Read Varisi Kameka Pita 5 Bible Online

Kameka Pita 5 - Varisi bible

Kameka Pita 5

¹Era qa kakia batu lotu, mana qa mia ṉalu Kristo i pala go vokara. Iago era do tuna pala karaputa mazala ia Jesu Kristo ṉalu tina za ule mego. Iago qa pene va karaputa qamu vano batu lotu,

²muna miasoka velaka qira basoero ia God i teke ne qamu gerena valeke miasoka sipi i miasoka go sipi ro ia; mana kasi maomao ne na go. Muna zazu velaka ne zazu ro ramu ni soko qamue go God. Kasi nanao naso pala na voli qamu zazu go. Do voli nae tina reqe me to soko ogoto raramu qamu soko go tavisi ne qira go basoero ne.

³Mana kasi nanao na lete batu sivala ne qira basoero qamu miasoka qira go, do muna va mia qirae vatovato velaka ro ramu, go tarina lulua go.

⁴Mana ṉalu tina sadaka me valeke miasoka sipi velaka sivala ne, ramu tamuna toṉove sasarapa velaka sivala i ko sivala osina ṉalu topu ro ne.

⁵Gerena napu so ramu vano voru muna va mazala qira vano kazigarata rone. Mana osiqamu muna va qoqoro napua tanuqamu, mana vari tatavisi de qamu koego. Tanego Buka tabo ne igo dena, “God iki soko kaega basoe ni vazaka napu go, do iva sadaka ze mamaligara lavata ia de iri koego vano iri ko qoqoro go.”

⁶Iago muna ko va qoqoroe tanuqamu polana karisi varavarana mazala sivala ia God, go ia tanuna tina pala va popoka qamu.

⁷Iago taru ze de ikoego ia osina pataro iva tutua qamu go, tanego ia i miasoka qamu.

⁸Muna ko vanamanama, mana miasoka va velaka qamu. Tanego kana ramu Satana i liqutu kolo qamu go mara vasakata qamu igo, i gere laioni ni lete muma i taqia basoe go mara kalakunu vatoo ne igo.

⁹Iago, muna vanadua vaogoto ramu go tamuna vanoto go ia. Tanego ramu qamu rove turaqamu ro iri koego osina dia vudu pua, iri lulu bana go Kristo, iri soba napua so vokara qamu pala go nae.

¹⁰Do taramuzina vokara pusi dena, God i ko nego Mana, i koru qamu go tamuna pala tavise menomeno ia i ko gado kutona i kaega. Loborona to va kameka ramu de ikoego Kristo, tanuna tinara va totoloṉo velaka qamu, mana tina teke ne qamu, karaputa, mana vadegere vanadu qamu go.

¹¹De ikoego ia i koe karaputa iki rove go kaega lupo. Amen!

¹²Qa karo zatu leta pusi era dena loborona vari va tatavisi ia Saelas, kameka valeke vakitaka era i nadue de ikoego Kristo. Qa soko vatadagasiri qamu ramu, mana varove qamu ramu makaolo qamu pala go, ia to mamaligara lavata ia God, iago muna degere vanadue to Mana nae.

¹³Ria vano lotu iri koego komala Babiloni iri tavine banae de i koe God iri va garetua seko kula ria de qamu koego ramu, gerena napu so Maka go.

¹⁴Muna vari kulae napu tanuqamu loborona mamaligara ia Kristo, go bule ia mara ko tavisi qamu osina ṉalu.