Read Varisi Kameka Pita 3 Bible Online

Kameka Pita 3 - Varisi bible

Kameka Pita 3

¹Gerena napu so ramu qolero busi, muna va mazala qira valeke ro ramu, sauna ianae go valeke ro ramu iriki vaogote kaega seko ia God, tarina vaogoto go, patavolomo qamuki sine ne qira kaega seko.

²Tanego ṉalu iri mia go too velaka ro raramu, mana de nigogo qamu va mazala qira go, ria tarina vaogoto.

³Kasi nanao va mazala na so pata qamu va keba poka ne ze go tokama qamu, go tina va mimia menomeno go tokama qamu, gerena vivolo va menomeno na uquru qamu, mana vakalu ne na pata i qolu ba siliva iri zazu ne go, ba roku menomeno qamu va keba go.

⁴Ba pata menomeno mara ko mego loborona puṉu, mana madau qamu ne, iato ko va velaka, noto mana ko duduli go. Vatovato nae to i lete mazala sivale go tarakenaqana God.

⁵Tanego qolero totoloṉo ṉalu bana ne iri vatabo too ria, mana iri ruruqe zaqe God, go iri ara va sadake go menomeno dena ṉalu iri va mazale go valeke ro ria.

⁶Sera igo to nae, ivaogote Abra-am i koru ze ia batu era, iago ramu tamuna sale qolero ia ṉalu qamu zazu ne pata velaka, mana qamuki sareki ne kaega kaki pata go.

⁷I gerena napu so ramu valeke ro busi, too ramu de iri koego qole ro ramu, ramu muna mia rove qira qolero, tokama qira iki karaputa gere qamu kaega ramu. Iago muna va velaka ne qira, tanego ria tarina pala tavisi qamue ramu sosovolono na too ia God. Ṉalu qamu zazu ne ia dena kaega kaki pata tina sida me zego pepene ramu.

⁸Va lupolupona seko era, ramu muna ko kameka mana kameka nanao. Muna vari mamaligarae gere kameka tamakenaro, vari manavae mana ko qoqoro loborona koko ramu go.

⁹Kasi vari sokasoka ne na pata i sakata go, ba vari soka nena seko sakata go, do muna pene ne basoe igogo nae, tanego makaolo to pata i pui bana ne go God tina tekene qamu, ṉalu i koru bana qamu go.

¹⁰Gerena Buka tabo ne igo, “Ka basoe i soko go ko kula loborona too ia, mana i soko go miana musaqara ro velaka gogo ne, mara mamanava sine na pata poqe ro.

¹¹Mara vana ne vatovato sakata ia mana zazu ne pata velaka, mara taru ze de ikoego tanuna mana de iri koego basoero ne go.

¹²Tanego God i mia taru qira vano totoloṉo, mana i gata pene ro ria, do vano iri zazu taru nego pata sakata, ia i tabali kakamu ne qira.”

¹³Akena tina va sakata qamu go ramu, ṉalu qamu le nego zazu ne na pata ni velaka go na?

¹⁴I ogoto, kadigo ramu qamu pala bana vokara na ṉalu qamu zazu nego pata velaka, ne ianae ramu qamu maṉana to! Muniki sareki ne qira basoero ne, mana nanao vokara ba tutuqu go.

¹⁵Do vabatua ia, tanego Kristo i koe loborona puṉu qamu, mana tudua ia ni batu ne go too ramu. Iago vanama osina ṉalu go tamuna va taule ne qira go basoero ne, ṉalu iri tana ne ruruqe ramu de koe Kristo.

¹⁶Do muna zazu ne ze so loborona seko velaka mana padapada. Mana va totoloṉe nanao qamu go mara velaka osina ṉalu, go ia ṉalu iri seko sakata qamue too velaka ro qamu lulu ze go Kristo, ria tarina agava ne pataro iri sine ne qamu go.

¹⁷Ṉalu go God i soko tatana soba ze vokara, loborona zazu velaka ro qata zazu nego, ianae i velaka so. Do ṉalu qata zazu ne too i sakata go mana qata soba ze vokara gogo ne, ianae iki velaka kaega.

¹⁸Tanego le ivae go Kristo ivatalupasa lupo osina vasakata pata ro ramu, mana i pala vaule qamue de ikoego God. Kristo i totoloṉe tarakenaqa na God, do ia i le ne sauqira vano sakata, basoero ne iri vae vale ia, do God i va too ule ze ia too iki rove go kaega lupo.

¹⁹Mana madau na i too i za tamana qira madau qira vano iri le go, niri koego rodoko.

²⁰Madauro dena, i madau qira vano iriki vaogote go kaega God. Ṉalu God i piri ne go musaqara ro Noa i zazu ne go koluka ne, tarazalu ria so iri kavele ne go kiale lavata ne,

²¹mana besi dena i lalana bapitema iva kavele qamue go God. Sauna bapitema dena iki besi saboro va dalo na kaega korena tokama, do i sauna go muna zazu ne pui de ikoego God, ireqe mego nanao velaka ramu, mana iato i vakavele qamue go loborona too ivae napu me tepa le Jesu Kristo.

²²Jesu dena i popoka za go rani ne, mana iza kolokue tepa matauna God. I Batu ne qira aqeloro, mana osina vano karaputana rani ne.