Read Varisi Pilipae 2 Bible Online

Pilipae 2 - Varisi bible

Pilipae 2

¹Ṉalu too ramu i koe loborona Knsto, lato ivakaraputa qamu, mana mamaligara ia iva momotono qamu go. Ramu qamu vari vakameka e de koe Spirit tabo, ramu qamu vari vatatavisi mana varinanao tanuqamu.

²Ṉalu igogo nae, era qa pene vamoqere qamu muna va voto kula era ṉalu qamu pala kameka nanao, mana vari soso ne kameka mamaligara, kameka madau mana nanao.

³Kasi nanao na osina pataro mamu zazu va miki neso tanuqamu, ba vazakazaka na tanuqamu, ba vakanata volomo. Do muna ko qoqoro, vari padae de iri koego kero ne basoero ne.

⁴Kasi taqi na pata tina tavisi ne qamu tanuqamu, do muna taqia pata tina tavisi ne qira kero ne basoero.

⁵Vatovato dena mara koe de i koe Kristo,

⁶Ia i varipada so too ia de ikoego God. Do iki nanao vanadu ze kaega ko ia, go mara varipadae de ikoego God.

⁷Do Jesu i taru lupo osina pataro i toṉove go, mana i lama gere kakibasoe zazu. I lama podo gerena so basoe mana i sadaka me gerena so basoe na pua dena.

⁸Ia ivaqoqore tanuna, mana i goe zuka na va vaotovo, go i doka so le ia koluse ne.

⁹Tanego sauna to iadena, God i pala va popoka zaqe ia zakazaka ne, mana i teke ne ia vitoṉo, i sivala ne osina vitoṉoro.

¹⁰Iago, ria aqelo ro na rani, osiqira basoero na pua ne, mana ria iri le bana go, mara koloku tutuṉu mana va batua vitoṉona Jesu.

¹¹Osina basoero mara sine vasadake, “Jesu Kristo i Batu, go kero ne basoero tarina vazaka God Tamaqita.”

¹²Iago, turaquroe, ramu qamu vaogoto taruava era ṉalu qa ko tavisi qamu go, iago i lete velaka sivala ramu muna vaogoto ava era ninidena ṉalu qa kasi ne qamu, loborona zazu ramu muna, sareki mana momokolo, go tamuna va lupo go vari vakavele ramu.

¹³Tanego God i zazu tarue loboro qamu ramu, go mara vamazala qamu go muna toqe ne mana lulua vatovato ia tanuna.

¹⁴Muna zazu ne osina pata, do kasi poro vari valegu, ba poro seko,

¹⁵go tamuna ko totoloṉo mana voru gerena salero velaka ia God, iri koego vudu pua i lete sakata mana basoero iri koego iri vatovato sakata. Ramu tamuna damara gere domiri i tatavata ego zakazaka ne, de iri koego basoero ne,

¹⁶mana ṉalu qamu teke ne qira tarama na too, ṉalu ramu qamu zazu ne, era tina zari nava pata tuna kula ne qamu ego ramu ṉalu musaqara Kristo tina lama napu, tanego tina vasadake osina zazu ro era tiki vana volomo kaega.

¹⁷Vaogoto raramu de ikoego God, i gere kaki sosovolomo ramu, qata teke zaqe go God. Ṉalu tara vae vale ava era, mana parasaqu tara tazele mana palua sosovolomo ramu, ṉalu nae era tu kula mana tuna kena ze kula era de qamu koego osiqamu go.

¹⁸Gerena napu so ramu, tamuna kula mana kena ze kulakula ramu deqa koego era go.

¹⁹Ṉalu go i soko ia God, qa nanao tiniki umata kaega tuna turi ne zatu Timoti de qamu koego ramu, go era tuna talasara ṉalu tuna gata go tarama qamu ramu.

²⁰Tanuna so Timoti, i pala go nanaoqu era, mana i kameka ego de qa koego era, mana i lete nanao qamu go.

²¹Osiqira ria kero ne basoero, iri taqia so pata iri soko ne tanuqira, ba pata i soko go Jesu Kristo, iriki zazu ne kaega.

²²Mana ramu qamu rove tanuqamu de igo ia ivasadake go ogotona mazala ia, de go raru qaru gere tatamana, kameka zazu ne sauna Tarama Velaka.

²³Iago ṉalu era tuna rove pata tina dokae de qa koe go, era tuna turine zatu ia, de qamu koego ramu.

²⁴Mana loborona ruqe era de ikoego Batu ne, tiniki umata kaega, tanuqu tuna garetu e de qamu koego ramu.

²⁵Era qa nanao itora tuna turi vaule zatu vakitaka ita Epaparoditus, qamu va lame ze de qa koego era, go i zazu tavisi ava, mana i varitara tavisi ava go dena.

²⁶Ia i lete soko tina miasoba qamu ramu, mana i lete maqata ṉalu ia i rove ramu qamu gata bana mokoso i vaego.

²⁷I pata ogoto ia i lete mokoso mana i garogaro le. Do God i nanao ia, mana iki tanuna so kaega ia, do i nanao napu ava era, mana i sida maqata lavata nae tina dokae de qa koego era.

²⁸Iago era qa lete soko ne tuna turine zatu ia, deqamu koego go tamuna kula ṉalu qamu miasoba ia, mana maqata ro era, tina kuziki lupo.

²⁹Kula ṉalu qamu miasoba ia, tanego Epaparoditus i vakitaka ita loborona Batu ne. Muna vasadaka ze padapada de iri koego kero ne basoero iri gere go ia,

³⁰tanego ia, i teke too ia mana i garogaro le ne, sauna zazu ia Kristo, i zazu ne osina pataro dena, go tina tavisi navae era kakiaro zazu ni makuru qamu go ramu tamuna tavisi navae go.