Read Varisi Iburu 4 Bible Online

Iburu 4 - Varisi bible

Iburu 4

¹Aria pui i teke qita go God, tatara ziṉo ego de ikoego ia, iara ko taru so. Iago ita mata miasoka velake, niki go kakia ramu za dokae kaega de i pui bana ne go God.

²Ita qata gata bana Tarama Velaka ne, gere na ria iri gata bana go. Ria iri gata bana go tarama ne, do tarama nae iki tavisi ne qira kaega, tanego iriki toqe ne kaega vaogoto na ṉalu iri gata go.

³Ita qata vaogoto go, tatana mazala ziṉo ena de ikoego God i pui bana ne go. Gere na God i sine go, “Era qa muma mana qa va nadu ze nanaoqu seko era. Tariniki mazala kaega keba zana pua go tuna vaziṉo qira e go.” God i sine seko dena, patavolomo i va lupo go va zari i vae ne go kolabana pua ne.

⁴Loborona kaki dia Buka tabo ne, i sine de go vavituna musaqara, “God i ziṉo vavituna musaqara taramuzina osina zazu ia.”

⁵Zino dena iato qata seko ne go dena, “Ria tariniki mazala kaega keba zana pua go tuna vaziṉo qira e go.”

⁶Ria iri gata kenaqe go Tarama Velaka ne iriki pala kaega ziṉo igogo ne, tanego iriki vaogoto kaega. Dc i ko kakiaro basoero God i toqe ne qira tarina pala ziṉo dena de i koego tanuna.

⁷Iato go God i taru napua kaki musaqara napu, iato i vitoṉo ze “Nini”. God i vagoe ze Davita tina seko napu ne pata ikoego Buka tabo qata toere bana go, igo, “Ninidena ṉalu qamu gata go seko ia God, kasi kuzuku lavata.”

⁸Ṉalu go Josua tara teke bana qira basoero ne ziṉo i pui bana ne God, God iki ara mazala kaega seko napu ne kakia musaqara.

⁹Iato go ita qata rove, basoero ia God tarina mazala palana ziṉo igogo ne de ikoego God, gere so tanuna God i ziṉo go vavituna musaqara.

¹⁰Iago ka basoe i pala go ziṉo i pui bana nego God, osina ro zazu ia tina noto lupo, ia tina ziṉo gere so God i ziṉo taramuzina osina zazu ro ia.

¹¹Iago ita mata lete pada ne za ziṉo tavise na God, iki velaka kaega ṉalu kakia ita, tina lulua go de iri gogo ria iriki vaogote go kaega God, mana iriki pala go kaega ziṉo igogo ne.

¹²Seko ia God i koe too mana i zazu go, i lete sivala ne zogotona pegi varitara i zogoto go karua rikisina. I mazala zugu zana loborona de iru vari sobae madau mana spirit, mana de iru vari siba varikama e go uri mana manu go. Seko ia God i mazala vine na nanao ia basoe, mana pataro i soko go basoe go.

¹³I kaega kaki pata i mazala pipika ne na God, osina pataro i zari ego vudu pua ne, i ko va sadaka lupo eso tarakenaqa na God. Mana de i koe ia, ita tatana vasadaka lupo ne ia osina to pataro qata zazu ne go.

¹⁴Ita mata pala taru vanadua vaogoto qata vasadake go. Tanego ita i ko qita batu ria patere ro i lete karaputa go, iato Jesu Sale ia God, i zako banae go rani ne.

¹⁵Batu Patere ita ne, i rove velaka bana so de qata pela ego ita, tanego osina makuru ro i padae de qata koego, i doka bana ia, do patavolomo nae, kaega kaki ṉalu Jesu i soru e vasakata pata.

¹⁶Osiqita mata vanadua nanao qita, mana zae de koko ia God i koego Mana ia. Dego qata mazala pala zena manava mana soba zena Mana tina mazala go tavisi ne qita go ṉalu qata soko go.