Read Varisi Kolosia 1 Bible Online

Kolosia 1 - Varisi bible

Kolosia 1

¹Era Pol loborona soko ia God, era qa apostolo ia Jesu Kristo mana vakitaka ita Timoti go.

²De iri koego baso basoero ia God iri koego Kolosia, ria iri vakitaka velaka garu loborona ko totoloṉo ria loborona vari vakameka ria de koe Kristo. Go God Tamaqita mara teke ne qamu Mana, mana ko bulebule ia.

³Qi seko velaka taru zaqe God, Tamana Batu ita Jesu Kristo. Osina ṉalu gi pene ne qamu.

⁴Tanego qi gata de go vaogoto ramu de i koe go Jesu Kristo, mana de go mamaligara ramu de iri koego baso basoero ia God.

⁵Ṉalu tarama ogoto mana Tarama Velaka go i garetu doka kenaqe de gamu koego ramu, ramu qamu gata bana pata qata mazala pala zena Tarama Velaka igogo ne, tanego vaogoto mana mamaligara i kutamana to pata qamu ala ne go, pata igogo ne iato i soti vanadu ze God tepa rani ne.

⁶Tarama Velaka i valame tarua makaolo mana i zadavae kolabana pua ne, gere na so de igogo lama doka kenaga i vae go de gamu koego. Ramu, qamu gata go de igogo Mana ia God, mana gamu rove go pata i ogoto go.

⁷Ramu gamu rove Epaparasi i vatatana bana gamu e ramu de go Mana ia God. Ia i vakitaka remu, i osaka ne zazu ia Kristo, mana i zazu tavisi gemu remu go.

⁸Iato i sine ne qemu remu de go mamaligara ia Spirit ni teke ne qamu, go gamu mamaligara ze God, mana basoero nego.

⁹Tanego sauna to pataro igogo ne, remu qi pepene ne qamu, tupi me ṉalu qi gata soba go de qamu gogo ramu. Qi pene God go mara va puraka ze de qamu koego ramu rove na pataro i soko go, tanego osina tarove mana nanao rove i rege me so Spirit ia.

¹⁰Go tamuna mazala ko gerena de i soko go Batu ne, mana tamuna mazala vakula na iago. Too ramu tina vasadaka me topu na too mana vatovato velaka, mana ramu tamuna rove velake de igogo God.

¹¹Remu qi pene God go mara va moqere qamu e, osina karaputa i reqe mego Karaputa mazala ro ia, go laborona zazu ramu tamuna mazala vasivala nena osina pata makuru ro loborona nanao velaka ramu.

¹²Mana loborona kula ramu, muna seko velaka zage Tamaqita, ia i mia va tora qamu e ramu pala tavisi na todo qamu pata i sotia go God i taru bana ne qira go basoero ia loborona de ikoego tatavata ia God.

¹³I vakavele qita e karaputa ia rodoko mana i vadoka velaka qita e de ikoego vari miasoka ia kameka Tuna,

¹⁴de koe ia ita qata kavele, iato go vasakata pata ro ita i talupasa go.

¹⁵Kristo i gere so God, do qata mazala mia na, do God qatiki mazala kaega mia na. Kristo i kameka sale kenaga ia God, i lete mazala sivala ne osina ro pata i vazaria go.

¹⁶Tanego loborona Kristo, God i va zaria osina pataro ikoego rani mana pua, pataro qata mazala mia na mana pataro qataki mazala go kaega mia na, gere qira batubatu ro, vano vatovato, mana vano kenakenaqa go. God iva zaria kolabana pua dena loborona Kristo mana kolabana pua de i ke ia Kristo.

¹⁷Kristo i ko bana so tarakenaqana iara zari go osina pataro dena, mana loborona vari va kameka de koe ia osina ro pata i tavine bana so de tarina koego.

¹⁸Iato i kuzuku na go tokamana eklesia ne, mana iato i kutamana eklesia ne go. Iato i sale podo kenaqa ia i too kenaqa me tepa le, go tanuna so ia tina pala go de koko kenaqa. Sivala ne qira kero ne pataro.

¹⁹Tanego i sauna vivine ia God, sale ia tanuna i gere ogote dego God.

²⁰De ikoe Tuna, God i nanao tina pala vaule ze kolabana pua loborona le ia Jesu koluse ne. God i va bule napu ze de ikoe tanuna, de iri koego basoero topu, mana iva kameka napu ne tanuna osina pata, basoe mana osina pataro na rani mana pua go.

²¹De ilupo bana me, ramu qamu laqalaqa ne God mana qamu kana ne ia, tanego sauna vatovato sakata qamu zazu ne mana qamu nanao go.

²²Do ninidena, loborona basoe ogoto ia Jesu, mana ni le go, God i vine qamu tamuna vakitaka ia, go ramu tamuna tabo, dalo, mana tina kaega ne qamu kebu, tarakenaqana ia.

²³Ramu muna degere vanadu mana lulua de go vaogoto dena, mana kasi va malumu na tanuqamu mara vizua go soko qamu pala go, ṉalu qamu gata go Tarama Velaka mana iato Tarama Velaka dena, era Pol qa basoe zazu na, iato qa tarama ze go osina dia kolabana pua ne.

²⁴Ṉalu ninidena era qa kula ne vokara qa pala go sauqamu ramu, tanego talupasa na vokara na tokamaqu, era qa tavisi valupo na pata iara ko sivale go vokara ivae go Kristo, i tokamana, go eklesia ne.

²⁵God i vine ava era, qa basoe zazu na eklesia ia, i teke nava era zazu go tuna vasadake sauna velaka qamu ramu. Iato sine vasadake na tarama ia dena

²⁶iago pata i pika bana me ze go, de iri koego basoero ne, ninidena i vasadaka ze de iri koego basoero ia.

²⁷Nanao ia God isoko tina va vatatavata me pata i pika ne qira go basoero ia. Vavagado mana mazala i pika go dena i soko teke ne qira basoero topu. Iato dena pata i pika go, Kristo i koe loboro qamu, talupasana igo de, ramu qamu mazala to pala tavise na menomeno mana karaputa ia God.

²⁸Iago qi tarama ne de go Kristo de iri koego basoero ne. Osina tarove qi mazala go, qi vabanabana qira mana vatatana qira, go osiqira tarina lama e tarakenaqana God, go tarina pala go too kazigarata loborona vari va kameka de koe Kristo.

²⁹Go tina zazu go pata dena, era qa lete zazu vokara, qa va zazua karaputa lavata i sosovolomo nego Kristo, mana iato i zazu ego de qa koego era.