Read Varisi Karua Timoti 1 Bible Online

Karua Timoti 1 - Varisi bible

Karua Timoti 1

¹Era Pol qa kakia apostolo ia Jesu Kristo, tanego God i soko ava tuna apostolo ia, go tuna sine vasadake pui ia, go ita tatana pala too loborona vari vakameka de ikoego Jesu Kristo.

²Qa karo zatu leta dena de qo koego aro Timoti sale era. Go God Tamaqita mana Batu ita Jesu Kristo mara teke nigo Mana, ko bulebule mana manava ia.

³Qa seko velake God, iato qa basoe zazu ia, mana qa osaka ne zazu ia loborona nanao mana too velaka era, gere qira so vanovano bana era iri zazu nego. Qa seko velake ia nanao taru qa vae qamu go mana loborona pepene era kuse mana musaqara go.

⁴Qa nanao tarua ṉalu noqo dae bana go, iago qa lete soko garetu mia go, go tuna mazala kula taru go.

⁵Qa nanao ule zaqe karaputa na vaogoto aro, igere vaogoto ia sinamu qole Loisi mana sinamu lunasi go. Qa rove vaogoto aro igere napua so karaputana vaogoto ri riru nae.

⁶Sauna to ianae, gava nanaotaru goe ono vatoo sosovolomo i teki go God, ṉalu qa taru poka ze tokamamu karisiqu.

⁷Tanego Spirit ni teke qita go God, iki lama vasareki qita kaega do i vakaraputa qita, mana i tavisi ne qitae mamaligara ne qira basoero, mana i tavisi ne qitae miasoka na tokama qita go.

⁸Oniki agava ne tarama ne Tarama Velaka ne, ba agava nava era qa koego bara ne tanego i sauna Kristo. Do aro ne, ono pala tavise vokara sauna vasadake na Iarama Velaka ne, tanego God i teke bana nigo karaputa go tono zazu ne go.

⁹God i vakavele bana qita, mana i koru qitae basoero ia iki sauna kaega zazu ro ita, do loborona so nanao ia, tanego i mamaligara ne qita. I teke ne qita Mana dena ṉalu ivalame go Jesu Kristo, tarakenaqana iara tupi go osina pata,

¹⁰do ninidena i lama sadaka to, lama na vari vakavele ita Jesu Kristo. Ia iva lupo karaputa na le, mana loborona zukazuka na Tarama Velaka ne i vasadakae too i ko sivala osina ṉalu.

¹¹God i vine ava era tuna kaki apostolo mana basoe vari vatatana iago, go tuna sine vasadake Tarama Velaka ne.

¹²Pata nae to era qa gata vokara ne go de, do qaki agava ne kaega, tanego qa rove velake basoe qa vaogote go. Mana qa rove ia tina miasoka velake Tarama Velaka dena i taru ze de qa koego, go tina za doka so musaqara muzimuzi go.

¹³Ono pala taru vanadua seko ogoto ga vatatana bana ge go, i vapadapada na go tono lulua go vari vatatana na too qo vae go. Ono vanadue vaogoto mana mamaligara ni ke ita loborona vari vakameka ita de ikoego Jesu Kristo.

¹⁴Loborona karaputa ia Spirit tabo ni koego loboro qita ono sotia pata velaka ro iri teke bana nigo.

¹⁵Aro qo rove Piqelusi mana Emoqensi, riru de mana kakiaro napu basoero na kena Esia iri kasi ava era.

¹⁶Era qa pene Batu ne, go mara nanao ule mana manava ne Onesiporosi mana vano pade ia, tanego topu na ṉalu i tavisi nava mana i vakula va era go. Mana iki agava nava kaega patavolomo era qa koe bara ne.

¹⁷Pasi i lama doke Rom ia i taqi bana va so era, go go i lama sobava go.

¹⁸Torana qa koego era Epesus, ia i lete tavisi vavelaka nava era. Iago era qa pene Batu ne mara nanao ule ne mana manava ne ia ṉalu musaqara muzimuzi.