Read Varisi Pilipae 1 Bible Online

Pilipae 1 - Varisi bible

Pilipae 1

¹Pol mana Timoti, karua basoe zazu ia Jesu Kristo, iru karo go leta dena, de iri koego basoero ia God iri koego Pilipae, ria iri kameka ego Jesu Kristo, ria napu batubatu na lotu mana vano iri zazu tavisi go.

²Go God Tamaqita mana Batu ita Jesu Kristo mara teke ne qamu vatabo mana ko bulebule ia.

³Osina ṉalu qa nanao soba qamu, era qa seko velaka ne God.

⁴Osina ṉalu qa pene ne qamu, qa pene e loborona kulakula,

⁵tanego ramu qamu tavisi velaka nava era, vatatavata na tarama velaka ne, pasi me musaqara kenaqa era qa lama doka mana i doka to ninidena go.

⁶Iago era qa vaogote, God ni vatupia go zazu velaka dena loboro qamu, tina pala somaso go tina za doka so ṉalu tina za ule mego Jesu Kristo.

⁷Ramu qamu ko tarue so puṉuqu era osina ṉalu, iago itora era ma nanao vane qamu ramu dena. Tanego ramu to qamu tavisi navae go era zazu mazala dena i teke nava go God, patavolomo ninidena qa koego bara dena mana ṉalu qa ko talupasa bana go, era qa degere ne tarama velaka dena go tina sadakae de iri koego basoero sauna vanadu na vaogoto ria.

⁸God i rove, era qa sine seko i ogoto go, ṉalu qa sine, era qa lete nanao qamu ramu, gere so nanao i reqe mego puṉuna tanuna Jesu Kristo.

⁹Mana iato dena pepene era, go mamaligara ramu tina podo popoka osina ṉalu, loborona tarove mana vivine totoloṉo.

¹⁰Go ia ramu tamuna vine pata i lete velaka sivala go, go ramu tamuna dalo mana kaega kaki pata tarina va pala qamu e, go tina doka go musaqara ṉalu Kristo tina za ule napu me.

¹¹Too ramu mara purake vatovato totoloṉo i reqe me Jesu Kristo, go topu ria basoero tarina padapada mana vazaka God.

¹²Ramu turaquroe, era qa soko ramu tamuna rove pataro i doka va go era, iato i lete tavisi ogoto nava sauna va zazao na tarama velaka ne.

¹³Iato go, osiqira ria iri koego pade batubatu ne, vano soldia ria mana basoero topu go, iri rove era qa koe bara ne, tanego qa basoe zazu ia Kristo.

¹⁴Ko qa vae go era bara ne, i teke qira vakitaka ro era karaputa mana nanao vamazala de ikoego Batu ne, iato go iri ko talasara ne, sine vasadake na Tarama Velaka ia God, mana iriki ara sareki kaega go.

¹⁵Pataogoto kakia ria iri tamana ne Kristo tanego iri qora nava era mana kavia ro ria iri vari valegu e deqa koego era, do kavia napu ria, iri tamana ne ia, tanego iri soko tavisi.

¹⁶Ria dena iri tamana e loborona mamaligara, tanego iri rove God i teke bana nava era, zazu go tuna degere ne tarama ne na, tarama velaka ia.

¹⁷Kakiaro ria iriki Tarama Velaka ne kaega Kristo, do iri vazakanapu neso, mana iri soko so basoero ne tarina mia vamazala qira, iri nanao tarina zazu ne topuna pataro tina vamakuru ava go era, torana ṉalu qa koego bara ne.

¹⁸I patavolomo so, i totoloṉo ba i kebu vatovato ria, vano iri tarama ne, ba sine vasadaka ze Kristo loborona de iri mazala go, iago era qa kula, tuna kula taru so.

¹⁹Tanego era qa rove, loborona pepene ramu mana vari vatatavisi i reqe me Spirit ia Jesu Kristo, era tuna talukasa.

²⁰Soko era mana ruruqe ogoto ia puṉuqu, era tuniki vana ne kaega zazu era ninidena, mana qa soko napua karaputa gere na to ninidena qa koego bara ne. Osina too era mara sadaka me mazala ia Kristo, ṉalu era tuna too ba tuna le.

²¹Avana tane i talupase go, qata too go? De qakoe go era ne, Kristo i too era, go ṉalu tuna le, tuna pala topu na pata ni velaka sivala.

²²Do ṉalu era qa too, qa mazala zazu napu ne zazu velaka, ade ke tuna vine go.

²³Era qaki rove kaega ade ke tuna lulua go, do era qa lete soko, ma kasi ne too dena mana ma ko tavise Kristo, iato i pata velaka sivala go.

²⁴Do sauqamu ramu, era tuna too, go tuna tavisi ne qamu go.

²⁵Era qa rove velake, mana qa rove tuna ko, go tuna ko tavisi qamu osiqamu, go tuna vapopoka mana valavate go kulakula ramu loborona vaogoto ramu, de ikoego Kristo.

²⁶Iago ṉalu era tuna garetu ko tavisi napu qamu, kula ramu de qakoe go era mara zaza popoka, iago loborona too ramu, muna ko vakamekae loborona Jesu Kristo.

²⁷Pata tina lavata sivale de qamu koego ramu, de igogo koko ramu muna vasadake de igogo tatalina too i tora go Tarama Velaka ia Kristo. Go ṉalu tuna garetu mia qamu ba qaki garetu kaega, era tuna gata zatu so, ramu qamu degere vanadu mana kameka vato, mana qamu vari vatatana neso kameka pata, sauna so vaogote na Tarama Velaka ne.

²⁸Muniki sareki ne qira kana ro ramu, do muna vanadu osina ṉalu, mana iato tina vasadaka ne qira, ria iri nala mana ramu qamu karaputa, tanego tanuna God, ivakaraputa qamu.

²⁹Tanego God i teke bana ne qamu, ramu tamuna zazu ne zazu ia Kristo, iki sauna so kaega go qamu vaogote ia, do i palu zato makuru ro qamu soba go, tanego i sauna ia.

³⁰Ninidena ramu qamu mazala varitara tavisi ava era, i varipadana so varitara qamu mia go, era qa varitara bana nego, mana iato qamu gata bana go, mana ke qara varitara ne go ninidena go.