Read Varisi Karua Timoti 2 Bible Online

Karua Timoti 2 - Varisi bible

Karua Timoti 2

¹Sale era, ono karaputae loborona Mana i ke ita go loborona vari vakameka ita de ikoego Jesu Kristo.

²Mana vari vatatana qo gata ve go era qa vatatana qirae go basoero ne, ono sine napu ne qira basoero velaka i tora napu qira go vatatana qira kero ne basoero ne.

³Ono pala kenakena aro tepa ia vokara, gerena basoe varitara ogoto ia Jesu Kristo.

⁴Basoe varitara i zae go varitara ne, i soko vakula na batu ia, i makuru ṉara zazu ne rigo ia tanuna.

⁵Mana basoe i teteṉe tavise go varivose ne, i makuru tina pala sasarapana, ṉalu iki lulua go kaega tamana.

⁶Basoe i zazu vamoqere barui ia, itora mara ge kenaqe pata lebaleba na barui ia.

⁷Nanao velaka zaqe pataro qa sine nigo, mana Batu ne tina tavisi nigo, go tono rove velake go.

⁸Tarama Velaka qa sine go era igo dena, Jesu Kristo i reqe me sinaqe ia Davita mana i too napu me tepa le go.

⁹Iato tarama nae qa vari vatatana ne era tane iri doki vego seni iri va gere ve basoe vatovato sakata. Do i makuru qira qolo ze seni seko ia God,

¹⁰iato go era qa zazu so, patavolomo iri vasasakata nava. Qa soko tavisi ne qira basoe ia God i vine bana qira go, go tarina vakameka ne Jesu Kristo. Go God tina vakavele qira mana teke ne qira too iki rove go kaega lupo.

¹¹Seko dena i seko ogoto, “Ṉalu qata le tavise Kristo tatana too palua ia.

¹²Ṉalu qatiki pela ne kaega vaogoto na ia, tatana vatovato tavise ia. Ṉalu qata go, qatiki rove kaega ia, Ia tina go napu so, iki rove qita kaega.

¹³Ṉalu ita qatiki sotia kaega pui ro ita ia tina sotia so pui ro ia, tanego iki mazala kaega tina vae go pui ro ia.”

¹⁴Vananao taru qirae basobasoero aro pataro dena, mana teke ne qira seko vabanabana dena de ikoego tarakenaqana God, ria mara kasi varitara ne so seko, tanego iki vasadaka me kaega kaki pata velaka, do ivasakata qira so basoero iri gatagata go.

¹⁵Ono pada ne lete zazu vavelaka, go God tina soko go zazu aro, ono vari vatatana velaka ne seko ia God loborona zazu totoloṉo, go toniki agava e kaega tarakenaqana God.

¹⁶Oniki ko tavisi qira basoero iri pepeua go pata volovolomo ro, tanego pepeu igogo ro nae, iva laqalaqa qirae basoero ne de i koego God.

¹⁷Vari vatatana ro nae, igere kukuru ige go manu ne. Pata iru vari vatatana ne Emenaesu mana Piletus igoto nae,

¹⁸iru vana ne zuka na vaogoto mana iru va vizua vaogoto ria basoero ne, iru go ita qatiki ara too napu kaega ṉalu muzi, tanego too nae ne, iato qata pala to ninidena.

¹⁹Do kutama ogotona eklesia ni tarua go God, tiniki mazala kaega vizu na, mana i karoe seko dena, “Batu ne i rove velake basoero ia,” kaki seko igo napu de, “Basoero iri go, iri basoero ia Batu ne, iri na vana ne vatovato sakata ria.”

²⁰Kakiaro disi ikoego pade lavata ne, iri zazu neze qolu mana siliva, kakiaro disi iri zazu neze moki mana pua. Kakiaro disi ro ne, iri zaṉana vazazua so.

²¹Ṉalu kakia basoe i vadalo too ia, dekoe vasakata pata ro qa sine go era ne, ia tina basoe tabo mana tina basoe zazu ia Kristo, mana tina vanama taru neso kakiaro napu zazu ro go.

²²Oniki lulua too mana vatovato sakata ria vano voru, do ono ko vona qira basoero i totoloṉo go nanaoqira mana iri vamazale Batu ne. Ono pada ne vasadake na too totoloṉo, vakaraputa na vaogoto, vari mamaligarae mana vakapo ne qira basoero ne go.

²³Oniki tavisi pepeu na pata poqepoqe ro ba vari valegu poqepoqe ro, tanego pataro dena i vapera qira so basoero ne.

²⁴Basoe zazu ia Batu ne, mara kasi poro vari valegu, mana poro muma katikili go, do ia tina vakapo qira basoero, mana tina rove velake de go vatatana qira basoero ne go.

²⁵Tina rove napua de go tina vatotoloṉo qira go vano iri valegua go vari vatatana ia, ṉalu nae God i mazala napu so tavisi vatotoloṉe na nanao qira basoero nae, go tarina rove go seko ogoto ne.

²⁶Ṉalu nae, nanao qira tina tarove mana tarina paqa ne suqisuqi ia Satana, ni pala bana qira, go tarina vaogote go pataro i soko go.