Read Varisi Karua Timoti 4 Bible Online

Karua Timoti 4 - Varisi bible

Karua Timoti 4

¹Ma sine nigo seko dena, loborona tarakenaqana God mana Jesu Kristo tiruna zazu nego vivme musaqara muzimuzi de iri koego vano iri ara too, mana vano iri le bana, ia tina lama gerena kaki batu lavata, qa lete pene vakaraputa go,

²ono tarama ne Tarama Velaka ia God, patavolomo basoero ne tariniki soko kaega gata na. Ono lete pada ne va rove qirae basoero ne seko ogoto, ono pada ne vatotoloṉe na vatovato ria, mana ono tavisi ne qira go tarina ko karaputa go. Mana ono va velavelaka ne qira basoero ne, ṉalu tono vari vatatana go.

³Tanego tina lama doka ṉalu basoero ne tariniki gata kaega vari vatatana ni ogoto go, do tarina lulua so pata iri soko go tanuqira, tarina taqi qira soso vano vari vatatana ro, go tarina gata vari vatatana iri soko go tanuqira.

⁴Tarina tabali kakavata ne gatana pata ni ogoto go, mana tarina vavaroṉo no velaka ne gata na pepeu volovolomo ro go.

⁵Do aro ono miasoka va velaki go tanumu, loborona ṉalu na makuru ro, ono ko karaputa osina ṉalu. Ono vari vatatana ne Tarama Velaka ne mana ono va lupo velake go, tanego iato nae zazu i teke nigo God go tono zazu ne go.

⁶Torana dena ne, i lama doka to ṉalu era tuna le. Too era tina gere to vino iri zele ze go sara niri komakoma ego.

⁷Qa lete pada ne teteṉe vavelake na vari vose dena. Pasi dena qa dokae to valupolupo na de vari vose ne, mana qara pala taru vanadua so vaogoto era go.

⁸Iago God i soti bana voliqu, mana vano iri valupo velake go vari vose ne go, Batu Jesu Kristo iato i tavine ne go tina zazu nego vivine ṉalu musaqara muzimuzi, tina teke nava go voli qu. Mana loborona to musaqara nae, ia tina teke napu ne qira kameka ado na voli igogo ne, de iri koego ria iri rove go ia, mana iri piri ne ṉalu ia tina ule mego.

⁹Ono pada ne lama katikili na de qa koego era.

¹⁰Qa rove Demas, ia i kasi nava era, tanego i lete mamaligara ne patana ro vudu pua dena, mana i za banae to Tesalonika go. Kresen i za banae to Qalesia mana Taetusi i za bana to Dalmatia go.

¹¹Tanuna so Luka i ko tavisi ava go de, Tikikasi qa turi vazao ze Epesus, iago ṉalu tono lama go, ono lulu me Maka tanego ia i mazala tavisi nava era loborona zazu dena.

¹³Ṉalu tono lama go, ono pala me roku lavata era qa taru ne Kapus tepa komala Troas, mana ono pala me buka ro era go. Nanao tarua ono pala me kero ni kade go kapotona nanikoti ne.

¹⁴Alekzada valeke i zazu ze kakiaro pataro aeana ne, ilete vasakatava era. Do Batu ne tina soka vaule ne ia, tina vatora ze so pataro izazu nego, too i vaego.

¹⁵Ono miasoka tane valeke nae, tanego i seko vasakate pataro qata vari vatatana nego ita.

¹⁶Ṉalu kenaqa qa za degere go varitanae ne, kaega so ka basoe i lama tavisi nava, seseko qa vae nava go tanuqu, osiqira ne iri kasi ava. Do qa pene God go mara nanao ule ne kebu ro ria.

¹⁷Do Batu ne i tavisi nava mana i teke nava karaputa, go i malamu ava era sine vasadake na tutukunu na Tarama Velaka ne, de iri koego vano iriki Jiu go kaega tarina gata, mana i vakavele ve era saqena laioni go.

¹⁸Mana Batu ne tina vakavele ve era de koe osina pata sakata, mana tina pala vazao ve era komala tabo ikoego vari miasoka ia, de ikoego ia karaputa mazala ia i ko osina ṉalu topu ro ne! Amen.

¹⁹Qa vagaretua seko velaka era de koe Prisila mana Akuila mana ria tatamanaro Onesiporosi go.

²⁰Erastus i koe Korint, Tropimus qa za taru ze Miletus, tanego i mokoso.

²¹Ono pada ne mo lama doka bana aro, tinara doka go ṉalu na lolomu. Iubulusi, Prudenisi, Laenasi mana Kolodia, iri vagaretua seko kula ria, mana gere napu qira so kero ne vakitaka ro lotu go.

²²Timoti, Batu ne ina ko tavisi go, mana Mana ia God na koe de qamu koego.