Read Varisi Karua Tesalonika 1 Bible Online

Karua Tesalonika 1 - Varisi bible

Karua Tesalonika 1

¹Era Pol, Saelas mana Timoti qimu karo ne qamu ramu vano lotu qamu koe go komala Tesalonika qamu basoero ia God Tamaqita mana Batu ita Jesu Kristo.

²Go God Tamaqita mana Batu ita Jesu Kristo mara teke ne qamu Mana mana bule ia.

³Turaquro, osina ṉalu remu timuna seko velake God. Itora remu timuna zazu ne, tanego vaogoto raramu i zaza popoka taru osina ṉalu, mana vari mamaligarae ramu tanuqamu i karaputa.

⁴Iato go remu qi vazakanapu ne qamue go de iri koego vano na eklesia ne. Tanego iri vasasakata ne qamu mana qamu soba makuru, do ramu qamu degere vanadue loborona vaogoto ramu.

⁵Osina pata ro dena i vasadake varitanae ia God de iri koego basoero ne itotoloṉo, mana urena pataro dena, ramu itora qamu to pala na Too ikoego vari miasoka ia God, sauna vokara ro ramu.

⁶God i zazu ne pata totoloṉo, ia tina va vokara qira ria iri va vokara qamu go ramu.

⁷God tina valupo vokara na kimata qamu pala go ramu mana remu ninidena, ia tina zazu ne ia dena, ṉalu Batu ita Jesu Kristo tina za qoqoro me tepa rani ne, mana tina lulu qira me aqelo mazala ro ia,

⁸tina pala me nako ugulu, go tina vakimata qira basoero iri legulegua go God, mana ria iriki lulua kaega Tarama Velaka ia Jesu Kristo Batu ita go.

⁹Mana vokara na kimata tarina pala go, tina lete vasakata sivala qira, mana tiniki rove to kaega lupo. Tarina ko kakavatae de ikoego Batu ne, mana tariniki mia to kaega menomeno na karaputa iago.

¹⁰Ṉalu ia tina lama go musaqara nae, Osina basoero ia tarina vazaka ia, mana basoero iri vaogote go ia tarina lete va batua ia, ṉalu nae. Mana ramu napu to go tamuna ko tavisi qira ria, tanego qamu vaogote Tarama Velaka ro qimu sine ne qamu go.

¹¹Ia tonae tane osina ṉalu remu qimu pene ne qamu go ramu. Qimu pene God ita go mara vatora qamue ramu too ni koru bana qamue go tamuna pala go. Qi pene, go ia mara vazazua karaputa ia, go mara voto lupo osina pata velaka ro qamu soko go, mana valupo to zazu ireqe mego vaogoto ramu.

¹²Loborona to vatovato dena, vitoṉona Batu ita Jesu Kristo tina pala ze vazaka de qamu koego ramu. Mana ia tina vazaka vitoṉo qamu ramu go, loborona Mana ia God Batu ita, mana de ikoego Batu ita Jesu Kristo.