Read Varisi Kameka Pita 1 Bible Online

Kameka Pita 1 - Varisi bible

Kameka Pita 1

¹Era Pita qa apostolo ia Jesu Kristo. Qa karo ne qamu ramu basoero ia God qamu repe go osina dia, gere qira basoero kakavata tepa kena Pontus, Qalesia, Kapodosia, Esia mana Bitinia.

²Ramu qamu basoero tavine bana ia God Tamaqita, mana i vatabo bana qamue Spirit tabo ia tanuna, go ia ramu tamuna vaogote Jesu Kristo, mana daloe parasana ia. Qa pene God mara Mana ne qamu mana mara teke ne qamu bule osina ṉalu topu ro ne.

³I lete velaka sivala mata teke ne seko velaka de ikoe God Tamana Batu ita Jesu Kristo! Tanego Mana ia i teke ne qita too voru loborona va too ivae mego Jesu Kristo tepa le ne. Ia dena nanao iva puraka qitae ita ruruqe i too taru osina ṉalu.

⁴Ianae go ita qata vatarakenaqa ne za qe palana vavagado na makaolo ia God i soti ne qira go basoero ia. Vavagado nae i soti ne qamue rani ne, de iki mazala kaega za sakata ena mana za kaega ena go.

⁵Pataro dena, i sauqamu ramu loborona vaogoto ramu de ikoego God, karaputa ia sauna vari va kavele i vanama ne qamu tina vasadaka me ṉalu muzimuzi.

⁶Ramu muna kula sivala ne pata dena; kadi go igoto ṉalu ninidena ramu qamu soba desuka makuru, tanego topu adona pada ro qamu soba ze go vokara.

⁷Lavatana pataro dena go mara vasadake mazala na vaogoto ramu i nadu go. Qolu do iri subi ze nako ṉalu iri pada nego, go iri vadalo go, do qolu nae i mazala so za kaega, ba vaogoto raramu go i sivala ne qolu. Iago God tina pada napu ne vaogoto raramu go tinara nadu, mana tamuna toṉove vazaka, mana va popoka na vitoṉo qamu, mana va mazala qamu ṉalu musaqara Jesu tina sadaka mego.

⁸Ramu qamuki mia kaega Kristo, do qamu mamaligara ne, mana patavolomo ninidena, qamuki mia kaega, do qamu vaogote ia, mana qamu lete kula ne go. Kula ramu i lete lavata sivala i makuru qita kade tatana sine vane go.

⁹Tanego God i vakavele go madau qamu, iato nae tane pata i lete lavate go vaogoto raramu de ikoego ia.

¹⁰Sauna to vari va kavele dena to iri lete taqia go propetaro ne, mana iri nanao luluse de igogo. Mana iri seseko ne go sauna sosovolomo ia God tina teke ne qamu go.

¹¹Madauna Kristo i koe loboro qira mana i sine kenaqa bana ne qira. Kristo tina lete vokara kenaqa, mana taramuzina vokara i pala go, ia tina va sadake lalana karaputa ia God, mana propeta ro iri pada ne sobana de igogo mana de gogo tina sadaka mego.

¹²Iago, God iva sadaka me ze de iri koego propetaro ne sauna zazu iri zazu nego, iki sauqira so kaega tanuqira, do i sauna to tavisi ne qamu ramu. Mana pataro iri sine bana go ria ne, iato qamu gata qirae go vano iri sine vasadake go tarama velaka de qamu koe go. Ṉalu ria iri tamana ne go Tarama Velaka nae, Spirit tabo iva karaputa qira, ituri ne me God ikoego rani ne, iato pataro dena to aqeloro ne iri soko go nanao rove na.

¹³Iago muna ko vanamanama, mana miasoka koko ramu. Mana nanao qamu mara ko va karaputae pata velaka ro tina teke qamu go God ṉalu Jesu Kristo tina sadaka mego.

¹⁴Muna vaogote God, mana kasi va lulu zena too ramu nanao sakataro qamu lulu bana go ṉalu bana ne de qamu ara kaebo go rove na kaki pata.

¹⁵Tanego God i koru bana qamu go i tabo, iago ramu muna ko mana va tabotabo too ramu, mana osina pataro qamu zazu ne to go.

¹⁶Buka tabo ne igo dena, “Ramu muna tabo gerena era qa tabo,” igo God.

¹⁷Ṉalu ramu qamu pene go God qamu koru ze ia Tamaqamu, ia nae i vari pada neso osina basoe, do vivine ia so iara taru ze go nogotona basoero sauna pataro iri zazu ne go. Iago ko qamu ara vae go pua dena muna vazaka ia mana ko padapadae de ikoego ia osina ṉalu.

¹⁸Tanego ramu qamu rove bana de igogo God i voli bana go osina too sakata ro, qamu soba bana ze go kazigarata bana ro ramu. Ia iki voli qamue kaega pata go niara za sakata napu gerena qolu ba siliva.

¹⁹Kaega, ia i voli qamue ramu parasa velaka sivala na Kristo, Kristo i gerena sipi iri komakoma nego i kaega ne kaki sakata.

²⁰Tarakenaqana me God iara va zaria go vudu pua, ia i vine bana Kristo go tina vakavele qamu, mana torana dena go tina za mamanava go vudu pua, Kristo i lama bana, i zazu ne go pata dena sau qamu ramu.

²¹Mana de ikoego to Kristo ramu qamu vaogote God, ia iva too me Kristo tepa le ne i vakaraputa ia, mana i teke ne menomeno. Iago vaogoto mana ruruqe ramu mara ko vanadue de ikoego God.

²²Ninidena vaogoto ramu iva dalo napu qamu, mana qamu lete mamaligara ne qira kero ne vano lotu, iago muna vari mamaligarae napu tanuqamu loboro na puṉuqamu.

²³Tanego seko ia God i too mana i dokae ka ṉalu gado kutona i kaega, iago ramu qamuki podo napue kaega tamaqamu ikoego vudu pua dena, do qamu podo e de ikoego Tamaqamu i too sivala go.

²⁴Buka tabo ne igo, “Osina basoero iri gere so seuseu ne, mana osina menomeno ro ria iri gere so bubuili piru ro ne. Seuseu iri nala mana bubuili iri soru tadau.

²⁵Do seko ia God 3 too osina ṉalu topu ro.” Seko nae ia to Tarama Velaka iri sine vasadaka bana me de qamu koego ramu.