Read Varisi Karua Tesalonika 2 Bible Online

Karua Tesalonika 2 - Varisi bible

Karua Tesalonika 2

¹Sauna lama napu na Batu ita Jesu Kristo, go tatana kameka teṉo tavise go ia ne, qa pene vakaraputa qamu turaquro.

²Ramu muniki bulaṉoe ne gata na seko ro ria basoero tarina poqe qamue go, tarina sine musaqara ia Batu ne ilama bana to, tarina go Spirit tabo tane i sine go ba remu tane qimu karo ze kakia leta remu tarina vane qamu.

³Muniki vamao ne qira basoero ne mara poqe qamu, tanego musaqara muzimuzi tiniki lama volomo kaega. Kenaqana ne basoero ne tarina varitarae de ikoego God, mana basoe iri vitoṉo ze, “Basoe vae tamana”, tina za lama kenaqa napu go. Basoe nae to, God tina lete vasakate go.

⁴Ia tina seko vasakata lupo qira osina ro pata iri vazaka go vano basoe mana beku ro ria go, tina taru vazakazaka so vitoṉona tanuna. Ia tina za kolokue Pade Lotu ia God, mana sine vasadake tanuna ne to i God go.

⁵Avigo qamuki nanao tarua kaega pata ga sine bana ne qamu go torana kotavisi qavae qamu go era?

⁶Ramu qamu rove bana, karaputa ni sida bana go, basoe vae tamana dena, go iki lama sadaka bana go kaega. Do ia i ko, ṉalu ia tinara lama sadaka.

⁷Karaputa ia basoe vae tamana dena, i zazu ninidena, do i pipika so, go tina doka so ṉalu God, tina pala vakuziki ne basoe i soko go vanoto na basoe vae tamana nae.

⁸Ṉalu nae basoe vae tamana nae, tina lama sadaka to, do ṉalu Batu ita Jesu tina lama napu go, ia tina vae vale ze ia kikiuru na marapuga ireqe mego saqena. Mana tina lete vasakate to ia karaputana lama sadaka tina vae go Jesu.

⁹Do tarakenaqana go tinara lama go Jesu, basoe vae tamana nae tina za lama palua karaputa ia satana, mana tina zazu ne topu na pata mazala, mana pata vari vapoloso ro tina vanureke qirae basoero.

¹⁰Ia tina vazazua tatakiu sakataro, go tina poqe qirae basoero ne go tarina le. Tarina le, tanego iriki toqe ne kaega mamaligara ne na mana vaogote na, seko na too ia Batu ne, tina vakavele qira go.

¹¹Iago God i valame ne qira to karaputana kebu go mara zazue to nanao qira, go ria mara vaogote so pata ni poqe go.

¹²Ureṉa vatovato nae, osiqira basoero iri ki lulua go kaega seko ogoto ia Jesu Kristo, mana iri kula ne luluna vatovato sakata gogo ne, God tina tulaṉa vale ne qira.

¹³Turaquro, i tora remu mi seko velaka ne God osina ṉalu, sauqamu ramu, tanego Batu me i mamaligara ne qamu. God i vine kenaqana bana qamu tamuna kavele loborona karaputa ia Spirit tabo, go ramu tamuna basoero tabo ia loborona vaogoto na seko ogoto ia.

¹⁴Tarama Velaka qimu sine ne qamu go, God ikoru qamue ramu tamuna pala tavise go karaputa menomeno ia Batu ita Jesu Kristo.

¹⁵Iago, ramu turaquro rnuna degere vanadu, mana palataru vanadua so seko ogoto qimu varove qamue go loborona to tamana mana leta ro remu go.

¹⁶Go Batu ita Jesu Kristo mana God Tamaqita i mamaligara ne qita, Mana ia, i vakaraputa qita osina ṉalu mana i vanadua ruruqe ita go.

¹⁷Remu qi pene ia, go mara vakaraputa nanao qamu, go osina ṉalu muna zazu mana sine pata ni veiaka go.