Read Varisi Kameka Tesalonika 3 Bible Online

Kameka Tesalonika 3 - Varisi bible

Kameka Tesalonika 3

¹Iago, i makuru qemu timunara piri napu go, tanego qi lete soko garetu mia qamu ramu, iago remu tarapisa qi vine, raru Saelas taruna ko sivale go Ateni.

²Do, Timoti qaru turine zatu go tina garetu go, tanego ia i kakia basoe zazu ia God tina tarama ne go Tarama Velaka sauna Jesu Kristo. Qaru turine zatu iago tina vakaraputa, mana tavisi ne vaogoto ramu.

³Niki go kakiaro ramu vana ne vaogoto ramu sauna makuru ro qamu soba go nae. Tanego ramu qamu rove velake makuru ro dena i lulua vatovato ia God de qata koego ita.

⁴Tanego ṉalu remu qimu ko tavisi qamu go, qimu sine bana ne qamu, ita tatana soba makuru de iri koego basoe ro ne, muna rove, pataro dena tina sadaka ogoto me.

⁵Ia to nae tago qa turine zatu go Timoti go mara garetu rove vaogoto raramu. Era qa nanao vokara ne, Satana niki pada ne qamu ramu, niki go osina zazu ro reremu za patavolomo so go.

⁶Torana dena Timoti iza ule me de qemu koego remu, mana i pala me tarama vari vakula sauna vaogoto raramu, mana de go qamu mamaligara ne qira go basoero ne. Mana i sine napu ne qemu de igogo qamu nanao vamazala qimu remu, gerena so remu qimu soko go mia qamu ramu.

⁷Iago turaquro, osina makuru mana vokara ikoego de qi koego remu, i lama vatalasara qemu to Tarama Velaka na vaogoto raramu.

⁸Ninidena remu qimu ara sasavegolo meto, tanego qi rove qamu ko vanadue de ikoego Batu ne.

⁹Ninidena remu qimu seko velake God sauqamu ramu. Qimu seko velake ia sauna kula qimu pala qamue go ramu tarakenaqana ia.

¹⁰Osina musaqara mana kuse qimu pene iago mi garetu reṉa paqala ne qamu to ramu qimu go, go mi teke ne qamu pata qamu ara soko napua go sauna vaogoto ramu.

¹¹Go God Tamaqita mana Batu ita Jesu Kristo ina kenaqa ne zuka go remu timuna garetu mia napu qamu go ramu.

¹²Mana Batu ita Jesu mara vazazao popoka vari mamaligarae ramu, de iri koego kero ne basoero, gerena mamaligara reremu ikoego de qamu koego ramu.

¹³Loborona to zuka dena, nanao qamu tina karaputa napu. Mana ṉalu Batu ita Jesu Kristo tina ule palu me qira basoero ia, ramu tamuna degere tarakenaqana God Tamaqita, tanego too ramu i velaka mana tabo go.