Read Varisi Kameka Timoti 4 Bible Online

Kameka Timoti 4 - Varisi bible

Kameka Timoti 4

¹Spirit tabo i sine vatatavata velake, kakiaro basoero tarina vana ne vaogoto ṉalu iara ko mego. Mana tarina vaogote Spirit poqepoqe, mana tarina lulua vari vatatana ia Satana go.

²Vari vatatana igogo ne, i reqe me too legulegu ria vano iri poqepoqe go, tanego nanao velaka ro ria i le lupo bana.

³Basoero dena iri vari vatatana ne, busi itabo iri go, mana niki poro ge topu ado na pata gege go. Do God i vazaria go pata gege go tatana ge go. Ita qata vaogote go God, mana qata rove seko ogoto ne, qata mazala seko velaka zaqe God sauna osina pata gege ne, mana qata mazala so ge na go.

⁴Osina to pata i vazaria go God, i velaka lupo, i kaega napu kaki pata ni sakata go. Do ṉalu qata vele ge go pata gege ne, tatana seko velaka ne God,

⁵tanego seko ia God, mana pepene ro ita, God tina va tabo osina to pata.

⁶Ṉalu tono sine ne qira sekoro dena de iri koego vakitaka ita loborona lotu, ṉalu nae aro qo kakia basoe zazu velaka ia Jesu Kristo. Mana aro tono degere mana tina zaza popoka vaogoto qo lulua go, mana noqo pala bana go.

⁷Oniki gata pepeu volovolomo vari vaqoqo ro ria, tanego iki pata ogoto kaega. Do ono pada ne va karaputa na too kristiano aro.

⁸Qiso ne i vamoqere tokama, ianae i velaka, do i lete velaka sivala tata vakaraputa go too kristiano ita, tanego ianae i mazala tavisi ne qitae ita topuna dia. Loborona too ninidena mana too ṉalu muzi go.

⁹Seko dena ipata ogoto mana itora basoero ne mara gata mana lulua go.

¹⁰Ita qata zazu vokara taru so, tanego qata vaogote God i too. Iato i mazala go vakavele qira osiqira basoero ne, mana tina vakavele qita ita qata vaogote go iago.

¹¹Ono sine ne qira seko dena, mana ono vatatana velaka qira basoero ne go.

¹²Aro qo ara basoe voru so, iago pada ne, go mara kasi nanao vaqoqori go. Ono vasadake vatovato velaka de iri koego vakitaka lotu ro loborona seko ro aro, too aro, mamaligara aro, vaogoto aro mana too dalo aro go.

¹³Torana dena qo ara piri nava era go tuna ule atu go ne, ono toere seko tabo ne mana sine ne qira Tarama Velaka ne mana ono vatatana velaka qira go.

¹⁴Sosovolomo aro nae, oniki taru volome. God tane i teke nigo, ṉalu propeta ro ne iri sine vasadake sekoro saumu aro, mana batu lotu ro iri sapu ze karisi qira de qo koego aro go.

¹⁵Zazu neso pataro dena, mana ono pada ne zazu vavelaka ne zazu aro, go basoero ne tarina mia, zazu aro iziki.

¹⁶Mia tarua too mana vatovato aro Timoti, mia velake varivatatana aro, ba pata qo varivatatana nego. Ṉalu qo zazu taru neso karua pata dena, aro qo mazala to vakavele go tanumu mana ria iri gata go pataro qo sine go.