Read Varisi Iburu 13 Bible Online

Iburu 13 - Varisi bible

Iburu 13

¹Muna ko vari mamaligarae gere qira tamakena ro.

²Nanao tarua, muna vagado velaka qira basoero iri dokae go komala ramu kakiaro basoero ṉalu bana iri zazu ne too dena, iri vagado zaqe pade ria aqelo, do iriki rove kaega i aqelo go.

³Muna nanao taru qira vano iri koego bara ze, va gere so tanumu qo ko tavisi e bara ne. Nanao tarua qira vano iri ko vokara go, vagere ze tanumu qo vokara tavisi qira.

⁴Osina basoero mara nanao vamazale zukazuka na too na busi, valeke ro mana qolero iri busi go, mara ria nanao vamazale kameka ko riru, tanego God tina zazu ze vivine ia, de iri koego vano iri qoleqiso ne tamana na busi, ṉalu iri taunata go.

⁵Kasi poro va riqo zena too ramu, mamaligara ne na kesa, do muna kula neso pataro i ko ne qamu go. Tanego God i sine, “Era tuniki vana nigo kaega, mana era tuniki paqa kasi nigo kaega go.”

⁶Iato go ita mata karaputa, mana mata sine, “Batu ne i varitatavisi era, qaki sareki kaega. I kaega kaki basoe tina zazu ne kaki pata kebu de qa koego era.”

⁷Nanao taru qira ria iri kenaqa bana ne qamu go, iri tarama ne go seko ia God de qamu koego. Nanao ule zaqe de go koko ria go iri le go, muna lulua too ria, iri vasadake vaogoto ria de ikoego God.

⁸Jesu Kristo iki rove kaega kavala vatovato ia i varipada so, tupi me ṉalu bana ne, ninidena, mana tiniki rove kaega za lupo go

⁹Niki vamao ne varivatatana poqepoqe ro, niki pala va riro qamue zuka totoloṉo ne. I pata velaka Mana ia God qata koego i teke ne karaputa velaka puṉuqita, iato dena pata i tavisi ne qita, tanego lulu na tamana na patagege na ge go ba pata gege niki ge go kaega, iki tavisi so kaega.

¹⁰Patere ro iri zazu ego pade vavazaka ria vano Jiu, i kaega ne qira mazala go tarina ge go pataro iri komakoma zego sara ipaka ria ne.

¹¹Batu Patere ria vano Jiu iri pala za parasana pata garaqara ro, loborona kova i lete tabo, go tarina soso ne gerena komakoma go tina va lupo go vasakata pata, do tokama qira pata qaraqara ro ne iri koma za rikisina na komala iri koego go.

¹²Gerena napu so, Jesu i le taramuzina komala lavata ne, go tina vadalo qirae basoero ne parasana tanuna.

¹³Iago ita mata za ko tavisi ze ia taramuzina komala lavata ne, go basoero ne tarina vasasakata ne qita, gere na so de iri vane bana go Jesu.

¹⁴Loborona vudu pua dena, i kaega kaki komala lavata tina ko sivala, go tatana koego, do ita qata soko dokae na komala lavata tinara lama go.

¹⁵Iago ita mata vazaka tarua God, gerena komakoma ita de ikoego Jesu, mata vasadake ia i Batu ita, mata sine vasadaka ze pepesu qita go.

¹⁶Niki nanao kasupe ne zazu ne na pata velaka go tina tavisi ne qira kero ne basoero, tanego komakoma gere qira to pataro dena i vakula go God.

¹⁷Vaogoto qira vano kena kenaqa ro ramu, mana lulua pataro iri sine go. Tanego iri mia tarua too kristiano ramu, mana iri ki ziṉo kaega go, ria tarina sine vasadaka ne God avana iri zazu nego. Ṉalu ramu qamu lulua pataro iri sine qamu go, ria tarina zazu e loborona kula, ṉalu kaega, ria tarina zazu e loborona maqata, mana tiniki tavisi ne qamu kaega go.

¹⁸Muna pepene taru ne qemu. Remu qi lete rove nanao qemu i totoloṉo mana qi soko ne zazu nena pataro i totoloṉo go.

¹⁹Qa pene va karaputa qamu atu, muna pene nava, go niki umata kaega God mara turi vaule nava era de qamu koego.

²⁰Iato dena pepene era, go God ikoego loborona bule, tina teke ne qamu osina pata velaka qamu pusi ne go, mana tina vamalumu ne qamu zazu nena pataro qamu soko go zazu ne na. Jesu i Batu ita i le go, parasana i zazaka go, go tina vanadua go pui ia God iki rove go kaega lupo. Taramuzina God i va too ule ze ia tepa le, God i va kenaqa ze ia mia soka na sipi ro ia. Qa pene God, go ita mata kameka e de koe go Jesu Kristo, go tatana totoloṉo e de i soko go tanuna, mana mata vazaka tarua vitoṉona Kristo i lete zakazaka go osina ṉalu topuro ne. Amen.

²²Vakitaka ro era, qa pene vakaraputa qamu muniki nonopa ne pataro qa karo zego era leta dena, tanego seko ro era tina vatalasara qamu, tanego leta qa karo zatu go dena, iki lete loda kaega.

²³Qa soko va rove qamu e, vakitaka ita Timoti iri vasiporo zeto ia bara ne. Ṉalu tina lama doka katikili e de qa koego era ia tina lulu ava era, ṉalu tuna garetu mia qamu go.

²⁴Teke ne seko kula remu de iri koego basoero kena kenaqa ramu, mana osiqira basoero ia God go. Sine ne qira, vano lotu iri koego Itali iri sine me seko kula ria de qamu koego.

²⁵Mana, mana makaolo ia God ina ko tavisi qamu osiqamu.