Read Varisi Kameka Timoti 1 Bible Online

Kameka Timoti 1 - Varisi bible

Kameka Timoti 1

¹Era Pol qa kakia apostolo ia Jesu Kristo, i vine bana va God na vari vakavele mana Jesu Kristo, iato ikoego pata qata ala nego toṉove na,

²de qo koego aro Timoti loborona vaogoto, aro qo gere sale ogoto era, qa pene, go God Tamaqita mana Jesu Kristo Batu ita mara Mana nigo mana, mara teke nigo manava ia mana ko bulebule ia.

³Era qa soko aro ono koe Epesus, gerena so qa sine bana nigo ṉalu qa zae go Masedonia. Kakiaro basoero iri koego Epesus in vanvatatana ne pata poqe ro, iago ono sine ne qira go tarina mamanava.

⁴Sine ne qira mara mamanava pepeu na pepeu poqepoqe iri sine vari soma nego, mana tutusi loda qira vanovano bana ro ita, tanego pataro dena iki vote kaega pataro i vato nego God, do vato ia God qo mazala mia rove zena vaogoto.

⁵Ala go i reqe go seko tamana dena, go ita mata vasadaka me mamaligara i reqe mego puṉu ni velaka go, nanao velaka mana vaogoto de ikoego Kristo i lete ogoto go.

⁶Kakia ro basoero iri tabali kakavata ne pataro dena, mana too ria iza rore loborona pepeu poqepoqe ro iri zazu ne go.

⁷Iri soko tarina vano vari vatatana na tamana ro ia God, do iriki nanao rove kaega talupasana sekoro iri sine go, ba avana tane i talupase go pataro iri pepeu a go.

⁸Ita osiqita qata rove, tamana ro ia Mosese dena, i velaka ṉalu ita qata va zazu velake go.

⁹Ita mata nanao tarua, ogotona tamana ro dena iki degere ne qira kaega vano velaka, do i degere ne qira vano iri vae tamana, mana iri zazu ne too sakata ro, ria vano iri vasakata pata iriki vaogote go kaega God loborona puṉuqira, ria iri vae vale qira tamaqira ro mana sinaqira ro mana kero ne basoero go.

¹⁰Vano iri taunata, valekero iri zazu sakata napu tanuqira, vano iri pala va seka qira, kero ne vano iri poqepoqe, iri sine go pata iki ogoto go kaega, vano iri poqe go loborona varitanae ne, vano iri zazu nego kakia ro pata iki totoloṉo ego kaega vari vatatana ogoto.

¹¹Varivatatana ogoto i koe Tarama Velaka ne, i teke nava go era God go tuna sine vatatavata go evaqelio dena, iato i tarama velaka sivala mana i karaputa mazala go, i reqe me de ikoego God i lete totoloṉo sivala go.

¹²Qa teke seko velaka era de ikoego Jesu Kristo Batu ita, ia i teke nava karaputa loborona zazu era, qa teke ne seko velaka era tanego i mia va tora ve era pala na zazu ia, mana i vine ava go tuna zazu ne iago,

¹³patavolomo de bana ne, era qa sine seko sakataro de ikoego ia, qa vasasakata ne qira vano iri vaogote go ia, mana qa vae vavokara qira tanego i sauna ia. Do God i nanao ule nava era, tanego ṉalu nae iara kaega nava era vaogoto de ikoego ia, mana qaki rove kaega pataro qa zazu ne go.

¹⁴Mana Batu ita ne i zuga me topu na Mana ia de qa koego era, mana i teke nava vaogoto mana mamaligara, iato ike ita loborona vari vakameka de ikoego Jesu Kristo.

¹⁵Jesu Kristo i lamae go kolabana pua dena, go tina vakavele qira vano iri vasakata pata go, seko dena i pata ogoto mana osina basoero mara vaogote. Era tanuqu to qa lete sakata sivala ne qira basoero iri vasakata pata ego kolabana pua dena,

¹⁶do God i nanao ule nava era, go Jesu Kristo tina vasadaka me lavata na pata i soko go, go tuna zazu ne era, qa valeke vasakata pata go, gerena vapadapada de iri koego vano tarinara vaogoto napua go ia, mana tarina toṉove too iki rove go kaega lupo.

¹⁷De koe Batu lavata ne, ia iki rove kaega le, mana ita basoero qatiki mazala kaega miana, mana iato i God ogoto go, vamazale ia, mana mazala i koe de i koego ia i ko ṉalu gado kuto na i kaega! Amen.

¹⁸Sale era Timoti, tamana dena, era qa taru ze to deqo koego aro, gerena so seko iri sine bana zame ṉalu bana ne. Vazazua seko ro nae gerena pata varitara, go tono varitara va velaka go,

¹⁹mana sotia vaogoto aro mana nanao velaka loborona puṉumu. Kakiaro basoero iriki lulua kaega nanao velaka loborona puṉuqira, iato go vaogoto ria i zaza kakavata go.

²⁰Aemenasus mana Alekzada iru zazu bana ne pata igogo ne, era qava lepulepu qiru, qa vazao qiru e karaputa ia Satana, pata dena to tina vatarove qirue go, go tiruna mamanava go seko bibirana na God.