²⁰Mana loborona vitoṉona Batu ita Jesu Kristo, osina ṉalu mata teke ne seko velaka sauna osina pataro de ikoego God Tamaqita.

²¹Loborona vabatu ramu de ikoego Kristo, ramu muna vari vamazalae napu tanuqamu.

²²Qolero busi muna vamazala qira valekero ramu gerena qamu vamazale go Batu ne.

²³Tanego valeke, i karaputa sivala ne qole ia, gere Kristo i karaputa sivala ne go eklesia ne. Eklesia neto i tokamana go Kristo, tanego Kristo i vakavele bana ia.

²⁴Iago, qolero busi mara vamazale valekero ria, gerena eklesia i vamazale go Kristo.

²⁵Ramu valekero busi, muna mamaligara ne qira qolero ramu, gerena Kristo i mamaligara nego eklesia ne. Iato go i vamao go vae vale na tanuna go tina tavisi ne eklesia ne,

²⁶go eklesia ne tina tabo go. Ia iva vorua eklesia ne, ṉalu i saboro ze ia loborona besi mana i sine vasadake go seko ro ia.

²⁷Tanego ṉalu Kristo i valame zego eklesia ne de ikoego, i soko eklesia ne mara mimia velaka, mana mara kaega to kaki sakata mara doka go, do mara totoloṉo velaka so.

²⁸Valekero muna mamaligara ne qira qole ro ramu, gerena qo mamaligara ne go tokamamu tanumu. Ṉalu kameka veleke i mamaligara ne go qole ia, ia i mamaligara ne to tanuna.

²⁹Kaega kaki basoe i soko go vasakate na tokamana tanuna, do ia iva ṉaṉa mana i miasoka va velake tokamana. Gerena to Kristo i miasoka velake go eklesia.

³⁰Iago, ita to vano lotu qata paqarana go tokama Kristo.

³¹Gerena Buka tabo ne i sine, igo, “Sauna vatovato dena valeke tina kasi ne tamana, mana sinana mana lama kameka e de ikoego qole ia, mana riru iru lama gerena kameka basoe to.”

³²I lete lavata sivala to nanao pipika i sadaka mego loborona seko pipika dena, iago era qa mia rove ia i seko ne Kristo mana eklesia ia.

³³Do seko dena i garetu napue so de qamu koego ramu. Iago osina valeke ro busi muna mamaligara ne qira qolero ramu, gerena qamu mamaligara ne tanuqamu, Mana qolero busi muna vamazala qira valekero ramu go.