Read Varisi Pilipae 3 Bible Online

Pilipae 3 - Varisi bible

Pilipae 3

¹Valupolupo na turaquroe! Muna ko kulakula, loborona vari vakameka ramu de ikoego Batu ne. Era tuna sine patu napua so, pataro qa karo bana ne qamu go, mana go tiniki doka qamu go kaega kaki pata makuru.

²Miasoka tanuqamu, de iri koego vano iri zazu ne go vatovato sakata, vano iri gere qira sika ro, mana ria iri toqe nego tarina kosi va takaba go tokamana qira.

³Iki ria kaega, do ita to qata pala go vari kosi ogoto, tanego qata vazaka God loborona Spirit ia, mana qata kula ne too ita loborona vari vakameka ita de koe Jesu Kristo. Ita qatiki ara vaogote kaega kaki zazu i sadaka mego tokama.

⁴I pata ogoto, tanuqu so era qa mazala go vaogote na pata nae. Do ṉalu ka basoe i nanao i mazala go vaogotena zazu ro i sadake go tokamana ne, era do i konava so pata go qa mazala sivala ne nanao nae.

⁵Era qa kosi taramuzina kavitu musaqara, vanovano era iri vano Izirel, qa reqe me sinaqe ia Bejamani, qa parasa totoloṉo na Iburu, qa zazu ne osina pata ikoego tamana ro ria vano Jiu tuna lulua, tanego qa valeke Parisio.

⁶Mana qa lete osaka ne zazu na Tamana, iago qa vasasakata ne eklesia ne. Do ṉalu kaki basoe i mazala nanao vatotoloṉo na vatovato na tamana ro dena, era ne qaki kebu kaega.

⁷Do osina pataro nae era qa pala lupo bana, ninidena qa vana valupo neto tanego era qa lulua to Kristo.

⁸Iki pata nae so kaega, do osina to pataro qa zazu bana nego, qa vana lupo neto, go tuna toṉove go pata ni lete lavata sivala go volina, iato tarove ia Jesu Kristo Batu era. I sauna ia, era qa vana lupo ne osina pata qa nanao iki tora to kaega babanane na, iago qa nanao va gere ze uzaka osina pata, go era qa mazala pala na Kristo.

⁹Mana ma ko kameka e de ikoe ia. Era i kaega nava ka totoloṉo tanuqu, gerena mimia na basoe i lulua go Tamana. Ninidena era qa pala too totoloṉo i teke nava God loborona ruqe na Kristo, vaogoto ireqe me God, i kutamana vaogoto.

¹⁰Pata qa soko go era, rove na mana nanao rove na de go karaputa na too napu ia Jesu tepa le ne. Ma kena tavise vokara ia, mana ma gere ia i le go.

¹¹Loborona ruqe era nae, era tanuqu ma too napu me tepa le ne.

¹²Muniki nanao ramu, era qa va lupo bana osina pata, qa velaka ba totoloṉo bana. Do Kristo i pala taru ava era, iago era qara teteṉe so, mana qa lete pada ne tuna za doka ego lala ne.

¹³Pata ogoto, vakitaka ro era, muniki nanao ramu era qa pala bana sasarapaqu, do kameka pata so qa zazu ne, era qa nanao kasupe lupo ne osina pataro ikoego taramuziqu, mana qa pada ne go maza dokae pata iara ko mego tarakenaqaqu.

¹⁴Iago era qa lete pada ne teteṉe totoloṉo za lala ne, go ma pala sasarapaqu, iato i koru ia God, iva goe ze Jesu Kristo, too ogotona vudu rani ne.

¹⁵Osiqita ita i kazigarata go too na madau qita, mata pada ne pala na kameka nanao. Do ṉalu kakiaro ramu qamu pala go nanao kakavata, God tina va tatavata ne qamu.

¹⁶Patavolomo igogo nae, ita mata, lulua so, Tamana qata lulu bana go, go i doka go ninidena.

¹⁷Vakitaka ro era muna vapadapada de qa gogo era, mana lulua de iri gogo ria iri zazu ne vato totoloṉo, gere na so de qa va mia qamu e go era.

¹⁸Qa sine bana ne qamu topuna ṉalu pataro dena mana ninidena i sone to mataqu qa sine patu napua, iko topu ria basoero iri kana ze too ria vaogoto na le i vaego Jesu koluse ne.

¹⁹Ria nae ne, tarina va lupo ze nako ne, tanego iri va god napua pata i soko go tokama qira. Iri kula sivala ne pata i tora go tarina agava ne, mana iri nanao so pata na ro pua dena.

²⁰Do ita qata basoero na rani ne, mana qata piri ne ia tina bauru ne qita. Batu ita Jesu Kristo, tina za qoqoro me rani ne.

²¹Ia tina kavale too memelaka na tokama qita, mana tina va gere ze tokamana tanuna ni velaka mana tabo go. Tina vazazua karaputa ia, go osina pata tina koe so polana vari miasoka ia.