Read Varisi Karua Tesalonika 3 Bible Online

Karua Tesalonika 3 - Varisi bible

Karua Tesalonika 3

¹Kameka pata napu turaquro, muna pene ne qemu remu, go tarama ia Batu ne, mara go katikili osina dia go osina basoero ne mara gata, mana vazaka Batu ne, gerena so i doka bana qamu go ramu.

²Mana muna pene napu ze God sauna go mara miasoka qemue remu de iri koego vano sakata ro, tanego iki osina kaega basoero ne iri vaogote go Tarama Velaka ia Batu ne.

³Do ramu muna ruqe Batu ne, ia tina vakaraputa qamu mana bara ne qamue, de ikoego karaputa ia satana, niki go vasakata qamu go.

⁴Batu ne i teke ne qemu remu ruqe de qamu koego ramu, mana qimu rove vavelake to remu, ramu qamu pala soma so zazu ne na pata ro qimu sine ne go remu.

⁵Go Batu ne mara kenaqa ne qamue rove velaka na mamaligara ia God, mana pala taru vanadu ramu sauna karaputa ia Kristo go.

⁶Ramu turaquro, Remu qimu sine vamazala ne qamu ramu, loborona vitoṉona Batu ita Jesu Kristo, kasi luluna vatovato ria kero ne vano lotu, iri muaka mana iriki lulua kaega seko ro qimu sine bana ne qira go remu.

⁷Ramu tanuqamu, qamu rove vavelake de qi gogo remu. Kotavisi qimu vae qamu ne, qimuki muaka ne kaega zazu.

⁸Mana qimuki toqe ne kaega pala volomo na pata iri sosovolomo ne qemu qo basoero ne. Tanego remu qimu zazu vakaraputa kuse mana musaqara go mara kaega ne qamu ramu kaki makuru de qi koego remu.

⁹Qi zazu ne ia dena, go i kaega ne qemu ka mazala go timuna pene qamue ramu pata tina tavisi ne qemu iki go kaega, do qimu zazu ne go mara vapadapada raramu muna lulua qimu go.

¹⁰Torana kotavisi qimu vae ne qamu go, qimu sine taru ne qamu, “Ka basoe i kasi go zazu kasi teke ne na pata gege.”

¹¹Qimu sine pata dena, tanego qimu gata zatu kakia ro basoe iri koego de qamu koego iri muaka ne zazu, iri telo volomo so, do iri poro sine ne qira basoero ne pata ro mara zazu ne go iri go.

¹²Iago loborona vitoṉona Batu ita Jesu Kristo, qimu sine vamazala ne qira basoero dena mara lulua vatovato na too velaka mana zazu, go tarina pala go pata tina tavisi ne go too ria.

¹³Do ramu turaquro, muna tamadoko ne zazu ne na pata velaka.

¹⁴Kadigo kakia basoe ikoe nae, tina kasi na luluna seko qimu karo ze go remu, leta qimu vagaretu ne qamu go nae. Ṉalu igogo nae ramu muna mia rove mana kasi gata gabu ne na vatovato ianae, go mara agava ne tanuna vatovato ianae.

¹⁵Do ramu muniki vasakata ne ia, do varove ze go ia i gerena kakia turaqamu lotu.

¹⁶Qa pene Batu ita, tanuna i kutama ne go bule mara teke ne qamu bule osina ṉalu, loborona topu na zukazuka ro go. Batu ne mara kotavisi qamu osiqamu.

¹⁷Era Pol tanuqu qa karo ze karisiqu, seko kula era dena, ṉalu qa karo ne qamu go ramu osina ro leta era.

¹⁸Qa pene Mana ia Batu ita Jesu Kristo mara kotavisi qamu osiqamu.